ឧទ្យានធម្មជាតិដ៏ធំធេងចំនួនពីរដែលមានផ្ទៃដីសរុបរហូតដល់ទៅ ៦៤ ហិកតា ត្រៀមលេចរូបរាងឡើងក្នុងពេលឆាប់ៗខាងមុខនេះ នៅក្នុងភូមិសាស្ត្រស្រុកខ្សាច់កណ្តាល និងក្រុងអរិយក្សត្រ ខេត្តកណ្តាល បន្ទាប់ពី លោក ឈឿន ប៊ុណ្ណារ័ត្ន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានដឹកនាំក្រុមការងាររៀបចំប្លង់គោល និងផែនការប្រើប្រាស់ដី ចុះពិនិត្យទីតាំងគម្រោងរៀបចំលម្ហសាធារណៈទាំងនេះផ្ទាល់កាលពីពេលថ្មីៗនេះ។
គម្រោងបៃតងដ៏គួរឱ្យទាក់ទាញទាំងពីរនេះ រួមមានគម្រោងឧទ្យានបឹងត្បូងដែលមានទំហំ ៤២ ហិកតា ស្ថិតនៅក្នុងស្រុកខ្សាច់កណ្តាល និងគម្រោងឧទ្យានបឹងដំរីស្រុតដែលមានទំហំ ២២ ហិកតា ស្ថិតនៅក្នុងក្រុងអរិយក្សត្រ។
គួរឱ្យដឹងថា ក្រុមការងាររដ្ឋបាលក្រុងនិងស្រុក បានបញ្ចប់ការសិក្សា និងគូសព្រាងជាបឋមនូវគោលគំនិតក្នុងការរៀបចំលម្ហសាធារណៈនេះរួចរាល់ហើយ ដោយប្តេជ្ញាកែច្នៃតំបន់ទាំងនេះឱ្យទៅជាកន្លែងធម្មជាតិដ៏ស្រស់បំព្រងសម្រាប់ប្រជាពលរដ្ឋមកលេងកម្សាន្ត និងលម្ហែកាយ។
ដើម្បីជំរុញឱ្យគម្រោងនេះកាន់តែមានភាពឥតខ្ចោះ ក្រុមការងារបច្ចេកទេសរបស់ក្រសួង នឹងបន្តសហការសិក្សាបន្ថែមយ៉ាងលម្អិតលើប្លង់ស្ថាបត្យកម្ម និងប្លង់ហេដ្ឋារចនាសម្ព័ន្ធ។ ការរៀបចំនេះគឺដើម្បីធានាឱ្យមានភាពស៊ីសង្វាក់គ្នាយ៉ាងល្អឥតខ្ចោះរវាងការអភិវឌ្ឍ និងស្ថានភាពធម្មជាតិ ព្រមទាំងបង្កើតជាចំណុចទាក់ទាញដ៏ខ្លាំងក្លាសម្រាប់ប្រជាពលរដ្ឋនៅក្នុងតំបន់ ក៏ដូចជាភ្ញៀវទេសចរជាតិផងដែរ៕
