បន្ទាប់ពីប្រធានាធិបតីអាមេរិក លោក ដូណាល់ ត្រាំ បានធ្វើការគំរាមជាថ្មី ទៅលើការកាត់ផ្តាច់កិច្ចសន្យាជាមួយក្រុមហ៊ុនរបស់លោក Elon Musk បានធ្វើឲ្យក្រុមហ៊ុន Tesla ធ្លាក់ចុះជាង ៥% ភ្លាមៗ ដែលអូសទាញទម្លាក់ទ្រព្យសម្បត្តិរបស់មហាសេដ្ឋីរូបនេះ អស់រាប់ពាន់លានដុល្លារ ផងដែរ។
យោងតាមការចុះផ្សាយពីសារព័ត៌មាន Reuters បានបង្ហាញឲ្យដឹងថា គិតត្រឹមការបិទវគ្គជួញដូរចុងក្រោយ នៅថ្ងៃទី១ ខែកក្កដា ភាគហ៊ុនរបស់ក្រុមហ៊ុនផលិតរថយន្តអគ្គិសនី Tesla បានធ្លាក់ចុះ ៥,៣% មកនៅត្រឹម ៣០០ដុល្លារ ក្នុងមួយហ៊ុន។
ជុំវិញការស្រុតចុះនៃភាគហ៊ុននេះ បានបណ្តាលឲ្យទ្រព្យសម្បត្តិរបស់នាយកប្រតិបត្តិក្រុមហ៊ុន លោក Musk ធ្លាក់ចុះអស់ចំនួន ១២,១ពាន់លានដុល្លារ ក្នុងរយ:ពេលត្រឹមតែមួយថ្ងៃប៉ុណ្ណោះ។ ហើយបើគិតតាំងពីដើមឆ្នាំមក ទ្រព្យសម្បត្តិរបស់លោក Musk បានធ្លាក់ចុះអស់ចំនួនសរុបប្រហែល ៨២ពាន់លានដុល្លារ មកនៅត្រឹមតែ ៣៥១ពាន់លានដុល្លារ ប៉ុណ្ណោះ។
គួរឲ្យដឹងថា ភាគហ៊ុន Tesla បានធ្លាក់ចុះនៅពេលដែលទំនាក់ទំនងរបស់ Musk ជាមួយប្រធានាធិបតីអាមេរិក ត្រាំ កាន់តែតានតឹងម្តងទៀត បន្ទាប់ពីមហាសេដ្ឋីអាមេរិក បន្តរិះគន់ចំៗទៅលើផែនការចំណាយដ៏ច្រើនរបស់រដ្ឋបាលលោក ត្រាំ។
យ៉ាងណាមិញ ជុំវិញការរិះគន់នេះ បានធ្វើឲ្យលោក ត្រាំ ចេញមុខឆ្លើយតបវិញដោយបានគំរាមកាត់ផ្តាច់ជំនួយឧបត្ថម្ភ និងកិច្ចសន្យាដែលមានតម្លៃរាប់ពាន់លានដុល្លារជាមួយរដ្ឋាភិបាលអាមេរិក សម្រាប់ក្រុមហ៊ុនរបស់លោក Musk ៕
