ប្រធានគ្រប់គ្រងមូលនិធិរូបិយវត្ថុអន្តរជាតិ (IMF) លោកស្រី Kristalina Georgieva នឹងធ្វើដំណើរទស្សនកិច្ចទៅកាន់ប្រទេសចិនពីថ្ងៃទី ២៤ ដល់ថ្ងៃទី ៣០មីនា។ នេះបើតាមការទម្លាយឲ្យដឹងពី IMF ប្រាប់ទៅកាន់ Reuters កាលពីថ្ងៃសុក្រ។
លោកស្រីនឹងបើកការថ្លែងសន្ទរកថាសំខាន់នៅវេទិកាអភិវឌ្ឍន៍ចិន CDF នៅថ្ងៃទី ២៦ មីនាក្នុងទីក្រុងប៉េកាំង និងនៅថ្ងៃទី ៣០ មីនា នឹងឡើងនិយាយនៅវេទិកា Boao សម្រាប់កិច្ចប្រជុំប្រចាំឆ្នាំអាស៊ី ធ្វើឡើងនៅទីក្រុង Qionghai ខេត្តហៃណាន។
ក្រៅពីការចូលរួមវេទិកាធំៗទាំង២ខាងលើ មេធំ IMF ក៏នឹងអាចលេចវត្តមាននៅកម្មវិធីតូចៗផ្សេង និងកិច្ចប្រជុំទ្វេភាគីមួយចំនួន អំឡុងពេលលោកស្រីស្នាក់នៅប្រទេសចិនផងដែរ។
សូមជម្រាបដែរថា លោកស្រី Georgieva តែងតែដាក់សំពាធលើចិន ជុំវិញសកម្មភាពជួយដោះស្រាយបញ្ហាបំណុលប្រទេសក្រីក្រ ជាពិសេសប្រទេសដែលជាប់បំណុលចិន ហើយជាលទ្ធផលរដ្ឋាភិបាលក្រុងប៉េកាំងបានយល់ព្រមចេញមុខធានា ដល់ប្រទេសស្រីលង្កា សម្រាប់កញ្ចប់ជំនួយពី IMF តម្លៃជិត ៣ពាន់លានដុល្លារ៕
