នាយករដ្ឋមន្ត្រីអង់គ្លេស Rishi Sunak នឹងចូលជួបប្រជុំជាមួយប្រធានាធិបតីអាមេរិក ចូ បៃដិននៅអៀរឡង់ខាងជើង អបអរគម្រប់ខួបកិច្ចព្រមព្រៀងសន្តិភាព Good Friday លើកទី ២៥ឆ្នាំ។ នេះបើតាមការចុះផ្សាយពី CNA។
ដោយសារមានវត្តមានសំខាន់ក្នុងការសម្រេចកិច្ចព្រមព្រៀងកាលពីឆ្នាំ ១៩៩៨ អាមេរិកនៅតែមានឥទ្ធិពលនៅក្នុងវិស័យនយោបាយអៀរឡង់ខាងចើង និងបន្តប្ដេជ្ញាការពារសន្តិភាពរបស់ប្រទេសមួយនេះ បន្ទាប់ពីអង់គ្លេសដកខ្លួនចេញពីសហភាពអឺរ៉ុប។
លោក Sunak នឹងចាំទទួលលោក បៃដិន នាថ្ងៃទី ១១ មេសាពេលរសៀល បន្ទាប់ពីការចុះចតយន្តហោះ Air Force One ហើយវានឹងក្លាយជាដំណើរទស្សនកិច្ច ដែលត្រូវបានឃ្លាំមើលយ៉ាងដិតដល់ ចំពោះភាគីទាំងពីរនៃព្រំដែនអៀរឡង់ នៅពេលដែលមានភាពមិនច្បាស់លាស់ផ្នែកនយោបាយនៅក្នុងប្រទេសអៀរឡង់ខាងជើង។
គួររំលឹកដែរថា កិច្ចព្រមព្រៀងសន្តិភាព Good Friday បានចុះហត្ថលេខានាថ្ងៃទី ១០ មេសា ១៩៩៨ ដែលបញ្ចប់ការបង្ហូរឈាមនៅអៀរឡង់ខាងជើងរយៈពេល ៣ទសវត្ស ពោលតាំងពីចុងទសវត្សឆ្នាំ ១៩៦០។
ប៉ុន្តែតាំងពីអង់គ្លេសដកខ្លួនចេញពី EU កិច្ចព្រមព្រៀងមួយនេះត្រូវបានគ្របដណ្ដប់ដោយការធ្វើពហិការរយៈពេលមួយឆ្នាំ ដោយគណបក្សសហជីពគាំទ្រចក្រភពអង់គ្លេសដ៏ធំបំផុតរបស់អៀរឡង់ខាងជើងនៃការបែងចែកអំណាចដែលបានបង្វែររដ្ឋាភិបាលកណ្តាលចំពោះកិច្ចព្រមព្រៀងសន្តិភាព៕
