កូនប្រុសច្បង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ សុង ធីតា បានបញ្ចប់ការសិក្សាថ្នាក់បរិញ្ញាបត្រពីសាកលវិទ្យាល័យ University of Greenwich ចក្រភពអង់គ្លេស កាលពីពេលថ្មីៗនេះ។
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានបង្ហោះសារអបអរសាទរដល់កូនប្រុស នៅលើបណ្តាញសង្គមហ្វេសប៊ុក កាលថ្ងៃទី២០ ខែកក្កដា ឆ្នាំ២០២៦ បែបនេះថា៖ “ថ្ងៃដ៏មានន័យសម្រាប់គ្រួសារយើង។ អបអរសាទរ កូនប្រុសច្បង ក្នុងឱកាសទទួលបានសញ្ញាបត្របរិញ្ញាបត្រ (Bachelor’s Degree) ពី University of Greenwich, UK។ ប៉ាម៉ាក់សូមជូនពរឱ្យកូនបន្តខិតខំរៀនសូត្រ រក្សាភាពសុចរិត និងប្រើប្រាស់ចំណេះដឹង ដើម្បីរួមចំណែកជាប្រយោជន៍ដល់សង្គម និងប្រទេសជាតិ”។
ឯកឧត្តមរដ្ឋមន្ត្រី និងភរិយា ព្រមទាំងក្រុមគ្រួសារ ក៏សូមថ្លែងអំណរគុណដ៏ជ្រាលជ្រៅចំពោះបងប្អូន មិត្តភ័ក្ត្រទាំងអស់ដែលបានផ្ញើរសារអបអរសាទរយ៉ាងកក់ក្ដៅចំពោះកូនប្រុសរបស់ខ្លួន ក្នុងឱកាសទទួលសញ្ញាបត្របញ្ចប់ការសិក្សានេះផងដែរ។
សូមជម្រាបថា ឯកឧត្តម ហួត ហាក់ មានស្រុកកំណើតនៅភូមិត្រពាំងគង ឃុំត្រពាំងគង ស្រុកសំរោងទង ខេត្តកំពង់ស្ពឺ។ លោកមានភរិយាឈ្មោះ សុង ធីតា ព្រមទាំងមានកូនប្រុសស្រី ចំនួន ៣នាក់។ លោកត្រូវបាន រដ្ឋសភាបោះឆ្នោតផ្ដល់សេចក្ដីទុកចិត្ត ជារដ្ឋមន្ត្រីក្រសួងទេសចរណ៍ នៅព្រឹកថ្ងៃទី២០ ខែកញ្ញា ឆ្នាំ២០២៤ ព្រមទាំងបានកាន់តំណែងនេះរហូតមកទល់បច្ចុប្បន្ន៕
