ថៃ ប្រកាសចេញវិធានការមួយចំនួនក្នុងវិស័យអចលនទ្រព្យ ដើម្បីជំរុញសេដ្ឋកិច្ចឡើងវិញ

យោងតាមក្រសួងហិរញ្ញវត្ថុ បាននិយាយថា​ រដ្ឋាភិបាលថៃនឹងប្រកាសចេញវិធានការថ្មីៗមួយចំនួននៅក្នុងវិស័យអចលនទ្រព្យ ខណ:ពេលដែលប្រទេសរបស់ខ្លួន កំពុងព្យាយាមជំរុញកំណើនសេដ្ឋកិច្ចឡើងវិញ។ នេះបើតាមការចុះផ្សាយពីសារព័ត៌មាន VNA។

ប្រភពដដែលនេះ បានរាយការណ៍ទៀតថា អនុរដ្ឋមន្ត្រីក្រសួងហិរញ្ញវត្ថុលោក Krisada Chinavicharana និង Julapun Amornvivat នឹងសង្ខេបអំពីវិធានការថ្មីនេះ ដើម្បីជំរុញសេដ្ឋកិច្ចតាមរយៈវិស័យអចលនទ្រព្យ នៅថ្ងៃអង្គារនេះ។

ទន្ទឹមនឹងនេះ ប្រព័ន្ធផ្សព្វផ្សាយរបស់ប្រទេសថៃ ក៏បានរាយការណ៍ទៀតថា ក្រសួងហិរញ្ញវត្ថុ នឹងស្នើទៅគណៈរដ្ឋមន្ត្រីអំពីវិធានការអចលនទ្រព្យថ្មីៗ រួមទាំងការកាត់បន្ថយថ្លៃប្រតិបត្តិការសម្រាប់ការទិញផ្ទះដែលមានតម្លៃរហូតដល់ ៧លានបាត (១៩០ ៨៩១ដុល្លារ) ខណ:ពេលដែលតម្លៃផ្ទេរកម្មសិទ្ធិក៏នឹងត្រូវបានកាត់បន្ថយពី ២% មកនៅត្រឹម ០,០១% ផងដែរ។

ជុំវិញវិធានការថ្មីនេះ នឹងមានការកាត់បន្ថយពន្ធសម្រាប់អ្នកដែលចង់សាងសង់ផ្ទះរបស់ពួកគេ ក៏ដូចជាការផ្តល់ប្រាក់កម្ចីសម្រាប់ការទិញផ្ទះចំពោះអ្នកដែលមានប្រាក់ចំណូលទាបថែមទៀតផង។

ជាមួយគ្នានេះ ក្រសួងក៏នឹងស្នើច្បាប់ដែលបានកែសម្រួលទាក់ទងនឹងកម្មសិទ្ធិរបស់ជនបរទេសចំពោះការកាន់កាប់លំនៅដ្ឋាន រួមទាំងការបន្តរយៈពេលក្នុងការជួលរហូតដល់ ៩៩ឆ្នាំ ក៏ដូចជាអនុញ្ញាតឲ្យជនបរទេសអាចធ្វើការទិញលំនៅឋានមួយចំនួនផងដែរ៕