ក្រុមហ៊ុនរថយន្តប្រណីត Porsche កំពុងប្រឈមមុខទៅនឹងការកាត់បន្ថយការងារ ៤ ពាន់កន្លែងបន្ថែម

ផែនការស្ដារស្ថានការណ៍ឡើងវិញទ្រង់ទ្រាយធំរបស់ក្រុមហ៊ុន Volkswagen បានព្យាករពីការកាត់បន្ថយការងារបន្ថែមទៀតជាង ៤ ០០០ កន្លែងនៅក្រុមហ៊ុនរថយន្តប្រណីត Porsche របស់ខ្លួន បន្ទាប់ពីមានការព្រមានអំពីការធ្លាក់ចុះនៃប្រាក់ចំណេញ ដែលទាក់ទងនឹងបញ្ហានៅក្នុងក្រុមហ៊ុនបុត្រសម្ព័ន្ធផលិតឡានស្ព័រមួយនេះ។ នេះបើតាមការចុះផ្សាយពីសារព័ត៌មាន Reuters។

ជុំវិញឯកសារដែលបានកត់ត្រាអំពីកិច្ចព្រមព្រៀងថ្មីៗនេះដោយក្រុមប្រឹក្សាភិបាលត្រួតពិនិត្យរបស់ក្រុមហ៊ុន Volkswagen ដើម្បីរៀបចំការរៀបចំរចនាសម្ព័ន្ធឡើងវិញដ៏ធំបំផុតរបស់ក្រុមរថយន្តអាល្លឺម៉ង់ បានស្នើឱ្យមានការកាត់បន្ថយបុគ្គលិកប្រហែល ៤ ១០០ នាក់ នៅក្នុងក្រុមហ៊ុន Porsche ដើម្បីដោះស្រាយការចំណាយរហូតដល់ ៧០០លានអឺរ៉ូ (៨០៣,៨លានដុល្លារ)។

គួរឲ្យដឹងថាកាលពីខែកក្កដាកន្លងទៅ ផ្នែកគ្រប់គ្រងរបស់ Porsche និងតំណាងកម្មករបានយល់ព្រមលើការបញ្ឈប់បុគ្គលិកបន្ថែមចំនួន ៥ ០០០ នាក់ ផងដែរ ដោយបន្ថែមលើចំនួន ៤ ០០០ នាក់ដែលបានកំណត់ពីមុន ដែលធ្វើឱ្យវិសាលភាពនៃការកាត់បន្ថយការងារដែលបានព្រមព្រៀងគ្នានាពេលបច្ចុប្បន្ននៅក្រុមហ៊ុនផលិតរថយន្តស្ព័រដ៏ប្រណីតមួយនេះ កើនឡើងដល់ប្រហែល ១ភាគ៥ នៃចំនួនសរុប ត្រឹមឆ្នាំ២០៣៥។

ជម្រាបជូនថា កាលពីថ្ងៃសុក្រ សប្តាហ៍មុន Volkswagen ដែលជាក្រុមហ៊ុនមេ បានកែសម្រួលគោលដៅប្រាក់ចំណេញពេញមួយឆ្នាំរបស់ខ្លួន ថយចុះមកនៅត្រឹម ១% បើប្រៀបធៀបទៅនឹងគោលដៅ ៤% ទៅ ៥,៥% កាលពីមុន។ ការកែសម្រួលនេះភាគច្រើនដោយសារតែការកាត់បន្ថយតម្លៃនៅក្នុងក្រុមហ៊ុន Porsche ជាកន្លែងដែលនាយកប្រតិបត្តិលោក Michael Leiters កំពុងស្ថិតក្រោមសម្ពាធក្នុងការស្វែងរកយុទ្ធសាស្ត្រស្តារស្ថានការណ៍ឡើងវិញ បន្ទាប់ពីការដួលរលំនៃការលក់នៅក្នុងទីផ្សារប្រទេសចិន និងការផ្លាស់ប្តូរយុទ្ធសាស្ត្ររថយន្តអគ្គិសនី (EV) ដែលខាតបង់ថវិកាច្រើន៕​