ឥណ្ឌូណេស៊ី និងម៉ាឡេស៊ី ចេញមុខប្រឆាំងច្បាប់ថ្មី ដល់ទីស្នាក់ការកណ្ដាល EU

អន្តរជាតិ

ប្រទេសផលិតប្រេងដូងធំបំផុតលើលោក ២ គឺឥណ្ឌូណេស៊ី និងម៉ាឡេស៊ី គ្រោងបញ្ជូនមន្ត្រីជាន់ខ្ពស់​របស់ខ្លួន ទៅកាន់សហភាពអឺរ៉ុបនាសប្ដាហ៍ក្រោយ ដើម្បី​បញ្ចេញ​មតិ​តវ៉ា​ជាមួយ​នឹងច្បាប់កាប់​បំផ្លាញ​ព្រៃ​ឈើ​ថ្មី​ ដែល​ពួក​គេ​ជឿ​ថា​អាច​បង្ក​ផល​ប៉ះពាល់​ដល់​អាជីវកម្ម​កសិកម្ម​ខ្នាត​តូច។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

យោងតាមការចុះផ្សាយពី Kelo បង្ហាញថា សភាអ៊ឺរ៉ុបបានអនុម័តច្បាប់ស្តីពីការកាប់បំផ្លាញព្រៃឈើកាលពីខែមុន ដើម្បីហាមឃាត់ការនាំចូលកាហ្វេ សាច់គោ សណ្តែកសៀង និងទំនិញផ្សេងទៀតចូលទៅក្នុងសហភាពអឺរ៉ុប លុះត្រាតែក្រុមហ៊ុននានាអាចផ្តល់ព័ត៌មាន “ដែលអាចផ្ទៀងផ្ទាត់បាន” ថាផលិតផលមិនត្រូវបានដាំដុះនៅលើដី ដែលត្រូវបានកាប់បំផ្លាញព្រៃឈើក្រោយឆ្នាំ ២០២០។

ទន្ទឹមនឹងនោះ ប្រទេសទាំងពីរបានចោទប្រកាន់ EU ពីគោលនយោបាយរើសអើង ដែលផ្តោតលើប្រេងដូង ហើយម៉ាឡេស៊ីធ្លាប់បាននិយាយថា ខ្លួនអាចបញ្ឈប់ការនាំចេញវាទៅ EU ជុំវិញច្បាប់ស្តីពីការកាប់បំផ្លាញព្រៃឈើ។

សូមជម្រាបដែរថា ​ឥណ្ឌូណេស៊ី និងម៉ាឡេស៊ី ក្ដោបក្ដាប់ចំណែកទីផ្សារនាំចេញប្រេងដូងសកល ៨៥% ខណៈសហភាពអឺរ៉ុបគឺជាទីផ្សារធំបំផុត​ទី ៣ របស់ពួកគេ។

ដោយឡែក ​ឥណ្ឌូណេស៊ី និងម៉ាឡេស៊ី បានបញ្ជាក់យ៉ាងច្បាស់ថា ពួកគេ​នឹង​បញ្ជូនមន្ត្រីជាន់​ខ្ពស់​ទៅកាន់ទីក្រុងប្រ៊ុចស៊ែល ដែលជាទីស្នាក់ការកណ្ដាលរបស់​ EU នាថ្ងៃទី ៣០ និង ៣១ ខែឧសភាខាងមុខនេះ៕