ស្ថាប័នធំៗពីរ គឺ អង្គការមូលនិធិរ៉ូតថារី នៅកម្ពុជា(Rotary Foundation Organisation in Cambodia) និងសភាពាណិជ្ជកម្មកូរ៉េ នៅកម្ពុជា (KOCHAM) បានផ្សារភ្ជាប់ទំនាក់ទំនងជាដៃគូតាមរយៈការ ចុះហត្ថលេខាលើអនុស្សរណៈនៃការយោគយល់គ្នា(MOU) កាលពីថ្ងៃទី៣ ខែកក្កដា ឆ្នាំ២០២៦ នៅ សណ្ឋាគារ Shangri-La ក្នុងរាជធានីភ្នំពេញ។ កិច្ចព្រមព្រៀងនេះ ធ្វើឡើងក្នុងស្មារតីជំរុញកិច្ចសហ-ប្រតិបត្តិការ និងពង្រឹងមិត្តភាពរវាងភាគីទាំងសងខាង។
តំណាងឱ្យភាគីទាំងពីរក្នុងការដាក់ហត្ថលេខាមានវត្តមាន អ្នកឧកញ៉ា អុឹង លីហេង ប្រធានអង្គការមូលនិធិ រ៉ូតថារី នៅកម្ពុជា ដែលជាអង្គការក្រៅរាជរដ្ឋាភិបាល (NGO) បានចុះបញ្ជីនៅក្រសួងមហាផ្ទៃ ជាមួយ លោក គីម ស្យុងស៊ូ (Kim Seong-su) ប្រធានសភាពាណិជ្ជកម្មកូរ៉េ នៅកម្ពុជា។
អ្នកឧកញ៉ា អុឹង លីហេង មានប្រសាសន៍ថា៖ ស្របតាមខ្លឹមសារនៃអនុស្សរណៈ ភាគីទាំងពីរនឹងសហការគ្នាយ៉ាងជិតស្និទ្ធ ក្នុងការផ្លាស់ប្តូរព័ត៌មាន និងធនធាន ដើម្បីផលប្រយោជន៍រួមដោយផ្តោតការយកចិត្តទុកដាក់ស្របតាមវិស័យអាទិភាពទាំង៧ របស់រ៉ូតថារី ពោលគឺ ការកសាងសន្តិភាព ការទប់ស្កាត់ជំងឺ អនាម័យ និងទឹកស្អាតសុខភាពមាតា និងទារក ការលើកកម្ពស់វិស័យអប់រំ ការជំរុញសេដ្ឋកិច្ចមូលដ្ឋាន និងការថែរក្សាបរិស្ថាន។
អ្នកឧកញ៉ា ប្រធានអង្គការមូលនិធិ រ៉ូតថារី នៅកម្ពុជា បន្ថែមថា៖ តាមការរំពឹងទុក កិច្ចសហការថ្មីនេះ នឹងក្លាយជាស្ពានតភ្ជាប់រវាងសហគមន៍អាជីវកម្ម និងសង្គមកូរ៉េ-កម្ពុជា ព្រមទាំងបើកផ្លូវឱ្យមានគម្រោងសេវាបម្រើសង្គម និងកិច្ចអភិវឌ្ឍប្រកបដោយចីរភាពថ្មីៗ ដែលនាំមកនូវផល-ប្រយោជន៍ដល់ការអភិវឌ្ឍប្រទេសកម្ពុជា។ ជាមួយគ្នានេះផងដែរ ភាគីទាំងពីរក៏បានប្តេជ្ញាអនុវត្តកិច្ចព្រមព្រៀង នេះដោយឈរលើមូលដ្ឋាននៃការជឿទុកចិត្តគ្នាទៅវិញទៅមក ដើម្បីរួមចំណែកដល់វឌ្ឍនភាពសង្គមជាតិ។
សូមជម្រាបថា អង្គការរ៉ូតារីអន្តរជាតិ (Rotary International) គឺជាបណ្តាញសកលលោកដ៏ធំមួយដែលប្រមូលផ្តុំទៅដោយថ្នាក់ដឹកនាំធុរកិច្ច និងអ្នកជំនាញនានា ដើម្បីផ្តល់សេវាកម្មមនុស្សធម៌ លើកកម្ពស់ស្តង់ដារសីលធម៌ក្នុងការប្រកបវិជ្ជាជីវៈ និងជួយកសាងសុច្ឆន្ទៈព្រមទាំងសន្តិភាពនៅលើពិភពលោក។
បាវចនាចម្បងរបស់ អង្គការ រ៉ូតារីអន្តរជាតិ គឺ “បម្រើអ្នកដទៃមុនគិតដល់ខ្លួនឯង” (Service Above Self)។
វិស័យអាទិភាពទាំង ៧ របស់អង្គការរ៉ូតារី (Areas of Focus)
សកម្មភាពភាគច្រើនរបស់រ៉ូតារី គឺផ្តោតលើការដោះស្រាយបញ្ហាធំៗនៅលើពិភពលោក តាមរយៈវិស័យទាំង៧៖
- ការលើកកម្ពស់សន្តិភាព (Peacebuilding): ផ្តល់ការបណ្តុះបណ្តាល និងគាំទ្រដល់គម្រោងដែលជួយដោះស្រាយជម្លោះ និងកសាងសន្តិភាព។
- ការប្រយុទ្ធប្រឆាំងនឹងជំងឺ (Disease Prevention): គម្រោងលេចធ្លោបំផុតគឺការផ្តល់វ៉ាក់សាំងដើម្បីលុបបំបាត់ជំងឺប៉ូលីយូ (Polio) នៅទូទាំងពិភពលោក ព្រមទាំងការទប់ស្កាត់ជំងឺអេដស៍ គ្រុនចាញ់ ជាដើម។
- ការផ្តល់ទឹកស្អាត និងអនាម័យ (Water and Sanitation): កសាងហេដ្ឋារចនាសម្ព័ន្ធទឹកស្អាត និងប្រព័ន្ធអនាម័យ ដើម្បីកាត់បន្ថយជំងឺឆ្លងនៅតាមសហគមន៍ក្រីក្រ។
- ការសង្គ្រោះមាតា និងទារក (Maternal and Child Health): ផ្តល់សេវាថែទាំសុខភាព និងវ៉ាក់សាំង ដើម្បីកាត់បន្ថយអត្រាមរណភាពរបស់ម្តាយ និងកុមារ។
- ការគាំទ្រការអប់រំ (Basic Education and Literacy): កសាងសាលារៀន ផ្តល់អាហារូបករណ៍ និងសម្ភារៈសិក្សា ដើម្បីធានាថាកុមារគ្រប់រូបចេះអាន និងសរសេរ។
- ការអភិវឌ្ឍសេដ្ឋកិច្ចសហគមន៍ (Economic Development): ផ្តល់ប្រាក់កម្ចីខ្នាតតូច និងការបណ្តុះបណ្តាលវិជ្ជាជីវៈ ដើម្បីជួយសហគមន៍ឱ្យមានលទ្ធភាពបង្កើតប្រាក់ចំណូលដោយខ្លួនឯង។
- ការការពារបរិស្ថាន (Environment): គាំទ្រសកម្មភាពដាំដើមឈើ ការកាត់បន្ថយប្លាស្ទិក និងការថែរក្សាធនធានធម្មជាតិ។
អត្ថប្រយោជន៍នៃសកម្មភាពរ៉ូតារី សម្រាប់សហគមន៍ និងសង្គមជាតិ៖
- ការអភិវឌ្ឍប្រកបដោយចីរភាព៖ សហគមន៍ដែលខ្វះខាតទទួលបានហេដ្ឋារចនាសម្ព័ន្ធថ្មីៗ (អណ្តូងទឹក សាលារៀន មណ្ឌលសុខភាព) ដែលអាចប្រើប្រាស់បានយូរអង្វែង។
- ការសង្គ្រោះជីវិត៖ តាមរយៈកម្មវិធីសុខភាព និងការផ្តល់វ៉ាក់សាំង មនុស្សរាប់លាននាក់ត្រូវបានសង្គ្រោះពីជំងឺកាចសាហាវផ្សេងៗ។
- ជំនួយពេលមានគ្រោះមហន្តរាយ៖ រ៉ូតារីតែងតែចុះជួយផ្តល់ស្បៀងអាហារ និងជម្រកបន្ទាន់នៅពេលមានគ្រោះធម្មជាតិ។
សម្រាប់សមាជិកចូលរួម (Rotarians)
- ការកសាងបណ្តាញទំនាក់ទំនង (Networking): ជាឱកាសដ៏ល្អក្នុងការស្គាល់ និងធ្វើការងារជាមួយអ្នកជំនួញ ព្រមទាំងអ្នកជំនាញដែលមានបទពិសោធន៍ខ្ពស់មកពីពាសពេញពិភពលោក។
- ការអភិវឌ្ឍភាពជាអ្នកដឹកនាំ៖ សមាជិកទទួលបានបទពិសោធន៍ក្នុងការដឹកនាំគម្រោងធំៗ ការរៃអង្គាសប្រាក់ និងការគ្រប់គ្រងធនធានមនុស្ស។
- ឱកាសសម្រាប់យុវជន៖ រ៉ូតារីមានក្លឹបសម្រាប់យុវជនដូចជា Rotaract (សម្រាប់និស្សិត និងយុវជនវ័យក្មេង) និង Interact (សម្រាប់សិស្សវិទ្យាល័យ) ដើម្បីបណ្តុះបណ្តាលភាពជាអ្នកដឹកនាំតាំងពីក្មេង។
