អង់គ្លេស និងអាមេរិក គ្រោងចុះកិច្ចព្រមព្រៀងថាមពលនុយក្លេអ៊ែររួមគ្នា អំឡុងដំណើរទស្សនកិច្ចលោក ត្រាំ

ចក្រភពអង់គ្លេស និងសហរដ្ឋអាមេរិក នឹងចុះហត្ថលេខាលើកិច្ចព្រមព្រៀងមួយ ដើម្បីធ្វើការរួមគ្នាលើការជំរុញថាមពលនុយក្លេអ៊ែរ ក្នុងអំឡុងពេលដំណើរទស្សនកិច្ចផ្លូវរដ្ឋរបស់ប្រធានាធិបតីអាមេរិក លោក ដូណាល់ ត្រាំ នៅសប្តាហ៍នេះ។ នេះបើតាមការចុះផ្សាយពីសារព័ត៌មាន Reuters។

រដ្ឋាភិបាលអង់គ្លេសបានចាប់ផ្តើមការជំរុញដ៏សំខាន់មួយដើម្បីពង្រីកថាមពលនុយក្លេអ៊ែររបស់ខ្លួនក្នុងរយៈពេលប៉ុន្មានខែថ្មីៗនេះ ដោយសន្យាថានឹងវិនិយោគដល់ ១៤ពាន់លានផោន (១៩ពាន់លានដុល្លារ) នៅក្នុងរោងចក្រថ្មីនៅ Sizewell C និងជំរុញផែនការសម្រាប់អង្គភាព Rolls-Royce ដើម្បីសាងសង់ម៉ាស៊ីនរ៉េអាក់ទ័រម៉ូឌុលខ្នាតតូច (SMR) ដំបូងគេបង្អស់របស់ប្រទេស ។

គួរឲ្យដឹងថា លោក ត្រាំ ទៅចក្រភពអង់គ្លេសសម្រាប់ដំណើរទស្សនកិច្ចរយៈពេលពីរថ្ងៃ នៅថ្ងៃអង្គារក្នុងអំឡុងពេលដែលលោក និងនាយករដ្ឋមន្ត្រី លោក Keir Starmer នឹងប្រកាសពីទំនាក់ទំនងថាមពលនុយក្លេអ៊ែររួមគ្នាថ្មីមួយ។

ជម្រាបជូនថា កិច្ចសហការនេះមានគោលបំណងពន្លឿនគម្រោង និងការវិនិយោគថ្មីៗ រួមទាំងផែនការដែលរំពឹងថានឹងត្រូវបានប្រកាសដោយក្រុមហ៊ុនរ៉េអាក់ទ័រនុយក្លេអ៊ែររបស់សហរដ្ឋអាមេរិក X-Energy និងក្រុមហ៊ុន Centrica របស់ចក្រភពអង់គ្លេស ដើម្បីសាងសង់រ៉េអាក់ទ័រម៉ូឌុលកម្រិតខ្ពស់រហូតដល់ ១២ ដែលស្ថិតនៅភាគឦសាន ប្រទេសអង់គ្លេស៕