វៀតណាម បានធ្វើការកំណត់គោលដៅនាំចេញកសិផល ដូចជាផ្លែឈើ អង្ករ ស្វាយចន្ទី និងឈើ ឲ្យបានជាង ២៦ពាន់លានដុល្លារ នៅឆ្នាំ ២០៣០។ នេះបើតាមការចុះផ្សាយពីសារព័ត៌មាន VNA។
បច្ចុប្បន្ន វៀតណាមបានធ្វើការកំណត់យុទ្ធសាស្រ្តអភិវឌ្ឍដំណាំរបស់ខ្លួន រហូតដល់ឆ្នាំ ២០៣០ ដោយរំពឹងទុកថានឹងទទួលបានកំណើនប្រចាំឆ្នាំ ក្នុងទិន្នផលចន្លោះពី ២,២% ដល់ ២,៥% ។
ទន្ទឹមនឹងនេះ នៅឆ្នាំ ២០៥០ វៀតណាម ក៏កំពុងស្វែងរកយុទ្ធសាស្រ្តថ្មី ក្នុងការធ្វើទំនើបកម្មកសិកម្មរបស់ខ្លួន ដើម្បីប្រែក្លាយទៅជាប្រទេសដែលផលិតកសិកម្មកំពូលមួយរបស់ពិភពលោក ផងដែរ។
បន្ថែមពីការបង្កើនផ្ទៃដីដាំដុះស្រូវ ការដាំដុះ និងកែច្នៃផ្លែឈើមួយចំនួន ដូចជាស្វាយ ចេក ផ្លែស្រកានាគ និងម្នាស់ ក៏នឹងត្រូវផ្តល់អាទិភាព ផងដែរ។
ជម្រាបជូនផងដែរថា ក្នុងរយៈពេល ១១ខែដំបូងនៃឆ្នាំ ២០២៣ ការនាំចេញកសិផលរបស់ប្រទេសវៀតណាម មានតម្លៃ ២៤,៣ពាន់លានដុល្លារ ពោលគឺកើនឡើង ១៧% ពីមួយឆ្នាំទៅមួយឆ្នាំ ស្របពេលការនាំចេញទំនិញកសិផលសំខាន់ៗមានដូចជាកាហ្វេ អង្ករ បន្លែ ស្វាយចន្ទី បង្គា ឈើ និងផលិតផលពីឈើ ដែលមានតម្លៃជាង ៣ពាន់លានដុល្លារ៕
