តម្លៃភាគហ៊ុនរបស់ក្រុមហ៊ុនខ្នាតយក្ស Berkshire Hathaway បានធ្លាក់ចុះអស់ ២,៦% នៅក្នុងការជួញដូចចុងក្រោយកាលនៅថ្ងៃចន្ទនេះ បន្ទាប់ពីមហាសេដ្ឋី និងត្រូវបានគេស្គាល់ថាជាបិតាវិនិយោគ Warren Buffett បានប្រកាសថានឹងចុះចេញពីតំណែងជានាយកប្រតិបត្តិក្រុមហ៊ុន ក្រោយដឹកនាំអស់ ៦០ឆ្នាំ។ នេះបើតាមការចុះផ្សាយពីសារព័ត៌មាន Reuters។
លោក Warren Buffett បច្ចុប្បន្នវ័យ ៩៤ឆ្នាំ ដែលជាវិនិយោគិនដ៏ល្បីល្បាញបំផុតរបស់ពិភពលោក បាននិយាយនៅក្នុងកិច្ចប្រជុំប្រចាំឆ្នាំរបស់ Berkshire កាលពីថ្ងៃសៅរ៍កន្លងទៅថា លោកនឹងប្រគល់តំណែងជា CEO ក្រុមហ៊ុនទៅឲ្យអនុប្រធាន លោក Greg Abel ជំនួសវិញ នៅចុងឆ្នាំនេះ។
យ៉ាងណាមិញ ក្រោយការប្រកាសនេះ ភាគហ៊ុន Class B របស់ Berkshire បានធ្លាក់ចុះភ្លាមៗ មកនៅត្រឹម ៥២៥,៩៦ដុល្លារ ក្នុងមួយហ៊ុនប៉ុណ្ណោះ ដែលអាចបណ្តាលឲ្យក្រុមហ៊ុនបាត់បង់តម្លៃទីផ្សាររាប់ពាន់លានដុល្លារ ប្រសិនបើការខាតបង់នេះ នៅតែបន្តនោះ។
គួរឲ្យដឹងផងដែរថា សេចក្តីប្រកាសរបស់លោក Buffett នេះ ហាក់បានធ្វើឲ្យមានភាពរង្គោះរង្គើ ក្នុងចំណោមម្ចាស់ភាគហ៊ុនរបស់ Berkshire ដោយសារតែការកើនឡើងនៃភាពច្បាស់លាស់នៃរបៀបដែលក្រុមហ៊ុន នឹងត្រូវប្រតិបត្តិការអាជីវកម្មជិត ២០០ របស់ខ្លួន ក៏ដូចជាការគ្រប់គ្រងទៅលើភាគហ៊ុនសរុបដែលមានតម្លៃប្រមាណ ២៦៤ពាន់លានដុល្លារ និងសាច់ប្រាក់ចំនួន ៣៤៨ពាន់លានដុល្លារ ផ្សេងទៀត បន្ទាប់ពីការចុះចេញពីតំណែងរបស់លោក Buffett ទៅនោះ។
ជម្រាបជូនផងដែរថា ក្នុងរយៈពេលកន្លះសតវត្សកន្លងមកនេះ លោក Buffett បានប្រែក្លាយក្រុមហ៊ុន Berkshire ពីក្រុមហ៊ុនវាយនភណ្ឌដែលកំពុងជួបការលំបាក ទៅជាក្រុមហ៊ុនមានតម្លៃប្រមាណ ១,១៦ទ្រីលានដុល្លារ។ ហើយបើតាម Forbes ទ្រព្យសម្បត្តិសរុបរបស់លោក Beffett បច្ចុប្បន្នមានចំនួនជាង ១៦៨ពាន់លានដុល្លារ៕
