រុស្ស៊ីកំពុងស្ថិតក្រោមគំនាបទណ្ឌកម្មសេដ្ឋកិច្ចពីមហាអំណាចលោកខាងលិច និងសហភាពអឺរ៉ុប បន្ទាប់ពីមហាអំណាចមួយនេះធ្វើការឈ្លានពានចូលប្រទេសជិតខាងអ៊ុយក្រែនកាលពីចុងខែកុម្ភៈកន្លងទៅ។
ថ្វីបើប្រទេសស្ទើរទូទាំងពិភពលោកកំពុងព្យាយាមបិតច្រកសេដ្ឋកិច្ចរុស្ស៊ីខ្លាំងប៉ុណ្ណាក៏ដោយ ប៉ុន្តែវាហាក់ដូចជាមិនមានឧបសគ្គជាដុំកំភួនដល់មហាអំណាចមួយនេះឡើយ ដ្បិតរុស្ស៊ីគឺជាប្រភពនាំចេញដ៏ធំបំផុតមួយលើលោក ជាពិសេសគឺប្រេង និងឧស្ម័នតែម្ដង។
យោងតាមការចុះផ្សាយពីសារព័ត៌មាន Bloomberg Economics បានឲ្យដឹងថា រុស្ស៊ីអាចទទួលបានថវិកាប្រមាណ ៨០០ លានដុល្លារក្នុងមួយថ្ងៃ ពីការនាំចេញប្រេង និងឧស្ម័ននៅឆ្នាំនេះ ដោយសារតែការឡើងថ្លៃលើមុខទំនិញប្រភេទមួយនេះ។
ការឡើងថ្លៃប្រេង និងឧស្ម័ននៅឆ្នាំនេះ គឺឡើងរហូតដល់ ៥០% និងជាចំណុចខ្ពស់បំផុតមិនធ្លាប់មានក្នុងរយៈពេល ១៣ ឆ្នាំចុងក្រោយ ហើយចំណូលពីការលក់ប្រេង និងឧស្ម័នរបស់រុស្ស៊ីអាចនឹងកើនពី ២៣៥,៦ ពាន់លានដុល្លារដល់ ២៨៥ ពាន់លានដុល្លារ ច្រើនជាងឆ្នាំទៅ ២០% ឯណោះ។ នេះបើតាមការព្យាករណ៍ពី Bloomberg។
គូសបញ្ជាក់ដែរថា ចំណូល ៨០០ លានដុល្លារ/ថ្ងៃនេះ គឺគិតតែលើវិស័យឥន្ធនៈ និងថាមពលតែមួយមុខប៉ុណ្ណោះ ខណៈរុស្ស៊ីក៏ជាអ្នកនាំចេញទំនិញកសិកម្មដូចជាស្រូវសាលី និងលោហធាតុគីមីយ៉ាងធំលើទីផ្សារអន្តរជាតិថែមទៀត។
Bloomberg Economics ក៏បានសង្កត់ធ្ងន់ដែរថា ចំណូលពីការនាំចេញវត្ថុធាតុដើមរបស់រុស្ស៊ីនៅឆ្នាំនេះអាចនឹងលើស ៣០០ ពាន់លានដុល្លារ ដែលតួលេខមួយនេះគឺប្រហាក់ប្រហែល នឹងទុនបម្រុងអន្តរជាតិរបស់រុស្ស៊ី ដែលកំពុងបង្កកទុកដោយទណ្ឌកម្មសេដ្ឋកិច្ចពិភពលោក។
សូមជម្រាបផងដែរថា បច្ចុប្បន្នសហភាពអឺរ៉ុបកំពុងដុតដៃដុតជើងខ្លាំងក្នុងការទប់ស្កាត់ការនាំចេញប្រេងរបស់រុស្ស៊ីទៅលើទីផ្សារអន្តរជាតិ ប៉ុន្តែវាមិនមែនជារឿងងាយស្រួលឡើយ ដោយសារសមាជិក EU មួយចំនួនធំសុទ្ធតែជាម៉ូយប្រេងដុំរបស់រុស្ស៊ី ហើយការផ្ដាច់សង្វាក់ផ្គត់ផ្គង់ភ្លាមៗបែបនេះ គឺមិនអាចទៅរួចឡើយ៕
