កម្ពុជា-វៀតណាម បានឯកភាពគ្នាបើកដំណើរការជើងហោះហើរត្រង់ពីរដ្ឋធានីហាណូយ មកកាន់ខេត្តសៀមរាប។ពិធីប្រកាសជាផ្លូវការ ត្រូវបានប្រារព្ធធ្វើឡើងនៅក្នុងវេទិកាជំរុញពាណិជ្ជកម្ម និងវិនិយោគកម្ពុជា-វៀតណាម ឆ្នាំ២០២៣ នៅរដ្ឋធានីហាណូយ សាធារណរដ្ឋសង្គមនិយមវៀតណាម នារសៀលថ្ងៃចន្ទ ទី១២ ខែធ្នូ ឆ្នាំ២០២៣ ក្រោមវត្តមាននាយករដ្ឋមន្រ្តីនៃប្រទេសទាំងពីរ។
លើទំព័រហ្វេសប៊ុកសម្តេចធិបតី ហ៊ុន ម៉ាណែត នាយករដ្ឋមន្រ្តីបានគូសបញ្ជាក់ថា តាមរយៈការបើកឱ្យមានជើងហោះហើរត្រង់នេះ គឺនឹងផ្តល់អត្ថប្រយោជន៍ជាច្រើន តាមរយៈការទាក់ទាញភ្ញៀវទេសចរពីប្រទេសវៀតណាម និងលំហូរនៃធុរជន និងវិនិយោគិន ក៏ដូចជាការសម្រួលដល់មធ្យោយបាយធ្វើដំណើរ និងការដឹកជញ្ជូនជាដើម ។ល។
ក្នុងរបាយការណ៍របស់ខ្លួន ចេញផ្សាយការកន្លងទៅក្រសួងទេសចរណ៍បានឲ្យដឹងថា ក្នុងឆមាសទី ១ ឆ្នាំ ២០២៣ កម្ពុជាទទួលបានភ្ញៀវទេសចរអន្តរជាតិប្រមាណ ២ លាន ៥ សែននាក់ ក្នុងចំណោមភ្ញៀវទេសចរផ្ទៃក្នុងសរុប ប្រមាណជាង ១២ លាននាក់។
បើតាមរបាយការណ៍ ក្នុងចំណោមភ្ញៀវទេសចរអន្តរជាតិដែលបានចូលមកទស្សនាកម្ពុជាមានចំនួនជាង ២ លាន ៥ សែននាក់ នោះគឺធ្វើដំណើរមកតាមផ្លូវអាកាសមានចំនួន ៩១ ម៉ឺននាក់ ផ្លូវគោកមានចំនួនជាង ១ លាន ៦ សែននាក់ និងផ្លូវទឹកមានចំនួន ៣ ម៉ឺននាក់ ដូចជាមកពីប្រទេសថៃ វៀតណាម ចិន ឡាវ សហរដ្ឋអាមេរិក កូរ៉េខាងត្បូង ឥណ្ឌូនេស៊ី បារាំង ចក្រភពអង់គ្លេស ម៉ាឡេស៊ី និងអូស្ត្រាលីជាដើម ដូច្នេះ នៅឆ្នាំ ២០២៣ នេះ កម្ពុជា អាចនឹងទទួលបានភ្ញៀវទេសចរអន្តរជាតិប្រមាណ ៥ លាននាក់ កើនឡើង ១២០ ភាគរយធៀបនឹងឆ្នាំ ២០២២ កន្លងទៅ៕
