ក្នុងដំណើរទស្សនកិច្ចលក្ខណៈគ្រួសារនៅទឹកដីប្រទេសជប៉ុន លោកឧកញ៉ា នួន រិទ្ធី អគ្គនាយកក្រុមហ៊ុន KFA Group បានឆ្លៀតចែករំលែកគន្លឹះ ៦ចំណុច អំពីការសន្សំបុណ្យ ដើម្បីចូលរួមកសាងអំពើល្អក្នុងគ្រួសារ សហគមន៍ និងប្រទេសជាតិ។
លោកឧកញ៉ាស្ថាបនិកបុរី កៀនស្វាយផាក បានលើកឡើងនៅបណ្តាញសង្គម កាលពីថ្ងៃពុធម្សិលមិញថា បើទោះបីនៅទីណាក៏ដោយ ក៏លោកតែងមានសទ្ធារជ្រះថ្លាភ្ជាប់និស្ស័យទៅនិងព្រះពុទ្ធសាសនា ខណៈដែលពេលនេះ លោកនិងភរិយាបានចូលជាបច្ច័យកសាងក្បឿង១សន្លឹក សម្រាប់ទុកជួសជុលមហាព្រះវិហ៊ាព្រះអង្គធំ Nara Japan។
ឧកញ៉ា នួន រិទ្ធី បានបន្តថា ជាការចែករំលែករបស់លោកក្នុងការសន្សំបុណ្យ មានជាចំណុចខ្លះៗដូចខាងក្រោម៖
១.ប្រកាន់នូវចិត្តមេត្តា និងសន្តោសប្រណីដ៏សានុជនទាំងពួងក្នុងផ្លូវល្អដោយកាយវាចានិងចិត្ត។
២.ការសន្សំបុណ្យតិចឬច្រើនតាមសទ្ធាជ្រះថ្លាគ្រប់រូបភាព ការសាងអំពើល្អចំពោះសង្គមគ្រួសារ សហគមន៍យើង សាសនាយើង ប្រទេសយើង ដោយការជួយឧប្ថមជាបច្ច័យក្តីដោយកំលាំងក្តី។
៣.ការកសាងបុណ្យយើងពុំចាំបាច់រង់ចាំពេលនេះពេលនោះទេ ជួបប្រទះអ្វីដែលបានផុសចេញពីចិត្តនិងជ្រះថ្លា ហើយចូរធ្វើបុណ្យដាក់ទានតិចឬច្រើន បុណ្យទាំងឡាយណានោះនឹងទៅរង់ចាំយើងមុនបាត់ទៅហើយ។
៤.ទម្លាប់ធ្វើបុណ្យនិងដាក់ទានជារឿយៗដោយសទ្ធា និងដោយមិនទាមទារផលតបស្នង។
៥.ជួយផ្តល់ដំបូន្មានល្អៗ និងជួយផ្តល់យោបល់ល្អ លើកទឹកចិត្តដ៏មនាលជនទាំងឡាយខ្វះនូវបញ្ញា ដើម្បីបើកនូវទិព្វបញ្ញារបស់ពួកគាត់អោយភ្លឺស្វាងឡើង ដើម្បីដោះស្រាយបញ្ហាដែលបានកើតឡើងក្នុងតែមួយកណៈចិត្តនោះ។
៦.សម្រាប់លោកធ្វើបុណ្យមួយទៀត គឺព្យាយាមញញឹមដាក់មនុស្សគ្រប់រូបដែលលោកបានជួប។
សូមជម្រាបថា លោកឧកញ៉ា នួន រិទ្ធី ជាបុគ្គលម្នាក់ ដែលកើតក្នុងត្រកូលគ្រួសារក្រីក្រតែខំប្រឹងប្រែងតស៊ូ ដោយធ្លាប់ធ្វើជាកម្មករសំណង់ និងលក់កាសែត កាលជាង២០ឆ្នាំមុន ដើម្បីយកលុយទៅរៀនបន្ត រហូតទទួលបានផ្លែផ្កាក្លាយជាឧកញ៉ាដូចសព្វថ្ងៃនេះ។ នៅឆ្នាំ២០១៥ លោកបានបើកក្រុមហ៊ុនអចលនទ្រព្យ Khmer Foundation Appraisal ទិញលក់ និងបម្រើសេវាកម្មលើផ្នែកអចលនវត្ថុផ្សេងៗ ហើយលោកឧកញ៉ាក៏ជាម្ចាស់ បុរី កៀនស្វាយផាក ផងដែរ៕
