ក្រុមហ៊ុនធានារ៉ាប់រងកំពុងលុបចោលការធានារ៉ាប់រងហានិភ័យសង្គ្រាមសម្រាប់នាវានៅឈូងសមុទ្រមជ្ឈិមបូព៌ា ខណៈដែលជម្លោះអ៊ីរ៉ង់ដែលកំពុងរីករាលដាលបានរំខានដល់ការដឹកជញ្ជូន ដែលធ្វើឱ្យនាវាដឹកប្រេងខូចខាត ឬជាប់គាំង និងយ៉ាងហោចណាស់មនុស្សពីរនាក់បានស្លាប់លើផ្ទៃសមុទ្រ។
ការដឹកជញ្ជូនឆ្លងកាត់ច្រកសមុទ្រហ័រមូសរវាងអ៊ីរ៉ង់ និងអូម៉ង់ ដែលដឹកជញ្ជូនប្រេងប្រហែលមួយភាគប្រាំនៃការប្រើប្រាស់ទូទាំងពិភពលោក ក៏ដូចជាឧស្ម័នមួយចំនួនធំ បានជាប់គាំងស្ទើរតែទាំងស្រុង បន្ទាប់ពីនាវានៅក្នុងតំបន់នោះត្រូវបានវាយប្រហារ ខណៈដែលអ៊ីរ៉ង់បានសងសឹកប្រឆាំងនឹងការវាយប្រហាររបស់សហរដ្ឋអាមេរិក និងអ៊ីស្រាអែល។
កប៉ាល់ដឹកប្រេងមួយគ្រឿងនៅក្នុងតំបន់នេះត្រូវបានឆេះនៅថ្ងៃទី២មីនានេះ យ៉ាងហោចណាស់មានកប៉ាល់ចំនួនបួនគ្រឿងផ្សេងទៀតត្រូវបានខូចខាត និងកប៉ាល់ប្រហែល ១៥០ គ្រឿងបានជាប់គាំង។
ការរំខាន និងការភ័យខ្លាចនៃការបិទទ្វារសមុទ្រយូរបានបណ្តាលឱ្យតម្លៃប្រេង និងឧស្ម័នធម្មជាតិអឺរ៉ុបកើនឡើង ដោយប្រេងឆៅប្រភេទ Brentបានកើនឡើងរហូតដល់ ១៣% ខណៈដែលជម្លោះនេះបានបង្កឱ្យមានការបិទទ្វារប្រេង និងឧស្ម័នជាច្រើននៅមជ្ឈិមបូព៌ា។
ទិន្នន័យដឹកជញ្ជូនបានបង្ហាញកាលពីថ្ងៃទី១ថា យ៉ាងហោចណាស់កប៉ាល់ចំនួន ១៥០គ្រឿង រួមទាំងកប៉ាល់ដឹកប្រេង និងឧស្ម័នធម្មជាតិរាវបានទម្លាក់យុថ្កានៅក្នុងច្រកសមុទ្រ Hormuz និងដែនទឹកជុំវិញ។ លោក Jeremy Nixon នាយកប្រតិបត្តិក្រុមហ៊ុនដឹកជញ្ជូនកុងតឺន័រ Ocean Network Express បានលើកឡើងថាប្រហែល ១០% នៃកប៉ាល់កុងតឺន័ររបស់ពិភពលោក ត្រូវបានជាប់គាំងនៅលើផ្ទៃសមុទ្រ ហើយទំនិញអាចនឹងចាប់ផ្តើមកកកុញនៅកំពង់ផែ និងមជ្ឈមណ្ឌលផ្ទេរទំនិញនៅអឺរ៉ុប និងអាស៊ីក្នុងពេលឆាប់ៗនេះ។
យ៉ាងណាក៏ដោយ អ៊ីរ៉ង់បានប្រកាសហើយថា ខ្លួនបានបិទការធ្វើនាវាចរណ៍តាមរយៈផ្លូវទឹកដ៏សំខាន់នេះ ដែលជំរុញឱ្យរដ្ឋាភិបាលអាស៊ី និងក្រុមហ៊ុនចម្រាញ់ប្រេងមិនអាចឆ្លងកាត់បាន។ យោងតាមប្រព័ន្ធផ្សព្វផ្សាយអ៊ីរ៉ង់បានរាយការណ៍ថា មេបញ្ជាការកងឆ្មាំបដិវត្តន៍អ៊ីរ៉ង់នឹងបាញ់ទៅលើកប៉ាល់ណាមួយដែលព្យាយាមឆ្លងកាត់ច្រកផ្លូវសមុទ្រដ៏សំខាន់មួយនេះ។
គូសបញ្ជាក់ដែលថាថ្មីៗនេះ គេឃើញថាកប៉ាល់ដឹកប្រេងជាច្រើនត្រូវបានដាក់ជាក្រុមនៅក្នុងដែនទឹកបើកចំហរនៅឆ្នេរសមុទ្រនៃប្រទេសផលិតប្រេងធំៗនៅឈូងសមុទ្រ រួមទាំងអ៊ីរ៉ាក់ និងអារ៉ាប៊ីសាអូឌីត ក៏ដូចជាក្រុមហ៊ុនយក្ស LNG កាតា៕
