ក្រុមហ៊ុនការពារជាតិអាមេរិក Anduril Industries កំពុងពិភាក្សាអំពីការទិញយករោងចក្រដំឡើង Oppama របស់ក្រុមហ៊ុន Nissan Motor នៅជិតទីក្រុងតូក្យូ ដើម្បីផលិតហោះគ្មានមនុស្សបើកយោធា (ដ្រូន) នៅក្នុងប្រទេសជប៉ុន។ នេះបើតាមការចុះផ្សាយពីសារព័ត៌មាន Reuters។
យ៉ាងណាមិញ ខណៈពេលដែលក្រុមហ៊ុនទាំងពីរ នៅតែមិនទាន់មានការសម្រេចចិត្តណាមួយត្រូវបានធ្វើឡើងនៅឡើយ កិច្ចព្រមព្រៀងដ៏គួរឲ្យភ្ញាក់ផ្អើលនេះ អាចនឹងមើលឃើញការផ្លាស់ប្តូរពីរោងចក្រផលិតរថយន្ត ទៅជាជម្ឈមណ្ឌលសម្រាប់ផលិតអាវុធជំនួសវិញ។
គួរឲ្យដឹងថា ជុំវិញការពិភាក្សាអំពីការទិញយករោងចក្រ Oppama នេះ ត្រូវបានកើតឡើង នៅពេលដែលរដ្ឋាភិបាលរបស់លោកស្រី Sanae Takaichi កំពុងស្វែងរកការផលិតឧបករណ៍ការពារជាតិ ចំពេលមានការព្រួយបារម្ភកាន់តែខ្លាំងឡើងថា វិបត្តិនៅច្រកសមុទ្រតៃវ៉ាន់ អាចបង្កហានិភ័យដល់ជប៉ុន។
ជម្រាបជូនថា រដ្ឋាភិបាលរបស់លោកស្រី Takaichi ត្រូវបានគេរំពឹងថានឹងបង្ហាញនៅឆ្នាំនេះនូវយុទ្ធសាស្ត្រសន្តិសុខជាតិថ្មីមួយដែលអាចពន្លឿនការចំណាយលើយន្តហោះគ្មានមនុស្សបើក គ្រាប់រំសេវ និងឧបករណ៍យោធាផ្សេងទៀត ខណៈពេលដែលកំពុងរៀបចំផែនការដើម្បីពង្រីកការផលិតអាវុធរបស់ប្រទេសបន្ថែមទៀត៕
