នារសៀលថ្ងៃទី៩ ខែកុម្ភៈ ឆ្នាំ២០២៦ នៅសណ្ឋាគារ ហ្វ៊ែរហ្វៀល បាយម៉ារៀត សហព័ន្ធស្រូវអង្ករកម្ពុជា បានរៀបចំនូវកិច្ចប្រជុំក្រុមប្រឹក្សាភិបាលអាណត្តិទី៥ លើកទី២ ដែលប្រព្រឹត្តទៅក្រោមអធិបតីភាព ឧកញ៉ា ចាន់ សុឃាំង ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា និងឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា ដោយមានការចូលរួមពីសមាជិក សមាជិកាក្រុមប្រឹក្សាភិបាល ដើម្បីជជែកពិភាក្សា ផ្លាស់ប្ដូរយោបល់ និងអនុម័តលើរបៀបវារៈមួយចំនួន។
កិច្ចប្រជុំនេះ ត្រូវបានប្រព្រឹត្តទៅតាមរបៀបវារៈដូចជា៖ ១).ពិនិត្យមើលរបាយការណ៍កិច្ចប្រជុំលើកទី១ អាណត្តិទី៥, ២).ពិនិត្យមើលលើរបាយការណ៍វឌ្ឍនភាពឆមាសទី៤ ឆ្នាំ២០២៥, ៣).ពិនិត្យ និងផ្ដល់យោបល់លើគម្រោងឥណទានឡសម្ងួត និងឃ្លាំងដល់រោងម៉ាស៊ីន, ៤).ពិនិត្យ និងផ្ដល់យោបល់លើគម្រោងកិច្ចសន្យាកសិកម្ម និងការផ្សារភ្ជាប់កសិករ និងរោងម៉ាស៊ីនកិនស្រូវ និង៥).ពិនិត្យ និងផ្ដល់យោបល់លើគម្រោងផ្នែកទីផ្សារ និងការនាំចេញ។
ជាលទ្ធផល អង្គប្រជុំទាំងមូលបានសម្រេច និងអនុម័តទៅលើរបៀបវារៈទាំង ៥ ដោយទទួលបានសម្លេងបោះឆ្នោតមួយរយភាគរយ នៃវត្តមានរបស់សមាជិកក្រុមប្រឹក្សាភិបាលទាំងអស់ដែលបានអញ្ជើញចូលរួម។ ឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា បានថ្លែងអំណរគុណទៅកាន់សមាជិកក្រុមប្រឹក្សាភិបាលទាំងអស់ ដែលបានចូលរួមពិភាក្សា និងផ្ដល់ធាតុចូលមកកាន់កិច្ចប្រជុំ។ លើសពីនេះ លោកឧកញ៉ាប្រធាន សង្ឃឹមថាការរួមគ្នាក្នុងអាណត្តិថ្មីនេះ នឹងបន្តនាំយកមកនូវលទ្ធផលល្អ ក្នុងការអភិវឌ្ឍវិស័យស្រូវអង្ករកម្ពុជាឱ្យកាន់តែល្អប្រសើរឡើងថែមទៀត៕
