កាលពីថ្ងៃទី ១៩ មិថុនាកន្លងទៅ ប្រធានាធិបតីអាល្លឺម៉ង់ Frank-Walter Steinmeier បានទទូចសុំឲ្យចិន និងអាមេរិកបង្កើនការសន្ទនាគ្នាឡើងវិញ អំឡុងពេលជួបប្រជុំជាមួយនាយករដ្ឋមន្ត្រីចិន Li Qiang។
ថ្នាក់ដឹកនាំរបស់អាល្លឺម៉ង់បានសង្កត់ធ្ងន់ថា ទំនាក់ទំនងរវាងអាមេរិក និងចិនគឺពិតជាមានសារៈសំខាន់ណាស់សម្រាប់ “កិច្ចសហប្រតិបត្តិការ និងសុវត្ថិភាពសកលលោក”។ នេះបើតាមការចុះផ្សាយពី CNA។
ចំពោះបញ្ហាមួយនេះ នាយករដ្ឋមន្ត្រីចិនមិនបាននិយាយអ្វីឡើយ ផ្ទុយទៅវិញលោកបែរជាបង្ហើបថា ចិនបានត្រៀមខ្លួនរួចស្រេចក្នុងការធ្វើការជាមួយអាល្លឺម៉ង់ ដើម្បីរួមចំណែកដល់ “ស្ថិរភាព និងវិបុលភាពសកល”។
សូមជម្រាបដែរថា បច្ចុប្បន្នលោក Li កំពុងបំពេញទស្សនកិច្ចក្រៅប្រទេសចំនួន ២ គឺអាល្លឺម៉ង់ ខណៈជំហានបន្ទាប់គឺទៅបារាំង ដើម្បីចូលរួមកិច្ចប្រជុំកំពូលហិរញ្ញវត្ថុអាកាសធាតុ ដែលរៀបចំដោយប្រធានាធិបតី Emmanuel Macron៕
