ក្នុងរយៈពេល៥ឆ្នាំចុងក្រោយនេះ ក្រសួងប្រៃសណីយ៍ និងទូរគមនាគមន៍ បានផ្ដល់អាជ្ញាបណ្ណប្រតិបត្តិការទូរគមនាគមន៍សរុបចំនួន៥៩ ក្នុងនោះអាជ្ញាបណ្ណទូរសព្ទចំនួន៤អាជ្ញាបណ្ណ ខ្សែកាបអុបទិកក្រោមបាតសមុទ្រ( submarine fiber optic cables) ចំនួន២ អាជ្ញាបណ្ណ ខ្សែកាបអុបទិកលើគោកចំនួន៥ និងអ៊ីនធើណេតចំនួន៣៩។
លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ ធ្លាប់បានបញ្ជាក់ឱ្យដឹងកាលពីដើមខែកុម្ភៈ ឆ្នាំ២០២៥ថា គិតត្រឹមឆ្នាំ២០២៤ អ្នកប្រើប្រាស់សេវាទូរសព្ទមានប្រមាណ ២០,៦លាន និងសេវាអ៊ីនធឺណិតចំនួន ១៩លាន ។
លោកបន្តថា ដើម្បីជំរុញ និងសម្រួលដល់ការប្រើប្រាស់កាន់តែងាយស្រួល និងលឿនរហ័ស ក្រសួងប្រៃសណីយ៍ និងទូរគមនាគមន៍ ក៏បានជំរុញការអភិវឌ្ឍហេដ្ឋារចនាសម្ព័ន្ធតភ្ជាប់ឌីជីថល រួមមាន បង្គោលអង់តែនទូរសព្ទ បណ្ដាញខ្សែកាបអុបទិកក្រោមបាតសមុទ្រ និងលើគោក ។
សូមបញ្ជាក់ថា ក្នុងរយៈពេលប៉ុន្មានឆ្នាំមកនេះ ក្រសួងប្រៃសណីយ៍ និងទូរគមនាគមន៍ បានសាងសង់បង្គោលអង់តែនទូរសព្ទសរុប ១១៥១១បង្គោល ហើយក្រសួងមានផែនការជំរុញសាងសង់បង្គោលអង់តែនទូរសព្ទបន្ថែមចំនួន ៣ ៦៧៤ ដែលមានចំនួនស្ថានីយ៍អង់តែនសរុប ៦ ៣៥៥ ត្រឹមឆ្នាំ២០២៧។
គួរឱ្យដឹងផងដែរថា ដោយសារគិតមកដល់ពេលនេះកម្ពុជាមានសមត្ថភាពផ្គត់ផ្គង់សេវាអ៊ីនធឺណិតគ្រប់គ្រាន់ដោយខ្លួនឯង ជាមួយគ្នានេះក្រុមហ៊ុនបណ្តាញខ្សែកាបអុបទិក ឬប្រតិបត្តិករអ៊ីនធឺណិតទាំងអស់នៅកម្ពុជា នឹងបញ្ចប់ការទិញអ៊ីនធឺណិត (Internet Banwidth) ពីប្រទេសថៃហើយ ចាប់ពីថ្ងៃទី១៣ ខែមិថុនា ឆ្នាំ២០២៥នេះ។
លោក ជា វ៉ាន់ដេត បញ្ជាក់ថា នេះដោយសារការគម្រាមកំហែងរបស់ភាគីថៃក្នុងការកាត់ផ្ដាច់ការផ្គត់ផ្គង់សេវាអ៊ីនធឺណិតដល់កម្ពុជា ប្រតិបត្តិករទូរគមនាគមន៍ទាំងអស់របស់កម្ពុជាបានឈប់ប្រើប្រាស់ប្រភពអ៊ីនធឺណិតពីប្រទេសថៃ ដែលនឹងធ្វើឱ្យប្រទេសថៃអាចខាតបង់ចំណូលរាប់រយលានដុល្លារ។ លទ្ធផលនេះ គឺកើតឡើងដោយសារការគម្រាមកំហែងរបស់ភាគីថៃមកលើកម្ពុជា៕
