វិស័យវាយនភ័ណ្ឌជាវិស័យសំខាន់ដែលរកចំណូលរាប់ពាន់លានដុល្លារក្នុងមួយឆ្នាំ។ វិស័យនេះក៏បង្កើតការងារដល់ពលរដ្ឋរាប់ម៉ឺននាក់ ជាប្រភពចំណូលបានជួយទ្រងទ្រង់ដល់ជីវភាពរបស់ពលរដ្ឋក្រីក្រតាមមូលដ្ឋាន។
បន្ទាប់ទៀតនេះ ឧកញ៉ាញូនស៍នឹងបង្ហាញឲ្យប្រិយមិត្តបានស្វែងយល់ពីប្រាក់ឈ្នួលកម្មករនិងអត្ថប្រយោជន៍ផ្សេងទៀតរបស់កម្មករដែលធ្វើការផ្នែកវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរ និងកាបូប។
តាមសេចក្តីប្រកាសរបស់ក្រសួងការងារ ឆ្នាំ ២០២២ ប្រាក់ឈ្នួលគោលអប្បបរមាសម្រាប់កម្មករនិយោជិតផ្នែកវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរ និងកាបូប ទទួលបាន ១៩៤ ដុល្លារ ក្នុង ១ ខែ។ ប្រាក់ឈ្នួលកម្មករនិយោជិតសាកល្បង គឺទទួលបាន ១៩២ ដុល្លារ ក្នុង ១ ខែ។
ដោយឡែកករណីទិន្នផលការងារទទួលបានលើសពីចំនួនប្រាក់ឈ្នួលដែលបានកំណត់ គឺត្រូវធ្វើទៅតាមចំនួនលើសនោះ។ ប៉ុន្តែប្រសិនបើក្នុងករណីចំនួនប្រាក់ឈ្នួលកម្មករទាបជាងការកំណត់ថ្មីនេះ គឺត្រូវបន្ថែមឱ្យគ្រប់ចំនួន ១៩២ ដុល្លារ សម្រាប់កម្មករសាកល្បង និង ១៩៤ ដុល្លារក្នុង ១ ខែ សម្រាប់កម្មករពេញសិទ្ធិ។
ជាមួយគ្នានេះ ប្រាក់អត្ថប្រយោជន៍ផ្សេងទៀតរបស់កម្មករនិយោជិត មិនត្រូវរាប់បញ្ចូលលើប្រាក់ឈ្នួលដែលបានកំណត់ខាងលើនេះទេ។
ក្រសួងការងារ និងបណ្តុះបណ្តាលវិជ្ជាជីវៈបញ្ជាក់ថា បន្ថែមពីលើប្រាក់ឈ្នួលអប្បរមានេះ កម្មករនិយោជិតនឹងបន្តទទួលបានអត្ថប្រយោជន៍ផ្សេងៗទៀតដូចជា ប្រាក់សោហ៊ុយធ្វើដំណើរ និងស្នាក់នៅចំនួន ៧ ដុល្លារអាមេរិកក្នុងមួយខែ ប្រាក់រង្វាន់ធ្វើការទៀងទាត់ចំនួន ១០ ដុល្លារអាមេរិកក្នុងមួយខែ។
ជាមួយគ្នានេះ កម្មករនិយោជិតក៏នឹងទទួលបានប្រាក់ថ្លៃបាយ សម្រាប់ការធ្វើការងារបន្ថែមម៉ោងដោយស្ម័គ្រចិត្តចំនួន២,០០០រៀលក្នុងមួយថ្ងៃ ឬការទទួលបានបាយមួយពេលដោយឥតគិតថ្លៃ និងប្រាក់រង្វាន់អតីតភាពការងារចំនួនពី ២ ដុល្លារអាមេរិកដល់ ១១ ដុល្លារអាមេរិកក្នុងមួយខែសម្រាប់កម្មករនិយោជិត ដែលបានធ្វើការចាប់ពីឆ្នាំទី២ដល់ឆ្នាំទី១១។ ដូច្នេះហើយ ជាមធ្យមកម្មករនិយោជិតម្នាក់ៗនឹងទទួលបានប្រាក់បៀវត្សយ៉ាងតិចចំនួនពី ២០៩ដុល្លារអាមេរិកដល់២២០ដុល្លារអាមេរិកក្នុងមួយខែ។ នេះបើតាមក្រសួងការងារ និងបណ្តុះបណ្តាលវិជ្ជាជីវៈ។
វិស័យកាត់ដេរសម្លៀកបំពាក់និងស្បែកជើង គឺជាក្បាលម៉ាស៊ីននៃការនាំចេញធំបំផុតលំដាប់ទីមួយរបស់កម្ពុជា។ វិស័យនេះ បានស្រូបយកកម្លាំងពលកម្មប្រមាណជាង ៨០ម៉ឺននាក់ដែលភាគច្រើនគឺជាប្រជាពលរដ្ឋមកពីបណ្តាខេត្ត និងជនបទ៕
