សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រាប់ទៅសាលា និងគ្រឹះស្ថានឧត្តមសិក្សាទាំងអស់ កុំទម្លាក់គុណភាពអប់រំ ដើម្បីប្រកួតប្រជែងគ្នា ឬដើម្បីតែបានសញ្ញាប័ត្រសិស្ស។សម្តេចធិបតី ថ្លែងដូច្នេះ កាលព្រឹកថ្ងៃទី០៦ ខែសីហា ឆ្នាំ២០២៦នេះ ក្នុងពេលដែលសម្តេចធិបតីបានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រគល់សញ្ញាបត្រជូននិស្សិតជ័យលាភី និងសម្ពោធអគារសិក្សានៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។
នាឱកាសនោះ សម្តេចធិបតី ហ៊ុន ម៉ាណែត បានបង្ហាញក្តីសង្ឃឹម និងជឿជាក់យ៉ាងមុតមាំថា និស្សិតជ័យលាភីទាំងអស់ នឹងខិតខំពុះពារជម្នះរាល់ឧបសគ្គទាំងឡាយ ដើម្បីកសាងខ្លួនឱ្យកាន់តែស័ក្តិសមជាពលរដ្ឋល្អ មន្ត្រីរាជការល្អ បុគ្គលិកល្អ ដោយប្រើជំនាញ ចំណេះដឹង និង ចំណេះធ្វើពិតប្រាកដរបស់ខ្លួន ប្រកបដោយមនសិការវិជ្ជាជីវៈ ការទទួលខុសត្រូវក្នុងការងារ សីលធម៌ល្អ និងដាក់ខ្លួនបម្រើប្រជាជនដោយស្មោះសរ និងដោយឥតងាករ ដើម្បីបុព្វហេតុជាតិមាតុភូមិ។
ជាមួយគ្នានេះ សម្តេចធិបតី ហ៊ុន ម៉ាណែត បានថ្លែងថា ការសិក្សារៀនសូត្រមិនត្រូវផ្តោតត្រឹមពិន្ទុ និងចំណេះនោះទេ តែត្រូវផ្តោតលើឥរិយាបថក្នុងការទទួលខុសត្រូវ និងប្រឹងប្រែងឱ្យអស់លទ្ធភាពចំពោះការងារដែលទទួលបាន។សម្តេចធិបតី បានថ្លែងថា សញ្ញាបត្រ និងកម្រិតពិន្ទុ មិនមែនជាកត្តាកំណត់ភាពជោគជ័យសម្រាប់ការងារ និងជីវិតនោះទេ។
សម្តេចមហាបវរធិបតី ហ៊ុន ម៉ាណែត បានក្រើនរំលឹកដល់គ្រឹះស្ថានអប់រំ កុំទម្លាក់គុណភាព ដើម្បីប្រកួតប្រជែងគ្នា ជាពិសេសអត់រៀន ក៏បានសញ្ញាបត្រ ខណៈសម្តេចក៏ បានថ្លែងថា មជ្ឈដ្ឋានការងារដែលល្អប្រសើរត្រូវការគុណភាពអបរំ បំណិន និងឥរិយាបថល្អ ទើបអាចសម្រេចបានជោគជ័យ។
ជាថ្មីម្តងទៀត សម្ដេចធិបតី នាយករដ្ឋមន្រ្តី បញ្ជាក់ថា ការរៀបចំគោលគំនិត បទបញ្ជាផ្ទៃក្នុងរបស់សាលានេះ ក៏ជារឿងសំខាន់ណាស់ដែរ សម្រាប់អប់រំមនុស្សដែលយើងរស់រាល់ថ្ងៃ៕អត្ថបទ៖ហ្សាលីន
