ប្រទេសស្រីលង្កាកំពុងទទួលបានដំណឹងល្អ ទាក់ទងនឹងកញ្ចប់ជំនួយពីមូលនិធិរូបិយប័ណ្ណអន្តរជាតិ IMF ដែលមានតម្លៃប្រមាណ ២,៩ពាន់លានដុល្លារ ដោយសារទើបនឹងទទួលបានការធានាពីម្ចាស់បំណុលធំគឺប្រទេសចិន។
យោងតាមការចុះផ្សាយពី CNA បានបង្ហើបថា ប្រធានាធិបតីស្រីលង្កា Ranil Wickremesinghe នឹងបើកកិច្ចប្រជុំសភាពិសេសមួយនាថ្ងៃអង្គារ ដើម្បីពន្យល់ពីស្ថានភាពហិរញ្ញវត្ថុបច្ចុប្បន្ននៃប្រទេស និងវឌ្ឍនភាពលើការចរចាជាមួយ IMF។
“ស្រីលង្កាគឺកំពុងស្ថិតនៅកាន់តែកៀកនឹងទទួលបានដំណឹងល្អពី IMF។ កញ្ចប់ជំនួយពី IMF គឺពិតជាមានសារៈសំខាន់ណាស់ចំពោះយើង ហើយស្រីលង្កាព្យាយាមយ៉ាងខ្លាំងក្លាតាំងពីខែកញ្ញាឆ្នាំទៅ ដើម្បីអាចទទួលវាបាន”។ នេះបើតាមសម្ដីរដ្ឋមន្ត្រីហិរញ្ញវត្ថុវ័យក្មេង Shehan Semasinghe បានលើកឡើង។
សូមជម្រាបដែរថា ស្រីលង្កាទទួលបានការធានាពីចិន ដោយធនាគារកំពូលមួយគឺ Export-Import Bank of China បានសរសេរលិខិតគាំទ្រស្រីលង្កាទៅកាន់ IMF ដោយផ្ទាល់ ចំពោះកម្មវិធីរៀបចំរចនាសម្ព័ន្ធបំណុល ខណៈការធានាពីចិនគឺជាកត្តាសំខាន់បំផុត សម្រាប់ស្រីលង្កាក្នុងការទទួលបានកញ្ចប់ទឹកប្រាក់ជិត ៣ពាន់លានដុល្លារនេះ៕
