ទីភ្នាក់ងារសារព័ត៌មាន Xinhua បានចុះផ្សាយថា កាលពីថ្ងៃទី៤ ខែមីនា សហភាពអឺរ៉ុប (EU) បានធ្វើការផាកពិន័យជាទឹកប្រាក់ប្រហែល ១,៩៥ពាន់លានដុល្លារទៅលើក្រុមហ៊ុនបច្ចេកវិទ្យាយក្ស Apple ពាក់ព័ន្ធនឹងការរំលោភបំពានទំនុកចិត្ត។
សេចក្តីថ្លែងការណ៍មួយបាននិយាយថា ក្រុមហ៊ុន Apple បានធ្វើការរឹតបន្តឹងទៅលើអ្នកបង្កើតកម្មវិធី ដោយរារាំងពួកគេមិនឱ្យជូនដំណឹងទៅកាន់អ្នកប្រើប្រាស់ប្រព័ន្ធប្រតិបត្តិការ IOS អំពីសេវាកម្មបទចម្រៀងដែលមានតម្លៃធូរថ្លៃជាងពពួកកម្មវិធីនៅលើ App Store ខណៈវាអាចចាត់ទុកបានថាជាទង្វើខុសនឹងច្បាប់ ក្រោមបទប្បញ្ញត្តិប្រឆាំងទំនុកចិត្តរបស់សហភាពអឺរ៉ុប។
ការស៊ើបអង្កេតរបស់គណៈកម្មាការបានបង្ហាញថា ការប្រព្រឹត្តរបស់ Apple នៅតែបន្តកើតមានឡើងជិតមួយទសវត្សរ៍កន្លងមកនេះ ដែលនាំឱ្យអ្នកប្រើប្រាស់ប្រព័ន្ធប្រតិបត្តិការ IOS ចំណាយប្រាក់កាន់តែច្រើនសម្រាប់ការជាវតន្ត្រី ពោលថ្លៃកម្រៃជើងសារមានការកើនខ្ពស់ ដ្បិតវាឆ្លងកាត់ច្រើនដំណាក់កាល ទម្រាំតែត្រូវបានបញ្ជូនទៅដល់ដៃអ្នកប្រើប្រាស់។
ជាមួយគ្នានោះ គណកម្មាការបានសង្កត់ធ្ងន់ថា ការផាកពិន័យខ្លាំងៗយ៉ាងដូច្នេះគឺចាំបាច់ណាស់ដើម្បីរារាំងក្រុមហ៊ុន Apple ពីការរំលោភបំពានស្រដៀងគ្នាបែបនឹងម្តងទៀត ម្យ៉ាងការធ្វើដូច្នេះក៏ដើម្បីព្រមានរារាំងក្រុមហ៊ុនដ៏ទៃផ្សេងៗទៀត ដែលប្រពឹត្តស្រដៀងគ្នាដូចទៅនឹងក្រុមហ៊ុន Apple ដែរ។
ទោះជាយ៉ាងណាក៏ដោយ ដើម្បីជាការឆ្លើយតបទៅនឹងការសម្រេចចិត្តរបស់គណៈកម្មាការសហភាពអឺរ៉ុបដូច្នេះ Apple ក៏បានធ្វើការចេញមុខអះអាងថា EU គ្មានភស្តុតាងដែលអាចទុកចិត្តបាន អំពីការធ្វើឲ្យប៉ះពាល់ដល់អ្នកប្រើប្រាស់នោះទេ ព្រមទាំងបានចោទប្រកាន់ទៅវិញថា EU មិនអើពើចំពោះការពិតនៃទីផ្សារដែលកំពុងរីកចម្រើន ប្រកួតប្រជែង និងទីផ្សារដែលកំពុងកើនឡើងយ៉ាងឆាប់រហ័ស ហើយក្រុមហ៊ុននឹងធ្វើការប្តឹងឧទ្ធរណ៍ចំពោះសំណុំរឿងនេះវិញ៕
