ព្រលានយន្តហោះអន្តរជាតិតេជោតាខ្មៅ ក្រោមការសាងសង់របស់ក្រុមហ៊ុន Cambodia Airport Investment Co., Ltd ហៅកាត់ថា CAIC ដែលមានទុនវិនិយោគប្រមាណ ១៥០០ លានដុល្លារ ពីការវិនិយោគរួមគ្នារវាងក្រុមហ៊ុនវិនិយោគទុនអាណិកជនកម្ពុជា (OCIC) របស់អ្នកឧកញ៉ា ពុង ឃាវសែ និងរដ្ឋាភិបាលកម្ពុជា បានសម្រេចការសាងសង់ប្រមាណជាង ៥០ភាគរយហើយ។
លោក បេងហុង សុជាតិ ខេមរ៉ូ អគ្គនាយកនៃអគ្គនាយកដ្ឋានរៀបចំដែនដី និងនគរូបនីយកម្ម និងជាប្រធានក្រុមការងារគាំទ្រដល់ការងាររៀបចំទីតាំងគម្រោងសាងសង់អាកាសយានដ្ឋានអន្ដរជាតិភ្នំពេញថ្មី បានដឹកនាំក្រុមការងារចុះពិនិត្យវឌ្ឍនភាពការងារការដ្ឋានសាងសង់អាកាសយានដ្ឋានអន្តរជាតិតេជោតាខ្មៅ កាលពីថ្ងៃទី០២ ខែកញ្ញា ឆ្នាំ២០២៣នេះ ហើយលោកបានឱ្យដឹងថា គិតមកទល់បច្ចុប្បន្ននេះ ការសាងសង់ជារួមសម្រេចបានប្រមាណ ៥១ភាគរយ។
សូមជម្រាបថា គម្រោងសាងសង់ព្រលានយន្តហោះអន្តរជាតិតេជោតាខ្មៅ នៅលើផ្ទៃដីទំហំ ២៦០០ ហិកតា បានបើកដំណើរការងារសាងសង់ ចាប់ពីថ្ងៃទី០៧ ខែមករា ឆ្នាំ២០២០។ តាមការឲ្យដឹងពី ក្រុមហ៊ុន CAIC ព្រលានយន្តហោះអន្តរជាតិថ្មីនេះ គ្រោងនឹងបញ្ចប់ដំណាក់កាលទី១ នៅឆ្នាំ ២០២៤ និងគ្រោងបើកឱ្យដំណើរការនៅឆ្នាំ២០២៥ បើគ្មានការប្រែប្រួល។
ព្រលានយន្តហោះអន្តរជាតិតេជោតាខ្មៅ នឹងក្លាយជាព្រលានយន្តហោះកម្រិត 4F ដែលមានលទ្ធភាពឱ្យយន្តហោះខ្នាតធំៗឆ្លងទ្វីបអាចចុះចតបាន និងមានចំណតយន្តហោះចំនួន ៣២ចំណត អាចទទួលអ្នកដំណើរបានពី ១៣លាន ទៅ១៥លាននាក់ ក្នុងមួយឆ្នាំ៕
