ក្រុមហ៊ុន Xiaomi ថ្មីៗនេះ ហាក់ទទួលបានភាពជោគជ័យថ្មីមួយ បន្ទាប់ពីរថយន្តស្ព័រអគ្គិសនី YU7 ថ្មីរបស់ខ្លួន ទទួលបានការបញ្ជាទិញយ៉ាងច្រើនលើសពីការរំពឹងទុក ពោលគឹត្រឹមតែមួយម៉ោងដំបូង ក្រោយម៉ូដែលថ្មីនេះ ត្រូវបានប្រកាសដាក់លក់ជាផ្លូវការ។ នេះបើតាមការចុះផ្សាយពីសារព័ត៌មាន Reuters។
ក្រុមហ៊ុនផលិតរថយន្ត EV និងស្មាតហ្វូនលំដាប់កំពូលរបស់ប្រទេសចិន Xiaomi កាលពីថ្ងៃទី២៦ ខែមិថុនា បានកំណត់តម្លៃរថយន្ត YU7 SUV ថ្មីរបស់ខ្លួន ចាប់ពី ២៥៣ ៥០០ យ៉ន់ (៣៥ ៣៦៤ដុល្លារ) ដែលជាតម្លៃទាបជាង ៤% បើធៀបទៅនឹងរថយន្តអគ្គិសនី Model Y របស់ក្រុមហ៊ុនយក្សអាមេរិក Tesla។
យ៉ាងណាមិញ នៅក្នុងសេចក្តីថ្លែងការណ៍មួយ Xiaomi បាននិយាយថា YU7 ទទួលបានការបញ្ជាទិញរហូតដល់ទៅ ២៨៩ ០០០ គ្រឿង ឯណោះ ក្នុងរយ:ពេលត្រឹមតែមួយម៉ោងដំបូង នៃការដាក់លក់។ ចំនួននេះគឺច្រើនជាងបីដង បើធៀបទៅនឹងកម្រិតដែលអាចសម្រេចបាន សម្រាប់រថយន្ត EV ដំបូងរបស់ក្រុមហ៊ុន គឺ SU7 ដែលត្រូវបានប្រកាសដាក់លក់ កាលពីខែមីនា ឆ្នាំមុន។
ទន្ទឹមនឹងនេះ បើតាមអ្នកវិភាគមកពីស្ថាប័ន Jefferies បាននិយាយថារថយន្តអគ្គិសនី YU7 នេះ ទំនងជាអាចយកចំណែកទីផ្សារពីរថយន្តអគ្គិសនី Model Y ដែលជាប្រភេទ SUV ដែលលក់ដាច់បំផុតរបស់ប្រទេសចិន ដូចដែលក្រុមហ៊ុន Xiaomi បានកំណត់គោលដៅទុក ដោយសារតម្លៃរបស់ YU7 គឺទាបជាង Tesla Model Y បន្តិច ប៉ុន្តែវាផ្តល់នូវលក្ខណៈពិសេស និងដំណើរការល្អជាង។
ជម្រាបជូនផងដែរថា ក្រោយការប្រកាសដាក់លក់ YU7 នេះ ភាគហ៊ុនរបស់ក្រុមហ៊ុន Xiaomi បានហក់ឡើងដល់ ៨% ដែលជាកម្រិតខ្ពស់បំផុតមិនធ្លាប់មានរបស់ក្រុមហ៊ុនបច្ចេកវិទ្យាខ្នាតយក្សរបស់ចិនមួយនេះ៕
