លោកឧកញ៉ា សំ សុខនឿន ប្រធានសមាគមអចលនទ្រព្យសកល និងជាប្រធានក្រុមហ៊ុន Sam SN Realty យល់ឃើញថា បើចង់មានឱកាសចំណេញបានច្រើន គឺត្រូវវិនិយោគលើដីធ្លីជាយក្រុង ប៉ុន្តែអាចត្រូវរង់ចាំរយៈពេលពីធម្យមទៅរយៈពេលយូរ ចន្លោះពី៣ទៅ១០ឆ្នាំ។
លោកឧកញ៉ា បានលើកឡើងលើបណ្តាញសង្គមហ្វេសប៊ុក កាលពីថ្ងៃអាទិត្យម្សិលមិញ យ៉ាងដូច្នេះថា ទស្សនៈអ្នកជំនួញខ្លះយល់ឃើញថា ការវិនិយោគដីធ្លីគឺកប់លុយចោលយូរ ដូច្នេះពួកគេមិនទិញដីជាយក្រុងចោលយូរទេ។ ទស្សនៈខ្លះ យល់ឃើញថា ពេលនេះមិនគួរវិនិយោគលើដីធ្លីទេ ព្រោះសេដ្ឋកិច្ចមិនល្អ អចលនទ្រព្យធ្លាក់ចុះ។ រីឯទស្សនៈខ្លះទៀត យល់ឃើញថា មិនគួរទិញដីធ្លីទេ ក្នុងពេលពិភពលោកកំពុងប្រឈមនឹងសេដ្ឋកិច្ចមិនសូវល្អ។
ទោះយ៉ាងណា សម្រាប់ទស្សនៈលោកឧកញ៉ាវិញ នៅតែយល់ឃើញថា ការវិនិយោគដីធ្លីជាយក្រុង ជាការល្អ អាចទទួលបានផលចំណេញច្រើន នាពេលអនាគត ទោះបីសេដ្ឋកិច្ចនាពេលបច្ចុប្បន្នប្រែប្រួលយ៉ាងណាក្តី។ លោកឧកញ៉ា លើកឡើងថា ទី១ សម្រាប់លោកយល់ឃើញថា ចំពោះបងប្អូនវិនិយោគដីជាយក្រុងភ្នំពេញ ដែលជាទូទៅ បើទោះបីសេដ្ឋកិច្ចល្អក្តី មិនល្អក្តី ក៏អ្នកវិនិយោគដីជាយក្រុងតែងរង់ចាំចន្លោះពី៥ឆ្នាំទៅ ១០ឆ្នាំ ដដែល ដូច្នេះបើយើងមានលុយ ដែលមិនប្រើប្រាស់ប្រចាំថ្ងៃ គួរបន្តទិញដី ព្រោះការវិនិយោគនេះ នៅតែចាំដដែល តាមការរំពឹកទុកដូចធម្មតា។
ទី២ តាមបទពិសោធន៍នៃការវិនិយោគជាក់ស្តែងរបស់លោកឧកញ៉ា បើអ្នកវិនិយោគដីជាយក្រុងណា វិនិយោគហើយ មិនអាចចាំបាន នោះការវិនិយោគនោះនឹងមិនមានការចំណេញជាទីគាប់ចិត្តទេ ព្រោះការអភិវឌ្ឍន៍មិនទាន់មាន ធ្វើឱ្យដីជាយក្រុងនោះមិនទាន់ឡើងថ្លៃ។
ទី៣ កម្ពុជាជាប្រទេសកំពុងមានការអភិវឌ្ឍន៍យ៉ាងលឿន ជាពិសេសការពង្រីកក្រុង និងហេដ្ឋារចនាសម្ព័ន្ធផ្លូវ ដែលធ្វើឱ្យផលចំណេញពីការវិនិយោគដីធ្លី អាចកើនដល់ ១០០០% ឬចំណេញបាន ១០ដងក្នុងអំឡុងពេលពីចន្លោះពី ៣ ឆ្នាំទៅ១០ឆ្នាំ។ ឧទាហរណ៍៖ យើងយកលុយ ១០ម៉ឺនដុល្លារ ទិញដី១ហិកតាជាយក្រុង ក្បែរព្រលានយន្តហោះថ្មី នោះប្រហែល៧ឆ្នាំក្រោយមក យើងលក់បានតម្លៃ ១លានដុល្លារ ដែលស្មើនឹង ១០០០% ឬចំណេញ ១០ដង។ ដូច្នេះជារួមមក ទស្សនៈរបស់លោកឧកញ៉ា យល់ឃើញថា ចង់មានឱកាសចំណេញបានច្រើន គឺត្រូវវិនិយោគលើដីធ្លីជាយក្រុង។
លោកឧកញ៉ា សំ សុខនឿន ធ្លាប់បានលើកឡើងពីមុនផងដែរថា ជាការពិត ការវិនិយោគលើអចលនទ្រព្យ លើប្រភេទណាក៏ដោយ ក៏មានផលល្អ និងបានផលចំណេញផងដែរ តែគ្រាន់តែផលចំណេញពីការវិនិយោគខ្លះ មានការចំណាយពេលយូរ ឬឆាប់រហ័ស តិច ឬច្រើនតែប៉ុណ្ណោះ។
សូមជម្រាបថា ឧកញ៉ា សំ សុខនឿន បច្ចុប្បន្នជាអ្នកជំនាញផ្នែកអចលនវត្ថុនៅកម្ពុជា និងជាអគ្គនាយកក្រុមហ៊ុន Kw Sam Sn Realty Co., Ltd រួមទាំងជាប្រធានសមាគមអចលនទ្រព្យសកល។ បច្ចុប្បន្ន លោកកំពុងដឹកនាំ ក្រុមហ៊ុនជាបុត្រសម្ព័ន្ធ និងតំណាងក្រុមហ៊ុនរបស់លោកនៅតាមបណ្ដារាជធានី ខេត្ត-ក្រុង ប្រកបដោយវឌ្ឍនភាព លើការផ្ដល់គ្រប់សេវាកម្មអភិវឌ្ឍអចលនវត្ថុក្នុងទីផ្សារកម្ពុជា៕
