ទីភ្នាក់ងាររៀបចំផែនការរដ្ឋចិន បើកកិច្ចប្រជុំជាមួយក្រុមហ៊ុនឯកជន បង្កើនភាពជិតស្និទ្ធជាមួយគ្នា

កាលពីពេលថ្មីៗនេះ ទីភ្នាក់ងាររៀបចំផែនការរដ្ឋចិនបាននិយាយថា ពួកគេបានរៀបចំ​កិច្ចប្រជុំជាមួយ​ក្រុមហ៊ុនឯកជន រាប់បញ្ចូលទាំងក្រុមហ៊ុនធំៗដូចជា Baidu និង LONGi Green Energy Technology ជាដើម។ នេះបើតាមការចុះផ្សាយពីសារព័ត៌មាន CNA។

ប្រភពដដែលបន្ថែមថា ជំហានបន្ទាប់នៃកិច្ចប្រជុំរៀបចំដោយគណៈកម្មាធិការកំណែទម្រង់ និងអភិវឌ្ឍន៍ជាតិ ហៅកាត់ NDRC គឺ បង្កើនទំនាក់ទំនងស្អិតល្មួត​ ជាមួយ​នឹង​ក្រុមហ៊ុនឯកជនជាច្រើន និងដោះស្រាយបញ្ហានានា ដែលក្រុមហ៊ុនឯកជនទាំងនេះ​កំពុង​ជួបប្រទះ។

គួររំលឹកដែរថា នេះគឺជាកិច្ចប្រជុំលើកទី ២ រវាង NDRC ជាមួយនឹងក្រុមហ៊ុនឯកជន បន្ទាប់ពី​នាយករដ្ឋមន្ត្រី លោក Li Qiang បានប្រកាសពីការពង្រឹងទំនាក់ទំនង​ជាមួយ​វិស័យឯកជន ដែលជាផ្នែកមួយនៃគោលនយោបាយ បង្កើនកំណើនសេដ្ឋកិច្ចរបស់ចិនឡើងវិញ៕