ឡាវ ត្រៀមបើកដំណើរការស្ថានីយថាមពលខ្យល់ធំបំផុតក្នុងតំបន់អាស៊ាន នៅចុងឆ្នាំនេះ

ប្រទេសឡាវ កំពុងស្ថិតនៅក្នុងដំណើរការបើកស្ថានីយថាមពលខ្យល់ដំបូង និងធំជាងគេបំផុតនៅក្នុងតំបន់អាស៊ីអាគ្នេយ៍ នៅចុងឆ្នាំនេះ បន្ទាប់ពីទួរប៊ីនសរុបចំនួន ១៣៣ សម្រាប់គម្រោងដ៏មានមហិច្ឆិតានេះ ត្រូវបានដំឡើងរួចរាល់។ នេះបើការចុះផ្សាយពីសារព័ត៌មាន The Star។

គម្រោងថាមពលខ្យល់មូសុង ដែលមានតម្លាំង ៦០០ មេហ្គាវ៉ាត់ មានតម្លៃសរុបរហូតដល់ទៅ ៦៣០លានដុល្លារអាមេរិកនេះ នឹងលាតសន្ធឹងលើផ្ទៃដីសរុប ៦៨ ០០០ ហិកតា នៅទូទាំងស្រុក Dakcheung ក្នុងខេត្ត Xekong និងស្រុក Sanxay ក្នុងខេត្ត Attapeu ។ គម្រោងនេះ គឺជាគំនិតផ្តួចផ្តើមថាមពលខ្យល់ដំបូងគេក្នុងតំបន់ ដែលគ្របដណ្តប់លើខេត្តច្រើនជាងមួយ។

បើតាមប្រភពខាងលើបានបង្ហាញឲ្យដឹងទៀតថា អគ្គិសនីដែលផលិតបានដោយគម្រោងនេះ នឹងត្រូវនាំចេញទៅកាន់ប្រទេសវៀតណាម ក្រោមកិច្ចព្រមព្រៀងទិញថាមពលរយ:ពេល ២៥ឆ្នាំ ជាមួយក្រុមហ៊ុនរដ្ឋ Vietnam Electricity (EVN)។

ជម្រាបជូនផងដែរថា គម្រោងនេះស្ថិតនៅក្រោមការអភិវឌ្ឍដោយក្រុមហ៊ុន Impact Energy Asia Development Co Ltd ដែលបានចុះហត្ថលេខាលើអនុស្សរណៈនៃការយោគយល់គ្នា ជាមួយរដ្ឋាភិបាលឡាវ ក្នុងឆ្នាំ២០១១ ដើម្បីវាយតម្លៃលទ្ធភាពនៃការបណ្តាក់ទុននេះ។ ការងារលើគម្រោងនេះ បានដំណើរការជាផ្លូវការនៅឆ្នាំ២០២២ បន្ទាប់ពីការចុះហត្ថលេខាលើកិច្ចព្រមព្រៀងសម្បទាន ហើយបច្ចុប្បន្នវាត្រូវបានប្រតិបត្តិការដោយក្រុមហ៊ុន Monsoon Wind Power Company Limited៕