ប្រធានាធិបតីអាមេរិក កាលពីពេលថ្មីៗនេះ បានគំរាមដំឡើងពន្ធគយខ្ពស់លើការនាំចូលទំនិញរបស់ជប៉ុន ដោយលើកឡើងថារដ្ឋាភិបាលទីក្រុងតួក្យូមិនចង់ទិញអង្កររបស់អាមេរិកនោះទេ បើទោះបីជាកំពុងខ្វះខាតតម្រូវការក៏ដោយ។ នេះបើតាមការចុះផ្សាយពីសារព័ត៌មាន CNN។
លោក ត្រាំ បានសរសេរនៅលើបណ្តាញសង្គម Truth Social របស់ខ្លួនកាលពីថ្ងៃទី៣០ ខែមិថុនាថា ៖”ប្រទេសជប៉ុន មិនចង់ទិញអង្ករពីអាមេរិកនោះទេ ខណ:ពេលដែលពួកគេកំពុងមានភាពខ្វះខាតអង្ករយ៉ាងខ្លាំងក៏ដោយ។ ម្យ៉ាងវិញទៀត យើងនឹងផ្ញើលខិតមួយទៅកាន់ពួកគេ ហើយយើងចង់បន្តធ្វើជាដៃគូពាណិជ្ជកម្មជាមួយពួកគេ ច្រើនឆ្នាំទៅមុខទៀត ជាមួយនឹងការដំឡើងពន្ធថ្មី”។
ប៉ុន្តែទោះជាយ៉ាងណាក៏ដោយ ដោយឆ្លើយតបទៅនឹងការព្រមានរបស់លោក ត្រាំ ប្រធានសេដ្ឋវិទូ លោក Ryosei Akazawa បាននិយាយថា ប្រទេសជប៉ុន នឹងមិនលះបង់វិស័យកសិកម្ម ក្នុងការចរចារពន្ធគយជាមួយសហរដ្ឋអាមេរិកនោះទេ។
លោក Akazawa បាននិយាយនៅក្នុងសន្និសីទសារព័ត៌មានមួយថា ៖”ខ្ញុំបានសង្កត់ធ្ងន់ម្តងហើយម្តងទៀតថាកសិកម្ម គឺជាមូលដ្ឋានគ្រឹះជាតិរបស់ប្រទេសជប៉ុន ។ នៅពេលចរចាជាមួយសហរដ្ឋអាមេរិក ជំហររបស់យើងនៅតែមិនផ្លាស់ប្តូរ។ យើងនឹងមិនចូលរួមក្នុងការចរចាណាមួយ ដែលអាចប៉ះពាល់ដល់វិស័យកសិកម្មនោះឡើយ”។
យ៉ាងណាមិញ ជុំវិញការលើកឡើងរបស់លោក ត្រាំ ហាក់មិនមែនជារឿងពិតនោះឡើយ ដោយយោងតាមទិន្នន័យពាណិជ្ជកម្មរបស់ការិយាល័យជំរឿនសហរដ្ឋអាមេរិក បានបង្ហាញថា ប្រទេសជប៉ុនបាននាំចូលអង្ករពីប្រទេសនេះមានតម្លៃ ២៩៨លានដុល្លារក្នុងឆ្នាំ២០២៤។ ក្នុងរយៈពេល ៤ខែដំបូងនៃឆ្នាំ២០២៥ នេះ ទីក្រុងតូក្យូបានទិញអង្ករមានតម្លៃ ១១៤លានដុល្លារ ដែលជាតម្លៃខ្ពស់បំផុតជាប្រវត្តិសាស្ត្រ៕
