ក្រុមហ៊ុនទូកល្បឿនលឿន របស់អ្នកឧកញ៉ា ទៀ វិចិត្រ ត្រៀមប្រកាសដំណឹងល្អមួយ ក្រោយរត់សាកល្បងពី កំពង់ផែក្រុងព្រះសីហនុ ទៅកាន់កំពង់ផែទេសចរណ៍ខេត្តកំពត

ក្រុមហ៊ុនទូកល្បឿនលឿន ជីធីវីស៊ី ស្ពីដប៊ូត (GTVC Speedboat) របស់អ្នកឧកញ៉ា ទៀ វិចិត្រ ត្រៀមនឹងប្រកាស​ដំណឹងល្អមួយជូនដល់ភ្ញៀវទេសចរជាតិ និងអន្តរជាតិ បន្ទាប់ពីការរត់សាកល្បងពី កំពង់ផែក្រុងព្រះសីហនុ ទៅកាន់កំពង់ផែទេសចរណ៍ខេត្តកំពត បានយ៉ាងរលូន កាលពីពេលថ្មីៗនេះ។

កាលថ្ងៃទី០២ ខែមីនា ឆ្នាំ២០២៦ អ្នកឧកញ៉ា ទៀ វិចិត្រ អគ្គនាយកក្រុមហ៊ុន ជីធីវីសុី គ្រុប (GTVC Group) បានដឹកនាំក្រុមការងារ និងបុគ្គលិកក្រុមហ៊ុនទូកល្បឿនលឿន ជីធីវីស៊ី ស្ពីដប៊ូត ចុះទស្សនកិច្ច​តាម​ផ្លូវទឹក ទៅកាន់កំពង់ផែទេសចរណ៍អន្តរជាតិខេត្តកំពត។

ក្រោយដំណើរទស្សនកិច្ចនេះ នៅថ្ងៃទី០៤ ខែមីនា ឆ្នាំ២០២៦ អ្នកឧកញ៉ា ទៀ វិចិត្រ បានបង្ហោះសារបែបនេះថា៖ “ខ្ញុំគិតថា តាមផ្លូវសមុទ្រចេញពី ខេត្តកំពត-ខេត្តព្រះសីហនុ-កោះរ៉ុង-កោះស្តេច ដូចជាមិនមានបញ្ហាក្នុងការដឹកជញ្ជូនភ្ញៀវទេសចរណ៍នោះទេ សុំតែការគាំទ្រពីបងប្អូនម្នាក់មួយៗមកគឺអស់ចិត្តហើយ”។

យ៉ាងណាមិញ នៅថ្ងៃទី០៥ ខែមីនា ឆ្នាំ២០២៦ ម្សិលមិញនេះ ក្រុមហ៊ុនទូកល្បឿនលឿន GTVC Speedboat បានបង្ហាញសារផងដែរថា បន្ទាប់ពីការរត់សាកល្បងពី កំពង់ផែក្រុងព្រះសីហនុ ទៅកាន់កំពង់ផែទេសចរណ៍ខេត្តកំពត ក្រុមហ៊ុនអូប័រ 𝐆𝐓𝐕𝐂 𝐒𝐩𝐞𝐞𝐝𝐛𝐨𝐚𝐭 នឹងមានដំណឹងល្អជូនបងប្អូនទាំងអស់គ្នាក្នុងពេលឆាប់ៗនេះ៕