ថ្លែងក្នុងកម្មវិធីប្រគល់កញ្ចប់វិនិយោគនៃកម្មវិធី VCIS ដល់សហគ្រាសជលផលក្រោយប្រមូលផលកាលពីម្សិលមិញនេះ លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា វិស័យឯកជនគឺជាស្ពានចម្លងដែលនាំផលិតផលកសិករ អ្នកផលិត ទៅកាន់ទីផ្សារក្រៅប្រទេស។
ក្នុងន័យនេះ លោករដ្ឋមន្រ្តីចង់ស្រាយបញ្ជាក់ថា រាល់ផលិតផលដែលកសិករ ផលិតករ ធ្វើបានគឺមិនអាចដាក់ល្អី ដាក់កញ្ជើយកទៅលក់នៅក្រៅប្រទេសបានទេ បញ្ហានេះទាក់ទងទៅនឹងលទ្ធភាពនៃការនាំចេញរបស់ កសិករនិងផលិតករ។
ប្រសិនបើវិស័យឯកជនមិនមានសមត្ថភាពក្នុងការគ្រប់គ្រង កែច្នៃ ប្រកបដោយគុណភាព និងសុវត្ថិភាពចំណីអាហារនោះទេ ប្រាកដណាស់ថាគ្មានការគ្រាំទ្រចំពោះស្ថាប័ននោះឡើយ។
ក្នុងនេះផងដែរលោក វេង សាខុន ក៏បានសំណូមពរដល់ផលិតករ អ្នកផលិតទាំងអស់សូមពិនិត្យឡើងវិញនូវគុណភាពរបស់ផលិតផល ភ្ជាប់ជាមួយនិងរសជាតិផងដែរ។ បញ្ហារសជាតិនេះជារឿងសំខាន់ណាស់ ដែលត្រូវតែស្វែងយល់បន្ថែមឱ្យកាន់តែច្បាស់និងស៊ីជម្រៅ។
លោកបានលើកជាឧទាហរណ៍ “មិនគួរធ្វើប្រៃពេកទេព្រោះអាចធ្វើឱ្យអ្នកបរិភោគកើតជំងឺមហារីក ក៏មិនគួរធ្វើផ្អែមពេកដែរ។បច្ចុប្បន្ននេះ UNIDO កំពុងតែគិតគូរលើបញ្ហានេះសម្រាប់អាជីវករ”។
សហគ្រាសចំនួន ១៧ នៅកម្ពុជា ទទួលបានថវិកាសរុបប្រមាណ៥0ម៉ឺនដុល្លារពីកញ្ចប់វិនិយោគកម្មវិធី VCIS ដើម្បីគាំទ្រដល់ ដំណើរការផលិតកម្មផលជលផល។ ពិធីប្រគល់កញ្ចប់វិនិយោគនៃកម្មវិធី VCIS ដល់សហគ្រាសជលផលក្រោយពេលប្រមូលផល រៀបចំឡើងដោយរដ្ឋបាលជលផល សហការជាមួយអង្គការ UNIDO ក្រោមវត្តមានឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីម្សិលមិញនេះ។
VCIS គឺជាយន្តការសហវិនិយោគ រវាងកម្មវិធីជាមួយសហគ្រិនជលផលក្រោយប្រមូលផលដែលមានលក្ខណៈសម្បត្តិគ្រប់គ្រាន់ ដើម្បីធ្វើការជាមួយគ្នាក្នុងការកែលម្អប្រតិបត្តិការអាជីវកម្មរបស់ពួកគេឱ្យអនុលោមទៅតាមស្ដង់ដារសុវត្ថិភាពចំណីអាហារ។
យន្តការនេះនឹងជួយឱ្យអាជីវកម្មក្នុងស្រុករីកចម្រើនប្រកបដោយ ចីរភាព និងផ្ដល់ផលប៉ះពាល់ជាវិជ្ជមានដល់សង្គម សេដ្ឋកិច្ច និង បរិស្ថាន៕
