ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា កាលពីរាត្រីថ្ងៃទី១១ ខែកុម្ភៈ ឆ្នាំ២០២៦ បានអញ្ជើញជាតំណាងរាជរដ្ឋាភិបាល ចូលរួមថ្លែងសុន្ទរកថា ក្នុងពិធីអបអរសាទរព្រះរាជពិធីចម្រើនព្រះជន្មព្រះករុណា ព្រះចៅអធិរាជជប៉ុន និងបុណ្យជាតិជប៉ុន ដែលប្រារព្ធឡើងនៅនិវេសនដ្ឋានឯកឧត្តមឯកអគ្គរដ្ឋទូតជប៉ុនប្រចាំកម្ពុជា។
ការចូលរួមគ្នា គឺធ្វើឡើងតបតាមការអញ្ជើញរបស់ លោក អ៊ូអេណូ អាតស៊ុស៊ី (H.E. UENO Atsushi) ឯកអគ្គរដ្ឋទូតជប៉ុនប្រចាំព្រះរាជាណាចក្រកម្ពុជា។
ថ្លែងក្នុងឱកាសនោះ ឯកឧត្តមឧបនាយករដ្ឋមន្ត្រី បានលើកឡើងអំពីតួនាទីសំខាន់របស់ប្រទេសជប៉ុន ក្នុងដំណើរការស្តារនិងកសាងឡើងវិញនូវសន្តិភាពនៅកម្ពុជា ព្រមទាំងការគាំទ្រលើវិស័យជាច្រើន ដើម្បីជំរុញការអភិវឌ្ឍសង្គម និងសេដ្ឋកិច្ចកម្ពុជា។
ជាថ្មីម្តងទៀត ក្នុងនាមរាជរដ្ឋាភិបាលកម្ពុជា ឯកឧត្តមឧបនាយករដ្ឋមន្ត្រី ស៊ុន ចាន់ថុល ក៏បានថ្លែងអំណរគុណចំពោះការគាំទ្រដ៏សំខាន់របស់ជប៉ុន និងបានប្តេជ្ញាជំរុញទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ឱ្យកាន់តែរឹងមាំ និងមានប្រសិទ្ធភាពថែមទៀត៕ អត្ថបទ៖ហ្សាលីន
