មូលនិធិ The Bill & Melinda Gates Foundation របស់មហាសេដ្ឋីអាមេរិក លោក Bill Gates មានបំណងចាយលុយប្រមាណ ៨,៦ពាន់លានដុល្លារ នៅក្នុងឆ្នាំនេះ ដើម្បីជួយដល់ប្រទេសដែលមានអត្រាចំណូលទាបបំផុតនៅលើពិភពលោក។
យោងតាមការចុះផ្សាយពីសារព័ត៌មាន Reuters បានបង្ហាញថា កញ្ចប់ទឹកប្រាក់សម្រាប់ឆ្នាំ២០២៤ របស់មូលនិធិមហាសេដ្ឋីរូបនេះ គឺមានច្រើនជាងឆ្នាំទៅប្រមាណ ៤% និងច្រើនជាងកាលឆ្នាំ២០២១ រហូតដល់ ២ពាន់លានដុល្លារ ហើយក៏ត្រូវចាត់ទុកថា ជាកញ្ចប់ចំណាយច្រើនបំផុតរបស់មូលនិធិ តាំងពីបង្កើតឡើងកាលពីឆ្នាំ២០០០ ផងដែរ។
រំលឹកបន្តិចថា មូលនិធិ The Gates Foundation គឺជាកូនសោសំខាន់បំផុតមួយ ដែលតែងជួយទ្រទ្រង់ដល់វិស័យសុខាភិបាលទូទាំងសកលលោក តាំងពីផ្ទុះជំងឺរាតត្បាតកូវីដ ១៩។
មូលនិធិមួយនេះផងដែរ ក៏តែងតែផ្ដល់ជំនួយសម្រាប់ការស្រាវជ្រាវ និងបង្កើតឱសថថ្មីៗ នៅក្នុងវិស័យសុខាភិបាល និងជួយដល់ការអភិវឌ្ឍន៍វិស័យបច្ចេកវិទ្យាទូទាំពិភពលោកថែមទៀត៕
