ដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក លោកអ្នកឧកញ៉ា ទ្រី ភាព អគ្គនាយកក្រុមហ៊ុន ទ្រី ភាព គ្រុប និងលោកជំទាវ អ្នកឧកញ៉ា គៀន ស្រីនាង បានឧបត្ថម្ភថវិកាចំនួន ៧,០០០ (ប្រាំពីរពាន់) ដុល្លារអាម៉េរិក ដល់រដ្ឋបាលស្រុកវាលវែង ដើម្បីគាំទ្រដល់ទូក ង ឈ្មោះ “ទ្រី ភាព សែនជ័យបារមី លោកតាគ្រី” ដែលនឹងត្រូវចូលរួមព្រឹត្តិការណ៍ប្រណាំងទូក ង ថ្នាក់ខេត្ត នាថ្ងៃទី៧ និងថ្ងៃទី៨ ខែវិច្ឆិកា ឆ្នាំ២០២៦។
ក្រុមហ៊ុន ទ្រី ភាព គ្រុប បានបញ្ជាក់ថា តាមរយៈការចូលរួមក្នុងព្រឹត្តិការណ៍ប្រណាំងទូកនេះ មិនត្រឹមតែជាការរួមចំណែកយ៉ាងសំខាន់ក្នុងការថែរក្សា ការពារ និងអភិរក្សមរតកវប្បធម៌ប្រពៃណីជាតិប៉ុណ្ណោះទេ ប៉ុន្តែក៏ជាការបង្កើតនូវផ្ទាំងទស្សនីយភាពដ៏សប្បាយរីករាយ ដើម្បីញ៉ាំងបរិយាកាសជូនបងប្អូនប្រជាពលរដ្ឋក្នុងខេត្តពោធិ៍សាត់ បានកម្សាន្តសប្បាយផងដែរ។
សូមជម្រាបជូនផងដែរថា កាលឆ្នាំ២០២៤ លោកអ្នកឧកញ៉ា ទ្រី ភាព និងអ្នកឧកញ៉ា គៀន ស្រីនាង បានចំណាយថវិកាសរុប ៤៤០លានរៀល ដើម្បីឧបត្ថម្ភទូកងចំនួន ៣ ចូលរួមព្រឹត្តិការណ៍ប្រណាំងទូក ង ថ្នាក់ជាតិ ក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ។ ទូកងទាំង ៣ ដែលទទួលបានការឧបត្ថម្ភ រួមមាន៖ ទូកង ឈ្មោះ “ទ្រីភាពឧត្តមសែនជ័យបារមីទេពី” មកពីខេត្តកំពង់ឆ្នាំង, ទូកង ឈ្មោះ “ទ្រីភាពសែនជ័យបារមីតេជោ” មកពីខេត្តកណ្ដាល និងទូកង ឈ្មោះ “រាំងទិលសាគរសែនមានជ័យបារមីវត្តកញ្ជរខាងត្បូង” មកពីខេត្តពោធិ៍សាត់៕
