កាលពីសប្ដាហ៍មុន ក្រុមហ៊ុន SpaceX ដែលគ្រប់គ្រងដោយមហាសេដ្ឋីមានបំផុតលើលោក Elon Musk បានប្រកាសថា ពួកគេអាចនឹងផ្ដាច់សេវាអ៊ីនធឺណិតនៅអ៊ុយក្រែននាពេលណាមួយ ដោយសារមិនមានលទ្ធភាពគ្រប់គ្រាន់ក្នុងការផ្គត់ផ្គង់សេវាកម្ម Starlink បើសិនជារដ្ឋាភិបាលអាមេរិកមិនជួយបង់ថ្លៃប្រើប្រាស់។
បើទោះជាបានប្រកាសជាសាធារណៈ និងបានផ្ញើលិខិតទៅកាន់រដ្ឋាភិបាលក្ដី តែមកទល់នឹងពេលនេះ Starlink នៅមិនទាន់ទទួលបានមូលនិធិពីរដ្ឋាភិបាលអាមេរិកឡើយ។ នេះបើតាមសម្ដីរបស់មេធំ Elon Musk បានបង្ហោះនៅលើ Twitter។
គួររំលឹកដែរថា SpaceX បានត្អូញត្អែរថា ពួកគេខាតបង់ចំណូលប្រហែល ២០ លានដុល្លារ/ខែ ពីការផ្ដល់សេវាកម្មអ៊ីនធឺណិត ដល់អ៊ុយក្រែនដោយមិនទទួលបានកម្រៃអ្វីសោះ ប៉ុន្តែពួកគេនឹងនៅបន្តធ្វើវាតាមដែលអាចធ្វើទៅរួច។
សូមជម្រាបបន្ថែមថា មហាសេដ្ឋីមានបំផុតលើលោកបានបង្ហើបថា ការដែលជួយផ្គត់ផ្គង់សេវាអ៊ីនធឺណិតដល់អ៊ុយក្រែនមិនយកមួយកាក់មួយសេននេះ ក្រុមហ៊ុនបានចាយច្រើនជាង ៨០ លានដុល្លារតាំងពីសង្គ្រាមរវាងរុស្ស៊ី-អ៊ុយក្រែន មកទល់បច្ចុប្បន្ន៕
