អ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា នៅថ្ងៃទី២៥ ខែមេសា ឆ្នាំ២០២២នេះ សម្រេចតែងតាំង អ្នកឧកញ៉ា លាង ឃុន អគ្គនាយកសម្ព័ន្ធក្រុមហ៊ុន ជីបម៉ុង គ្រុប ជាឧត្តមទីប្រឹក្សាសមាគមអ្នកអភិវឌ្ឍន៍លំនៅឋានកម្ពុជា។
ជីបម៉ុង គ្រុប បាននិងកំពុងពង្រីកវិសាលភាពរបស់ខ្លួនកាន់តែខ្លាំងឡើងៗ នៅក្នុងពិភពជំនួញនៅកម្ពុជា ក្រុមហ៊ុន ជីបម៉ុង ដែលកំពុងក្តោបក្តាប់សេដ្ឋកិច្ចកម្ពុជា។ ការចាត់ចំណាត់ថ្នាក់នេះគឺផ្អែកទៅលើសកម្មភាពវិនិយោគ និងការអភិវឌ្ឍន៍យ៉ាងខ្លាំងខ្លារបស់ក្រុមហ៊ុននៅប៉ុន្មានឆ្នាំចុងក្រោយនេះ។ ភាពជោគជ័យទាំងនេះក៏គេមិនអាចមើលរំលងបានឡើយនូវសហគ្រិនឆ្នើមម្នាក់ គឺអ្នកឧកញ៉ា លាង ឃុន។
អ្នកឧកញ៉ា លាង ឃុន គឺជាពាណិជ្ជករម្នាក់ពោរពេញដោយសមត្ថភាពក្នុងការគៀងគរវិនិយោគិនបរទេសឲ្យមកបណ្តាក់ទុនរកស៊ីនៅកម្ពុជា តាមរយៈក្រុមហ៊ុន ជីប ម៉ុង គ្រុប ដែលបាននឹងកំពុងវិនិយោគលើពហុវិស័យ ដូចជា៖ បុរី គ្រឿងសំណង់ ភេសជ្ជៈ ធនាគារ សណ្ឋាគារ ជាដើម។
អ្នកឧកញ៉ា លាង ឃុន គឺជាកូនប្រុសច្បងមហាសេដ្ឋីល្បីឈ្មោះរាប់ទសវត្សរ៍ លោកជំទាវអ្នកឧកញ៉ា ភាព ហៀក ជាប្រធានក្រុមប្រឹក្សាភិបាលក្រុមហ៊ុន ជីប ម៉ុង គ្រុប។ លោកត្រូវបានព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ ត្រាស់បង្គាប់ផ្តល់គោរមងារអ្នកឧកញ៉ា ជាមួយម្តាយរបស់លោកគឺលោកជំទាវ ភាព ហៀក និងប្អូនប្រុសម្នាក់ទៀត ឧកញ៉ា លាង ម៉េង ជាស្ថាបនិក និងសហស្ថាបនិកក្រុមហ៊ុន ជីប ម៉ុង។
ប្រធានអគ្គនាយកក្រុមហ៊ុន ជីប ម៉ុង រូបនេះ ក៏ជាអ្នកនៅពីក្រោយភាពជោគជ័យ និងការរីកចម្រើនដ៏អស្ចារ្យ ដែលជាក្រុមហ៊ុនវិនិយោគដោយខ្មែរសុទ្ធសាធមួយនេះ គឺកំពុងមានឥទិ្ធពលបង្កើតក្រុមហ៊ុនធំៗប្រមាណ១២ និងមានក្រុមហ៊ុន រោងចក្រ ជាបុត្រសម្ព័ន្ធជាច្រើនទៀត។
ក្រុមហ៊ុននេះ ក៏មានដៃគូទំនាក់ទំនងពាណិជ្ជកម្មនៅទូទាំងពិភពលោក ដូចជា ទ្វីបអាមេរិក ទ្វីបអឺរ៉ុប និងទ្វីបអាស៊ី ដែលគ្រងទ្រព្យសម្បត្តិប្រមាណ រាប់ពាន់លានដុល្លារសហរដ្ឋអាមេរិក៕
