ទោះបីសកម្មភាពវាយប្រហារបានបញ្ចប់ទៅហើយក្តី ប៉ុន្តែសព្វាវុធដែលបានប្រើប្រាស់ដូចជា គ្រាប់បែកចង្កោម គ្រាប់ផ្លោង គ្រាប់ទម្លាក់ ផ្សែងពុល និងយុទ្ធភណ្ឌ ផ្សេងទៀត មានមួយចំនួននៅមិនទាន់ផ្ទុះដែលអាចបណ្តាលឱ្យផ្ទុះនិងបង្កគ្រោះថ្នាក់គ្រប់ពេលវេលា។ ដើម្បីបង្ការនិងទប់ស្កាត់គ្រោះថ្នាក់ដែលអាចកើតមានជាយថាហេតុ អាជ្ញាធរកម្ពុជាគ្រប់គ្រងសកម្មភាព កំចាត់មីននិងសង្គ្រោះជនពិការដោយសារមីន (អាជ្ញាធរមីន) សូមធ្វើការណែនាំដល់ភាគីពាក់ព័ន្ធទាំងអស់ឱ្យ អនុវត្តនូវវិធានការដូចខាងក្រោម៖

១- ប្រតិបត្តិករអប់រំផ្សព្វផ្សាយការយល់ដឹងពីគ្រោះថ្នាក់ដោយសារយុទ្ធភណ្ឌគ្រឿងផ្ទុះ ចូលរួមជម្រុញ លើកទិសដៅ និងអនុវត្តការងារអប់រំផ្សព្វផ្សាយការយល់ដឹងពីគ្រោះថ្នាក់ដោយសារ យុទ្ធភណ្ឌគ្រឿងផ្ទុះដល់ប្រជាជននៅតាមមណ្ឌលសុវត្ថិភាព និងតាមខ្នងផ្ទះ បង្កើនក្រុមចុះអប់រំផ្សព្វផ្សាយការយល់ដឹងពីគ្រោះថ្នាក់ដោយសារយុទ្ធភណ្ឌគ្រឿងផ្ទុះ ឱ្យអស់លទ្ធភាព តាមដែលអាចធ្វើទៅបាន រៀបចំផលិតសម្ភារៈសំខាន់ៗដែលបម្រើដល់ការងារអប់រំផ្សព្វផ្សាយការយល់ដឹងពីគ្រោះថ្នាក់ដោយសារ យុទ្ធភណ្ឌគ្រឿងផ្ទុះ ចូលរួមជាមួយក្រុមការងារផែនការសកម្មភាពមីនខេត្ត(ម៉ាពូ) ក្នុងការរិះរកគំនិតថ្មីៗដែលជា ប្រយោជន៍ដល់ការអប់រំផ្សព្វផ្សាយការយល់ដឹងពីគ្រោះថ្នាក់ដោយសារយុទ្ធភណ្ឌគ្រឿងផ្ទុះសហការជាមួយអាជ្ញាធរមូលដ្ឋាន ដោយបញ្ជាក់ពីគោលបំណងជាក់លាក់មុនចុះបំពេញការងារអប់រំ ផ្សព្វផ្សាយការយល់ដឹងពីគ្រោះថ្នាក់ដោយសារយុទ្ធភណ្ឌគ្រឿងផ្ទុះ។

២- គណៈកម្មាធិការសកម្មភាពមីនខេត្ត និងក្រុមការងារផែនការសកម្មភាពមីនខេត្ត (ភីម៉ាក់/ម៉ាពូ) ផ្តល់កិច្ចសហការ និងសម្របសម្រួល ដើម្បីធានាឱ្យប្រតិបត្តិករអប់រំផ្សព្វផ្សាយការយល់ដឹងពីគ្រោះថ្នាក់ ដោយសារយុទ្ធភណ្ឌគ្រឿងផ្ទុះ អាចចុះទៅបំពេញការងារបាននៅតាមមណ្ឌលសុវត្ថិភាព និងតាមខ្នងផ្ទះ ពិនិត្យលទ្ធភាពបញ្ញាបការងារអប់រំផ្សព្វផ្សាយការយល់ដឹងពីគ្រោះថ្នាក់ដោយសារយុទ្ធភណ្ឌគ្រឿងផ្ទុះ រាល់ពេលអង្គភាព ក្រសួង ស្ថាប័ននានាចុះទៅបំពេញការងារនៅមណ្ឌលសុវត្ថិភាព និងខ្នងផ្ទះ តាមដាន និងរាយការណ៍ជាប្រចាំមកអាជ្ញាធរមីន អំពីវឌ្ឍនភាពនៃការអប់រំផ្សព្វផ្សាយការយល់ដឹងពី គ្រោះថ្នាក់ដោយសារគ្រឿងផ្ទុះ។

៣- ដៃគូអភិវឌ្ឍន៍ និងភាគីពាក់ព័ន្ធ ផ្តល់ការលើកទឹកចិត្តដោយគាំទ្រ សកម្មភាពអប់រំផ្សព្វផ្សាយការយល់ដឹងពីគ្រោះថ្នាក់ដោយសារយុទ្ធ ភណ្ឌគ្រឿងផ្ទុះនៅតាមមណ្ឌលសុវត្ថិភាព និងតាមខ្នងផ្ទះ – ស្វែងរកជំនួយគាំទ្រ ដល់សកម្មភាពអប់រំផ្សព្វផ្សាយការយល់ដឹងពីគ្រោះថ្នាក់ដោយសារយុទ្ធភណ្ឌ គ្រឿងផ្ទុះ។

៤- អគ្គលេខាធិការដ្ឋានអាជ្ញាធរមីន – ដឹកនាំ និងសម្របសម្រួល ដើម្បីធានាឱ្យមានការចុះទៅអប់រំផ្សព្វផ្សាយការយល់ដឹងពីគ្រោះថ្នាក់ ដោយសារយុទ្ធភណ្ឌគ្រឿងផ្ទុះ នៅតាមទីតាំងសុវត្ថិភាពដែលពលរដ្ឋភៀសសឹកស្នាក់នៅ សម្របសម្រួលជាមួយក្រសួង-ស្ថាប័ន ប្រតិបត្តិករ និងភាគីពាក់ព័ន្ធ ដើម្បីទទួលបានការគាំទ្រឱ្យមាន សកម្មភាពអប់រំផ្សព្វផ្សាយការយល់ដឹងពីគ្រោះថ្នាក់ដោយសារយុទ្ធភណ្ឌគ្រឿងផ្ទុះ រៀបចំឱ្យក្រុមត្រួតពិនិត្យអាជ្ញាធរមីន ចុះត្រួតពិនិត្យការងារអប់រំផ្សព្វផ្សាយការយល់ដឹងពីគ្រោះថ្នាក់ ដោយសារយុទ្ធភណ្ឌគ្រឿងផ្ទុះដែលបំពេញដោយប្រតិបត្តិករ សម្របសម្រួលជាមួយប្រតិបត្តិករ ឱ្យមានកិច្ចសហប្រតិបត្តិការចុះអប់រំផ្សព្វផ្សាយការយល់ដឹងដោយសារ យុទ្ធភណ្ឌគ្រឿងផ្ទុះ សហការជាមួយក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ និងអង្គការក្រៅរដ្ឋាភិបាលជាតិ-អន្តរជាតិ ដើម្បីស្នើសុំបន្តការគាំទ្រ និងការចូលរួមអប់រំផ្សព្វផ្សាយការយល់ដឹងដោយសារយុទ្ធភណ្ឌគ្រឿងផ្ទុះ ដឹកនាំ ចាត់ចែង និងសម្របសម្រួលការងារពាក់ព័ន្ធបន្ទាន់ផ្សេងៗ តាមស្ថានភាពជាក់ស្តែង។

The post អាជ្ញាធរមីន ចេញសេចក្តីណែនាំ បង្ការ ទប់ស្កាត់គ្រោះថ្នាក់ដែលអាចកើតមានជាយថាហេតុដោយសារយុទ្ធភណ្ឌគ្រឿងផ្ទុះ អំឡុងពេលសង្គ្រាម appeared first on .

អាជាធរមីន បានបញ្ជាក់ថា ចាប់តាំងពីការចាប់ផ្តើម នៃសកម្មភាពឈ្លានពានខុសច្បាប់របស់យោធាថៃ មកលើកម្ពុជា ដោយ លើកទី១ ពីថ្ងៃទី២៤ ដល់ថ្ងៃ២៨ ខែកក្កដា ឆ្នាំ២០២៥ និងលើកទី២ ពីថ្ងៃទី៧ ខែធ្នូ ឆ្នាំ២០២៥ មកទល់ពេលបច្ចុប្បន្ន យោធាថៃបានប្រើប្រាស់យុទ្ធោបករណ៍ធុនធ្ងន់គ្រប់ប្រភេទមកលើតំបន់ស៊ីវិល និងបាន បំពានការអនុវត្តបទឈប់បាញ់នៅថ្ងៃទី២៨ ខែកក្កដា ឆ្នាំ២០២៥ សេចក្តីថ្លែងការណ៍រួមទីក្រុងគូឡាឡាំពួរ ថ្ងៃទី២៦ ខែតុលា ឆ្នាំ២០២៥ ធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងរំលោភលើគោលការណ៍ ជាមូលដ្ឋាននៃច្បាប់អន្តរជាតិ។

ការឈ្លានពានដោយប្រើប្រាស់យុទ្ធោបករណ៍ទាំងនោះ បានបណ្តាលឱ្យប្រជាជនស៊ីវិលស្លាប់ និង របួសជាច្រើននាក់ បំផ្លិចបំផ្លាញទ្រព្យសម្បត្តិនិងហេដ្ឋារចនាសម្ព័ន្ធសាធារណៈ មណ្ឌលសុខភាព សាលារៀន វត្តអារាម ប្រាសាទបុរាណ និងបានបង្ខំឱ្យប្រជាជនប្រមាណជាង ២០ម៉ឺនគ្រួសារ ត្រូវជម្លៀសចេញពី លំនៅដ្ឋានទៅកាន់ទីតាំងសុវត្ថិភាពជាច្រើនកន្លែង តាមបណ្តាខេត្តនានា។ មិនត្រឹមតែប៉ុណ្ណោះ ការឈ្លានពាននេះ បណ្តាលឱ្យប៉ះពាល់ដល់ប្រតិបត្តិការបោសសម្អាតមីនមនុស្សធម៌ ពិសេសបុគ្គលិកបោសសម្អាតមីន ប្រមាណជាង ៩០០ នាក់ ព្រមទាំងក្រុមគ្រួសារ ដែលត្រូវធ្វើការភៀសខ្លួនទៅកាន់ទីមានសុវត្ថិភាព។ ខណៈដែល សម្តេច ធិបតី ហ៊ុន ម៉ាណែត នាយករដ្ឋមន្ត្រី បាននិងកំពុងខិតខំប្រឹងប្រែងដោះស្រាយបញ្ហា បង្កដោយការឈ្លានពានរបស់យោធាថៃ ប្រកបដោយ ភាពម៉ឺងម៉ាត់ ស្មារតីស្នេហាជាតិខ្ពស់ និងរក្សាឱ្យបាននូវឧត្តមផលប្រយោជន៍ជាតិ ដើម្បីនាំមកនូវសន្តិភាព សុខសុវត្ថិភាព និងសុខដុមរមនា ជូនប្រជាជន និងប្រទេសជាតិ អាជ្ញាធរមីន សូមធ្វើការណែនាំដល់ ប្រតិបត្តិករសកម្មភាពមីន ដូចមានខាងក្រោម ដើម្បីបង្ការ និងទប់ស្កាត់គ្រោះថ្នាក់ដែលអាចកើតមានជាយថាហេតុ ដល់បុគ្គលិកដែលកំពុងបម្រើការងារក្នុងវិស័យសកម្មភាពមីន ក៏ដូចជាប្រជាជនភៀសសឹកក្នុងអំឡុងពេល នៃ ការឈ្លានពានរបស់យោធាថៃ៖

១- បន្តយកចិត្តទុកដាក់ខ្ពស់បំផុតចំពោះសុវត្ថិភាពបុគ្គលិកបោសសម្អាតមីន និងមិនត្រូវអនុញ្ញាត ឱ្យបុគ្គលិកបន្តការងារក្នុងស្ថានភាពប្រឈមនឹងការគ្រោះថ្នាក់

២- បន្តយកចិត្តទុកដាក់ និងផ្តល់ការគាំទ្រដល់បុគ្គលិកបោសសម្អាតមីន ដែលមានក្រុមគ្រួសារ កំពុងរស់នៅក្នុងតំបន់ប្រឈមនឹងការគ្រោះថ្នាក់ ឬតំបន់ជនភៀសសឹកនានា

៣- ផ្អាករាល់ប្រតិបត្តិការស្រាវជ្រាវ បោសសម្អាត និងសកម្មភាពអប់រំផ្សព្វផ្សាយការយល់ដឹងពី យុទ្ធភណ្ឌគ្រឿងផ្ទុះ នៅតាមតំបន់ប្រឈមនឹងការគ្រោះថ្នាក់ ដោយសារសកម្មភាពឈ្លានពាន របស់យោធាថៃ ដើម្បីរក្សាសុវត្ថិភាពជូនដល់បុគ្គលិកបោសសម្អាតមីន

៤- ស្នើសុំជាបន្ទាន់មកអាជ្ញាធរមីន ចំពោះការផ្លាស់ប្តូរផែនការបោសសម្អាតចម្ការមីន ក្នុងករណី ចម្ការមីននោះ ស្ថិតក្នុងតំបន់ប្រឈមនឹងការគ្រោះថ្នាក់ ដោយសារសកម្មភាពឈ្លានពានរបស់ យោធាថៃ

៥- បន្តរៀបចំកម្មវិធីអប់រំផ្សព្វផ្សាយការយល់ដឹងអំពីគ្រោះថ្នាក់ដោយសារមីន គ្រាប់បែកចង្កោម និងយុទ្ធភណ្ឌគ្រឿងផ្ទុះផ្សេងទៀត ដែលបាញ់និងទម្លាក់ដោយយោធាថៃ ជូនប្រជាជនដែល កំពុងស្នាក់នៅតាមទីតាំងសុវត្ថិភាព ដើម្បីចៀសវាងគ្រោះថ្នាក់ពីសំណល់ជាតិផ្ទុះទាំងនោះ នៅ ពេលប្រជាជនត្រលប់ទៅកាន់មូលដ្ឋានរបស់ខ្លួនវិញ នៅពេលប្រក្រតីភាព និងសន្តិភាពវិល ត្រលប់ដូចដើម

៦- បន្តផ្តល់កិច្ចសហប្រតិបត្តិការ និងភាពជាដៃគូ ជូនចំពោះអាជ្ញាធរមូលដ្ឋានគ្រប់ជាន់ថ្នាក់ ក្នុង ការដាក់ស្លាកសញ្ញាគ្រោះថ្នាក់ នៅទីតាំងដែលមានយុទ្ធភណ្ឌគ្រឿងផ្ទុះ ដែលបានបាញ់ និង ទម្លាក់ដោយយោធាថៃ ឬយកទៅរក្សាទុកនៅទីតាំងមានសុវត្ថិភាព (សម្រាប់ជាភស្តុតាង) ឬ កម្ទេចចោលតាមការចាំបាច់ ដើម្បីធានាសុវត្ថិភាពជូនប្រជាជន និងមន្ត្រី-បុគ្គលិកមូលដ្ឋាន ព្រមទាំងដើម្បីចៀសវាងគ្រោះថ្នាក់ជាយថាហេតុ និងផ្តល់កិច្ចសហការ តាមសំណូមពររបស់ អាជ្ញាធរមូលដ្ឋាន

៧- បន្តរក្សាកិច្ចសហការល្អជាមួយគណៈកម្មាធិការសកម្មភាពមីនខេត្ត និងក្រុមការងារសកម្មភាពមីន ខេត្ត ក្នុងសកម្មភាពបោសសម្អាត សកម្មភាពអប់រំផ្សព្វផ្សាយការយល់ដឹងពីយុទ្ធភណ្ឌគ្រឿងផ្ទុះ និងកិច្ចសង្គ្រោះជនរងគ្រោះ

៨- បន្តតាមដានការវិវត្តនៃសកម្មភាពវាយប្រហារដោយយោធាថៃជាប្រចាំ ពីប្រភពព័ត៌មានផ្លូវការ ផ្តល់ដោយក្រសួង-ស្ថាប័នជាតិពាក់ព័ន្ធ ដើម្បីអនុវត្តសកម្មភាពខាងលើប្រកបដោយប្រសិទ្ធភាព។

The post អាជ្ញាធរមីន ណែនាំការពង្រឹងវិធានការសុវត្ថិភាពចំពោះប្រតិបត្តិការសកម្មភាពមីនអំឡុងពេលការឈ្លានពានរបស់យោធាថៃមកលើកម្ពុជា appeared first on .

តាមរយៈសេចក្ដីថ្លែងការណ៍ចុះថ្ងៃទី៣០ ខែវិច្ឆិកា ឆ្នាំ២០២៥ អាជ្ញាធរមីន បានសម្ដែង ការសោកស្តាយចំពោះជនជាតិចិន ដែលបានរងរបួសក្នុងឧប្បត្តិហេតុផ្ទុះមីន នៅតាមបណ្ដោយព្រំដែនកម្ពុជា-ថៃ នាពេលថ្មីៗនេះ។

ទន្ទឹមនឹងនោះ អាជ្ញាធរមីន ក៏បានបំភ្លឺថា នៅថ្ងៃទី២៩ ខែវិច្ឆិកា ឆ្នាំ២០២៥ ជនជាតិចិនម្នាក់ឈ្មោះ Shi Jingu កាន់លិខិតឆ្លងដែនលេខ ២៣៥៦៩៧៥២៦៣ បានរងរបួសដោយសារឧប្បត្តិហេតុផ្ទុះមីន ខណៈពេលព្យាយាមឆ្លងកាត់ពីប្រទេសថៃចូលប្រទេសកម្ពុជា នៅក្នុងភូមិសាស្ត្រភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ឧប្បត្តិហេតុ នេះ បានកើតឡើងនៅក្នុងទឹកដីកម្ពុជា ដែលជាតំបន់ចម្ការមីន បន្សល់ទុកពីសង្គ្រាមអូសបន្លាយជាច្រើនទសវត្សរ៍ កាលពីអតីតកាល។

កម្ពុជា បដិសេធដាច់ខាតចំពោះការចោទប្រកាន់របស់យោធាថៃ ដែលបានធ្វើឡើងតាមរយៈសារព័ត៌មាន នា ពេលថ្មីៗនេះ ដោយបានចោទប្រកាន់គ្មានការពិត មាននិន្នាការនយោបាយ មិនស្របតាមស្តង់ដាររបាយការណ៍អន្តរជាតិ និងផ្ទុយទាំងស្រុងទៅនឹងកិត្តិនាម និងការប្តេជ្ញាចិត្តរបស់កម្ពុជា ក្នុងការសម្រេចបានតំបន់ព្រំដែនដែលគ្មានមីន។

កម្ពុជាបញ្ជាក់ថា កម្ពុជាមិនប្រើប្រាស់មីនជាដាច់ខាត មិនថានៅពេលណា ឬក្នុងកាលៈទេសៈ ក៏ដោយ ហើយក្នុង នាមជារដ្ឋភាគីអនុសញ្ញាអូតាវ៉ា កម្ពុជាមិននឹងប្រើប្រាស់មីនឡើយ។

អាជ្ញាធរមីន សង្កត់ធ្ងន់ថា ប្រសិនបើមានមីនថ្មី ដូចដែលថៃបានអះអាងមែន យើងគួរសួរវិញថា៖ ដោយកម្ពុជាមិនមានប្រើប្រាស់មីន តើនរណាជាអ្នកដាក់មីន? កម្ពុជាមិនអាចឆ្លើយសំណួរនេះ ជំនួសប្រទេសថៃបានឡើយ។

កម្ពុជាបដិសេធយ៉ាងដាច់ខាត ចំពោះការលើកឡើងណាមួយ ដែលថា កងកម្លាំងយោធាកម្ពុជា បានប្រើប្រាស់មីន។ មកទល់ពេលបច្ចុប្បន្ន ទាំងកម្ពុជា អាស៊ាន និងយន្តការអន្តរជាតិ មិនទាន់ទទួលបានលទ្ធផលស៊ើបអង្កេតជាផ្លូវការណាមួយឡើយនោះទេ។ ប្រសិនបើថៃមានភស្តុតាងដែលមានការផ្ទៀងផ្ទាត់ត្រឹមត្រូវ គួរផ្ដល់ជាផ្លូវការមកកាន់កម្ពុជា និងប្រកបដោយវិជ្ជាជីវៈ មិនមែនតាមរយៈសេចក្ដីថ្លែងការណ៍សាធារណៈ ឬប្រព័ន្ធផ្សព្វផ្សាយសង្គមនោះទេ។

កម្ពុជាបន្តអំពាវនាវឱ្យមានការស៊ើបអង្កេតរួមគ្នា ដោយឯករាជ្យ និងប្រកបដោយវិជ្ជាជីវៈ ព្រោះថា បើមិនទាន់រក ឃើញការពិតណាមួយនោះទេ ការចោទប្រកាន់ជាសាធារណៈ គឺជាការបង្កើនភាពតានតឹង និងធ្វើឱ្យសហគមន៍ អន្ដរជាតិមានការភ័យច្រឡំ។

ជាថ្មីម្ដងទៀត កម្ពុជាសម្ដែងការសោកស្តាយចំពោះជនរងគ្រោះដោយសារមីន មិនថាជាតិសាសន៍ណានោះទ តែកម្ពុជានឹងមិនទទួលយកការចោទប្រកាន់មិនពិត ការក្លែងបន្លំស្ថានការណ៍ និងមិនអាចទទួលបានឡើយ ចំពោះការលើកឡើងណាមួយ ដែលប៉ះពាល់ដល់កិត្តិនាម និងកិច្ចខិតខំប្រឹប្រែងរបស់កម្ពុជា ក្នុងការសម្រេចបានអនាគតមួយដែលគ្មានមីន។

កម្ពុជានៅតែប្តេជ្ញាចិត្តគាំទ្រកិច្ចសហប្រតិបត្តិការ ការស៊ើបអង្កេតផ្អែកលើភស្តុតាង និងការដោះស្រាយបញ្ហាតាម បណ្ដោយព្រំដែន ដោយសន្តិភាព និងផ្អែកលើច្បាប់អន្តរជាតិ៕

The post អាជ្ញាធរមីន អំពាវនាវឱ្យមានការស៊ើបអង្កេតរួមគ្នា ដោយឯករាជ្យប្រកបដោយវិជ្ជាជីវៈ ជុំវិញករណីជនជាតិចិន ដើរជាន់មីននៅតាមតំបន់ព្រំដែនកម្ពុជា-ថៃ appeared first on .

សេចក្តីថ្លែងការ អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន (អាជ្ញាធរមីន) នាថ្ងៃទី២៥ ខែវិច្ឆិកា ឆ្នាំ២០២៥នេះ បានឱ្យដឹងថា ការចោទប្រកាន់ទាំងនេះ ជាថ្មីម្តងទៀត ត្រូវបាន ផ្សព្វផ្សាយដោយគ្មានរបាយការណ៍ស៊ើបអង្កេតផ្លូវការ មិនមានការផ្ទៀងផ្ទាត់រួមគ្នា និងគ្មានការពិគ្រោះ យោបល់តាមរយៈយន្តការទ្វេភាគី ដែលបានព្រមព្រៀងគ្នានោះឡើយ។ កម្ពុជាបដិសេធដាច់ខាត ចំពោះរាល់ការចោទប្រកាន់ណាមួយដែលថា យោធាកម្ពុជាបានដាក់មីនថ្មី។ កម្ពុជា នៅតែប្តេជ្ញាចិត្តយ៉ាងមុតមាំ ចំពោះកាតព្វកិច្ចរបស់ខ្លួនក្នុងក្របខណ្ឌអនុសញ្ញាហាមប្រាមការប្រើប្រាស់មីន ប្រឆាំងមនុស្ស (អនុសញ្ញាអូតាវ៉ា) សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពគូឡាឡាំពួ ថ្ងៃទី២៦ ខែតុលា ឆ្នាំ២០២៥ និងគ្រប់យន្តការទ្វេភាគីទាំងអស់ជាមួយថៃ។

ទាក់ទងនឹងការលើកឡើងអំពី “មីនប្រភេទ PMN-2 ទើបត្រូវបានដាក់ថ្មី” កម្ពុជាសូមគូសបញ្ជាក់ថា ការ លើកឡើងនេះ ត្រូវតែគាំទ្រដោយរបាយការណ៍បច្ចេកទេសផ្លូវការ រួមជាមួយរូបថតដែលមានការផ្ទៀងផ្ទាត់ ត្រឹមត្រូវ របាយការណ៍នៃការប្រមូលនិងរក្សាទុកភស្តុតាង ការវិភាគទីតាំងផ្ទុះ ទិន្នន័យ GIS ដែលមាន កំណត់ត្រាពេលវេលា និងការវាយតម្លៃដោយអង្គការសកម្មភាពមីនភាគីទីបីដែលអព្យាក្រឹត។ មកទល់ បច្ចុប្បន្ន កម្ពុជាមិនទាន់ទទួលបានរបាយការណ៍ណាមួយ តាមរយៈបណ្តាញផ្លូវការណាមួយនោះទេ។

 ជាមួយគ្នានេះដែរ ការអះអាងពាក់ព័ន្ធនឹងការរើសបាន “ទូរស័ព្ទរបស់ទាហានកម្ពុជា” កម្ពុជា សូមសម្តែងនូវ ក្តីព្រួយបារម្ភ ចំពោះភាពពិតនៃរូបភាព ព្រោះព័ត៌មាន និងភស្តុតាងដែលបានលើកឡើងដោយថៃ មិនត្រូវ បានបញ្ជូនមកកាន់កម្ពុជា តាមរយៈគណៈកម្មាធិការព្រំដែនទូទៅ (GBC) ឬក្រុមការងារសម្របសម្រួល ចម្រុះ (JCTF) ហើយក៏មិនមានការស្នើសុំណាមួយឱ្យកម្ពុជា ផ្ទៀងផ្ទាត់រូបភាពផងដែរ។ បច្ចុប្បន្ន រូបភាព ឬវីឌីអូ អាចត្រូវបានកែប្រែដើម្បីបំភាន់ ដែលទាមទារឱ្យមានការពិនិត្យច្បាស់លាស់។ កម្ពុជាទទួលយកតែ ភស្តុតាងដែលត្រូវបានផ្ទៀងផ្ទាត់ដោយឯករាជ្យ និងធ្វើឡើងដោយក្រុមការងារចម្រុះតែប៉ុណ្ណោះ។

ក្នុងនាមជាភាគីដែលបានស្នើសុំការគាំទ្រ និងអន្តរាគមន៍ពីអាស៊ាន កម្ពុជាកោតសរសើរចំពោះតួនាទីរបស់ អាស៊ាន ក្នុងការសម្របសម្រួលកិច្ចសន្ទនា និងការរក្សាស្ថិរភាពក្នុងតំបន់ ក៏ប៉ុន្តែ កម្ពុជាសូមបញ្ជាក់ជូនថា មកទល់ពេលបច្ចុប្បន្ន កម្ពុជាមិនទាន់ទទួលបានរបាយការណ៍ផ្លូវការណាមួយ ហើយកម្ពុជា នឹងមិនទទួល យកការវាយតម្លៃណាមួយ ដែលមិនអនុលោមតាមនីតិវិធីព្រមព្រៀងគ្នា នៅក្នុងក្របខ័ណ្ឌអាស៊ាននោះ ទេ។ កម្ពុជាបញ្ជាក់ជាថ្មីថា កម្ពុជាប្រកាន់ខ្ជាប់នូវគោលនយោបាយ និងគោលការណ៍របស់ខ្លួន ដោយមិនមាន ការប្រើប្រាស់មីន ប្តេជ្ញាសម្រេចឱ្យបានអនាគតមួយដែលគ្មានមីន និងគាំទ្រឱ្យមានការវិភាគចំពោះរាល់ ឧប្បត្តិហេតុ ប្រកបដោយវិជ្ជាជីវៈ តាមបែបវិទ្យាសាស្ត្រ និងមានភាពយុត្តិធម៌។

កម្ពុជាអំពាវនាវឱ្យមានការ ស៊ើបអង្កេតរួមគ្នាជាបន្ទាន់ ដោយមានការចូលរួមពីអ្នកជំនាញអន្តរជាតិអព្យាក្រឹត ដើម្បីធានាបាននូវការ វាយតម្លៃត្រឹមត្រូវ និងផ្អែកលើភស្តុតាង។ អាជ្ញាធរមីន សម្តែងនូវការសោកស្តាយ ដែលការចោទប្រកាន់របស់ថៃ ម្តងហើយម្តងទៀត ត្រូវបានចេញ ផ្សាយទៅកាន់ប្រព័ន្ធផ្សព្វផ្សាយ ដោយមិនមានការជូនជាដំណឹងមកកម្ពុជា តាមរយៈយន្តការទ្វេភាគី។ ទង្វើ ជាឯកតោភាគីនេះ បានបំផ្លាញទំនុកចិត្ត បង្កឱ្យមានការយល់ច្រឡំជាសាធារណៈ និងបង្កភាពស្មុគស្មាញ ដល់ការងាររបស់ក្រុមបច្ចេកទេស ដែលកំពុងអនុវត្តការងារផ្ទាល់។ កម្ពុជានៅតែប្តេជ្ញា ក្នុងការធ្វើកិច្ចសហប្រតិបត្តិការដោយសន្តិភាព តម្លាភាព និងនាំមកនូវសុវត្ថិភាពជូន ទាំងប្រជាជនកម្ពុជា និងប្រជាជនថៃ៕

The post អាជ្ញាធរមីន បានសេចក្តីថ្លែងការណ៍ពីការចោទប្រកាន់គ្មានមូលដ្ឋានរបស់ថៃ ពាក់ព័ន្ធនឹងឧប្បត្តិហេតុផ្ទុះមីននៅតំបន់ព្រំដែន appeared first on .

នៅក្នុងកិច្ចប្រជុំ ក្រុមការងារបច្ចេកទេសចម្រុះរាជរដ្ឋាភិបាល ដៃគូអភិវឌ្ឍវិស័យមីន (TWG-MA ក្រោមប្រធានបទ “កិច្ចប្រឹងប្រែងរួមគ្នាឆ្ពោះទៅ កម្ពុជាមួយគ្មានផលប៉ះពាល់ពីមីននិងសំណល់ជាតិផ្ទុះពីសង្គ្រាម” កាលពីថ្ងៃទី១៦ ខែតុលា ឆ្នាំ២០២៥ លោក ឌិត ទីណា បានលើកឡើងថា ក្រសួងមានបំណងប្រែក្លាយដីមីនទៅជានិមិត្តសញ្ញានៃក្តីសង្ឃឹម ជាវាលបៃតងស្រស់ និងដីមានជីរជាតិសម្រាប់វិស័យកសិកម្ម។

ទន្ទឹមនឹងនោះ លោករដ្ឋមន្រ្តី បានគាំទ្រយ៉ាងពេញទំហឹងចំពោះ សារៈសំខាន់នៃវិស័យមីននៅកម្ពុជា ក្នុងការផ្សារភ្ជាប់ទៅនឹងវិស័យកសិកម្ម និងធានាបាននូវសន្តិសុខស្បៀង។ លោកក៏បានអំពាវនាវឱ្យប្រទេសជាមិត្ត ដៃគូអភិវឌ្ឍន៍ វិស័យឯកជន និងភាគីពាក់ព័ន្ធដទៃទៀត បន្តគាំទ្រដល់ កម្ពុជាឆ្ពោះទៅកាន់ប្រទេសគ្មានមីន និងការធ្វើកសិកម្មដោយគ្មានការភ័យខ្លាច។

តាមរយៈលទ្ធផលនៃកិច្ចប្រជុំនេះ ប្រទេសជាមិត្ត ដៃគូអភិវឌ្ឍន៍ ប្រតិបត្តិករសកម្មភាពមីន តំណាងវិស័យឯកជន និងភាគីពាក់ព័ន្ធទាំងអស់ បានសម្តែងនូវការកោតសរសើរចំពោះសមិទ្ធផលសម្រេចបាន និងភាពជោគជ័យរបស់កម្ពុជាក្នុងការដោះស្រាយមីន ហើយសន្យាបន្តគាំទ្រកម្ពុជា ដើម្បីឱ្យអនាគតកម្ពុជាជាប្រទេសគ្មានមីន និងគ្មានជនរងគ្រោះដោយសារមីន ព្រមទាំងចាត់ទុក វិស័យសកម្មភាពមីន គឺជាជំហានដំបូង ដើម្បីឈានទៅការអភិវឌ្ឍប្រទេសជាតិ។

សូមជម្រាបជូនថា គិតចាប់តាំងពីឆ្នាំ២០១៨ ផ្ទៃដីកម្ពុជាប្រមាណ៦៥ភាគរយត្រូវបានរំដោះមីន និងបានប្រើប្រាស់សម្រាប់វិស័យកសិកម្ម។ ចំនួននេះ សម្រាប់ប្រជាជនកម្ពុជាដែលពឹងផ្អែកលើកសិកម្ម បានចាត់ទុកដីគឺជាទ្រព្យសកម្ម និងបានចាត់ទុកគ្រាប់មីនជាការគំរាមកំហែងខ្លាំងបំផុត៕

The post ក្រសួងកសិកម្ម គ្រោងចុះMOUជាមួយអាជ្ញាធរមីន កំណត់ទីតាំងដីកសិកម្ម ដែលត្រូវធ្វើការបោសសម្អាតមីន appeared first on .

យោងតាមសេចក្ដីប្រកាសព័ត៌មានរបស់អាជ្ញាធរមីន នៅថ្ងៃទី៥ ខែតុលា ឆ្នាំ២០២៥ បានឱ្យដឹងថា គម្រោងបោសសម្អាតមីន ដែលអាជ្ញាធរមីន តាងនាមឱ្យរាជរដ្ឋាភិបាល ប្រគល់ជូនកងទ័ពជើងគោក មជ្ឈមណ្ឌលជាតិរក្សាសន្តិភាព និងអង្គភាពស៊ីម៉ាក់ កាលពីថ្ងៃទី០២ ខែតុលា ឆ្នាំ២០២៥ ក្នុងទំហំផ្ទៃដីមានមីនចំនួនជាង ៤១ គីឡូម៉ែត្រការ៉េ នៅតាមបណ្តាខេត្តជាប់ព្រំដែនកម្ពុជា-ថៃ គឺធ្វើឡើងនៅតំបន់ដែលមានប្រជាពលរដ្ឋខ្មែររស់នៅ បម្រើផលប្រយោជន៍ប្រជាជនកម្ពុជា និងស្ថិតក្នុងភូមិ ឃុំ ស្រុក ក្នុងខេត្ត មិនជាប់ និង/ឬមិននៅជិតនឹងតំបន់ព្រំដែនកម្ពុជា-ថៃ ទេ។

អាជ្ញាធរមីន បានបន្ថែមថា គម្រោងបោសសម្អាតមីននេះ រាជរដ្ឋាភិបាល មានផែនការបោសសម្អាតជាយូរឆ្នាំមកហើយ ហើយមិនពាក់ព័ន្ធសោះឡើយនឹងសំណូមពររបស់ភាគីថៃ និងតំបន់ព្រំដែនកំពុងមានជម្លោះរវាងកម្ពុជា-ថៃ។

អាជ្ញាធរមីន សង្កត់ធ្ងន់ថា គម្រោងបោសសម្អាតមីននេះ គាំទ្រដល់គោលបំណងរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ក្នុងការផ្តល់ដីសុវត្ថិភាព ផ្តល់ក្តីសង្ឃឹម ការកសាងឡើងវិញនូវសហគមន៍និងសេចក្តីថ្លៃថ្នូររបស់ប្រជាជនកម្ពុជា និងដើម្បីអនាគតមួយកាន់តែប្រសើរឡើងរបស់ប្រជាជនកម្ពុជាយើង៕

The post អាជ្ញាធរមីន គូសបញ្ជាក់ពីគម្រោងបោសសម្អាតមីនជាង ៤១គីឡូម៉ែត្រការ៉េ ដែលមិនស្ថិតនៅជិតនឹងតំបន់មានជម្លោះព្រំដែនកម្ពុជា-ថៃ appeared first on .

អាជ្ញាធរមីនបានឱ្យដឹងថា ពិធីចុះហត្ថលេខានេះ នឹងត្រូវធ្វើការបោសសម្អាតផ្ទៃដីមានមីនចំនួន ៤១.៧៩៦.២៦៣ ម៉ែត្រការ៉េ ស្មើនឹង ៤៥៣ ចម្ការមីន ក្នុងខេត្តចំនួន ០៦ រួមមាន ខេត្តបន្ទាយមានជ័យ ខេត្តឧត្តរមានជ័យ ខេត្តសៀមរាប ខេត្តបាត់ដំបង ខេត្តព្រះវិហារ និងខេត្តពោធិ៍សាត់ ដោយប្រើប្រាស់ថវិកាសរុបចំនួន ៥ លានដុល្លារសហអាមេរិក។

លោកទេសរដ្ឋមន្រ្តី លី ធុជ បានលើកឡើងថា ពិធីចុះហត្ថលេខានេះ មិនត្រឹមតែជាតំណាងឱ្យភាពជាដៃគូរវាងស្ថាប័ននិងស្ថាប័ន និងការបំពេញបែបបទប៉ុណ្ណោះទេ ថែមទាំងជាការតំណាងឱ្យការសន្យា ការប្តេជ្ញាចិត្ត និងការធ្វើការរួមគ្នា ដើម្បីឈានទៅសម្រេចគោលដៅខ្ពស់មួយ គឺកម្ពុជារួចចាកផុតពីគ្រោះថ្នាក់ដោយសារមីននិងសំណល់ជាតិផ្ទុះពីសង្រ្គាម ក៏ដូចជាការបញ្ចាក់បន្ថែមនូវអ្វីដែល សម្តេចធិបតី នាយករដ្ឋមន្រ្តី បានផ្តល់នូវជំនឿទុកចិត្ត និងជាការអនុវត្តដោយមានគោលដៅច្បាស់លាស់ ដើម្បីធ្វើឱ្យសហគមន៍ ទទួលបាននូវស្នាមញញឹម និងដីប្រកបដោយសុវត្ថិភាព តាមរយៈគុណតម្លៃនៃលទ្ធផលទទួលបានពីការបោសសម្អាតមីន។

លោកបន្តថា កម្ពុជា ស្គាល់យ៉ាងច្បាស់នូវការឈឺចាប់ និងទុក្ខវេទនាដោយសារសង្រ្គាមអស់ជាច្រើនទសវត្សរ៍ ដែលបានឆក់ប្លន់អាយុជីវិត និងដៃជើងរបស់ប្រជាជនរបស់ខ្លួន ព្រមទាំងបដិសេធមិនឱ្យប្រជាជនអាចប្រើប្រាស់ដីសម្រាប់ការអភិវឌ្ឍ និងធ្វើឱ្យខ្ទេចខ្ទាំនូវក្តីសុបិន្តរបស់ប្រជាជនទៀតផង។ ទោះបីសកម្មភាពមីនមានការរីកចម្រើនគួរឱ្យកត់សម្គាល់ កម្ពុជានៅតែបន្តជាប្រទេសមួយក្នុងចំណោមប្រទេសជុំវិញពិភពលោក ដែលមានផលប៉ះពាល់ដោយសារមីនខ្ពស់ជាងគេ ដែលបច្ចុប្បន្ននេះ កម្ពុជា នៅសល់ផ្ទៃដីចំនួន ១៧២៣ គីឡូម៉ែត្រការ៉េ បន្តរងផលប៉ះពាល់ដោយសារមីន និងសំណល់ជាតិផ្ទុះពីសង្រ្គាម ក្នុងនោះផ្ទៃដីមានមីនចំនួន ៥៣១ គីឡូម៉ែត្រការ៉េ។

បើតាមលោក លី ធុជ កម្ពុជា បានបោះជំហានយ៉ាងសំខាន់ឆ្ពោះទៅសម្រចគោលដៅកម្ពុជាមួយគ្មានផលប៉ះពាល់ដោយសារមីននិងសំណល់ជាតិផ្ទុះពីសង្រ្គាម តាមរយៈការពង្រឹងសមត្ថភាពជាតិ និងភាពជាម្ចាស់របស់កម្ពុជាលើវិស័យសកម្មភាពមីន ជាមួយនឹងការដាក់ចេញនូវគោលនយោបាយច្បាស់លាស់ប្រកបដោយបរិយាបន្ន និងសកម្មភាពបោសសម្អាតមីនដោយផ្តោតសំខាន់លើតម្រូវការរបស់មនុស្សជាអាទិភាព។

លោកទេសរដ្ឋមន្រ្តី ក៏បានសម្តែងនូវការពេញចិត្តចំពោះកងទ័ពជើងគោក មជ្ឈមណ្ឌលជាតិរក្សាសន្តិភាព អង្គភាពស៊ីម៉ាក់ និងប្រតិបត្តិករដទៃទៀត រួមជាមួយសហគមន៍ផ្តល់ជំនួយ ដែលបានឈរជាមួយកម្ពុជាអស់ជាង៣ទសវត្សរ៍ និងធ្វើជាដៃគូពិតប្រាកដរបស់កម្ពុជា ក៏ដូចជាបានឆ្លងកាត់និងតស៊ូជាមួយកម្ពុជា ជំនះរាល់ឧបសគ្គ និងទទួលបានជោគជ័យយ៉ាងស្ងាត់ស្ងៀម ព្រមទាំងបានជួយផ្លាស់ប្តូរពីដីមីន ទៅជាដីស្រែ ដីចម្ការ ដីដាំដុះ ដីមានចំណូលខ្ពស់ ជាពិសេសប្រែក្លាយពីដីមីន ទៅជាដីមាស និងដីពោរពេញដោយក្តីសង្ឃឹម និងមានអនាគតរុងរឿង៕

The post អាជ្ញាធរមីនចុះហត្ថលេខាបោសសម្អាតមីន ក្នុងខេត្តចំនួន ០៦ ប្រើប្រាស់ថវិកាប្រមាណ ៥ លានដុល្លារអាមេរិក appeared first on .

ការបញ្ជាក់បែបនេះរបស់អាជ្ញាធរមីន និងរដ្ឋបាលខេត្តព្រះវិហារ ធ្វើឡើងនៅក្នុងកិច្ចប្រជុំត្រៀមដោះស្រាយបញ្ហាប្រឈមចំពោះមុខដែលបង្កឡើងដោយយុទ្ធភណ្ឌគ្រឿងផ្ទុះពីសំណាក់យោធាថៃ ក្នុងភូមិសាស្រ្តខេត្តព្រះវិហារ ក្នុងអំឡុងជម្លោះប្រដាប់អាវុធកម្ពុជា-ថៃ នាពេលកន្លងមក។ កិច្ចប្រជុំនេះដឹកនាំដោយ លោក លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន និងលោក គឹម រិទ្ធី អភិបាលនៃគណៈអភិបាលខេត្តព្រះវិហារ កាលពីថ្ងៃទី១១ ខែកញ្ញា ឆ្នាំ២០២៥ នៅខេត្ដព្រះវិហារ។

ក្នុងឱកាសនោះ លោក លី ធុជ បានលើកឡើងថា ជម្លោះប្រដាប់អាវុធរវាងកងទ័ពកម្ពុជា និងកងទ័ពថៃនេះ បានបង្កឱ្យប៉ះពាល់យ៉ាងធ្ងន់ធ្ងរដល់ហេដ្ឋារចនាសម្ព័ន្ធរូបវន្ត ភាព​ធន់​របស់​កម្ពុជា​​ និងប៉ះពាល់ដល់ភាពសុខក្សេមក្សាន្ត និងសតិអារម្មណ៍របស់ប្រជាពលរដ្ឋកម្ពុជា។

លោកបន្ដថា ផលប៉ះពាល់ដោយយុទ្ធភណ្ឌគ្រឿងផ្ទុះទាំងនោះ តម្រូវឱ្យមានការសិក្សាវាយតម្លៃឱ្យបានគ្រប់ជ្រុងជ្រោយ និងធ្វើការបោសសម្អាតជាមុនដើម្បីធានាសុខសុវត្ថិភាព មុននឹងការវិលត្រឡប់របស់ប្រជាពលរដ្ឋភៀសសឹកសម្រាប់បំពេញសកម្មភាពប្រចាំថ្ងៃ និងគាំទ្រដល់គម្រោងសាងសង់ និងជួសជុលសំណង់អគារនានាតាមតម្រូវការជាក់ស្តែង។

លោកទេសរដ្ឋមន្រ្ដី បានសង្កត់ធ្ងន់ថា អាជ្ញាធរមីន រួមជាមួយរដ្ឋបាលខេត្តព្រះវិហារ សហការជាមួយប្រតិបត្តិករជាតិអង្គភាពស៊ីម៉ាក់ ត្រៀមខ្លួចរួចជាស្រេច ក្នុងការដោះស្រាយ និងបោសសម្អាតយុទ្ធភណគ្រឿងផ្ទុះបន្សល់ទុកពីសំណាក់យោធាថៃស្របតាមតម្រូវការចាំបាច់ ដើម្បីកសាងនិងស្តារឡើងវិញនូវសហគមន៍មូលដ្ឋាន និងសេចក្តីថ្លៃថ្នូររបស់ប្រជាពលរដ្ឋ។

ជាមួយគ្នានោះដែរ លោក លី ធុជ បានថ្លែងអំណរគុណ និងកោតសរសើរប្រកបដោយការវាយតម្លៃខ្ពស់ចំពោះស្មារតីលះបង់ ការទទួលខុសត្រូវ និងកិច្ចខិតខំប្រឹងប្រែងយ៉ាងសកម្មរបស់រដ្ឋបាលខេត្តព្រះវិហារ ក្នុងការដោះស្រាយ និងរៀបចំទីជម្រកបណ្តោះអាសន្នជូនប្រជាពលរដ្ឋភៀសសឹកប្រកបដោយចិត្តទុកដាក់ខ្ពស់ ស្របតាមគោលដៅរបស់សម្តេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា។

លោកទេសរដ្ឋមន្រ្តី ក៏បានសម្តែងនូវការដឹងគុណជូនចំពោះវីរៈកងទ័ពកម្ពុជា ដែលបានលះបង់ និងពលីសាច់ស្រស់ ឈាមស្រស់ ដើម្បីការពារបូរណភាពទឹកដី និងការពារសុខសន្តិភាពរបស់កម្ពុជា ដែលបានមកយ៉ាងលំបាក។

លោក លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន ក៏បានគូសបញ្ជាក់ទៀតថា កម្ពុជាក្រោមការដឹកនាំប្រកបដោយចក្ខុវិស័យច្បាស់លាស់បំផុតរបស់ សម្តេចធិបតី បានដាក់ចេញនូវយុទ្ធសាស្រ្តគ្រប់ជ្រុងជ្រោយទាំងវិស័យការពារជាតិ និងវិស័យការទូត ដើម្បីឆ្លើយតប និងវាយបកទាន់ពេលវេលាប្រកបដោយប្រសិទ្ធភាព ក្នុងសម្លេងខ្មែរតែមួយ ពាក់ព័ន្ធនឹងការរំលោភបំពានរបស់យោធាថៃមកលើកម្ពុជា៕

The post អាជ្ញាធរមីន និងរដ្ឋបាលខេត្តព្រះវិហារ ត្រៀមខ្លួន បោសសម្អាតយុទ្ធភណ្ឌគ្រឿងផ្ទុះបន្សល់​ទុកពីសំណាក់យោធាថៃ appeared first on .

នៅលើបណ្ដាញសង្គមផ្លូវការ អាជ្ញាធរមីនបានលើកឡើងថា ប្រតិបត្តិករជាតិនិងអន្តរជាតិបានចូលរួមផ្សព្វផ្សាយអប់រំដល់បងប្អូនប្រជាពលរដ្ឋជនភៀសសឹកឲ្យមានការប្រុងប្រយ័ត្នខ្ពស់អំពីគ្រោះថ្នាក់ដោយសារគ្រាប់យុទ្ធភណ្ឌមិនទាន់ផ្ទុះ និងគ្រាប់បែកចង្កោមដែលនៅសេសសល់ពីសង្គ្រាម។

អាជ្ញាធរមីន ក៏បានអំពាវនាវដល់ពលរដ្ឋផងដែរថា សូមបងប្អូននៅពេលប្រទះឃើញគ្រាប់ ឫវត្ថុសង្ស័យសូមកុំរើស កាន់ គប់ ដំ កែច្នៃ គ្រាប់ទាំងនោះ វាបណ្តាលឱ្យរបួស ពិការ ស្លាប់ គ្រប់ពេល។ សូមរាយការណ៍ជាបន្ទាន់នៅពេលប្រទះឃើញគ្រាប់យុទ្ធភណ្ឌមិនទាន់ផ្ទុះ ឬវត្ថុចម្លែកសង្ស័យជាគ្រាប់ ទៅអាជ្ញាធរមានសមត្ថកិច្ច ប៉ុស្តិ៍នគរបាល មេភូមិ មេឃុំ និងប្រតិបត្តិករបោសសម្អាតមីន តាមរយ:លេខទូរស័ព្ទ ៖ 012 800 473/ 011 38 39 37 / 097 489 5600 / 066 612 613/ 063 96 34 99៕

The post អាជ្ញាធរមីន អំពាវនាវឱ្យពលរដ្ឋរាយការណ៍បន្ទាន់នៅពេលប្រទះឃើញគ្រាប់យុទ្ធភណ្ឌមិនទាន់ផ្ទុះ ឬវត្ថុចម្លែកដែលសង្ស័យជាគ្រាប់ appeared first on .

អាជ្ញាធរមីន ក៏បានសម្តែងការព្រួយបារម្ភ និងថ្កោលទោសយ៉ាងខ្លាំងបំផុតចំពោះកងកម្លាំងប្រដាប់អាវុធថៃដែលបានប្រើប្រាស់គ្រាប់បែកចង្កោម នាថ្ងៃទី២៥ ខែកក្កដា ឆ្នាំ២០២៥ ក្នុងខេត្តព្រះវិហារ ធ្វើឱ្យប្រជាពលរដ្ឋជាពិសេសកុមារទទួលរងរបួស ខូចខាតទ្រព្យសម្បត្តិ និងមានជនភាសឹកជាច្រើនពាន់នាក់។

ដើម្បីចូលរួមបង្ការ និងទប់ស្កាត់នូវគ្រោះថ្នាក់ដោយសារគ្រាប់បែកចង្កោមទាំងនោះ អាជ្ញាធរមីន បានធ្វើការអំពាវនាវដល់បងប្អូនប្រជាពលរដ្ឋ ដែលកំពុងរស់នៅតំបន់ព្រំដែន ដូចតទៅ ៖

១. សូមបងប្អូននៅពេលប្រទះឃើញគ្រាប់បែកចង្កោម (គ្រាប់មានរូបរាងស្រដៀងនឹងរូបភាពភ្ជាប់) សូមកុំរើស កាន់ គប់ ដំ កែច្នៃ គ្រាប់ទាំងនោះ វាបណ្តាលឱ្យរបួស ពិការ ស្លាប់ គ្រប់ពេល។

២. នៅពេលប្រទះឃើញគ្រាប់ដែលមានភិនភាគដូចរូបភ្ជាប់ សូមរាយការណ៍ជាបន្ទាន់មកកម្លាំងប្រដាប់អាវុធ នគរបាលជាតិ អាជ្ញាធរមូលដ្ឋាន មេឃុំ មេភូមិ ឬប្រតិបត្តិករបោសសម្អាតមីន ដែលនៅក្បែរនោះ ដើម្បីយកគ្រាប់ទាំងនោះទៅកំទេចចោល៕

The post អាជ្ញាធរមីន អំពាវនាវឱ្យពលរដ្ឋមានការប្រុងប្រយ័ត្នខ្ពស់ចំពោះគ្រាប់បែកចង្កោម ដែលបាញ់ដោយកងកម្លាំងប្រដាប់អាវុធថៃ appeared first on .