យោងតាមរបាយការណ៍របស់អគ្គនាយកដ្ឋានកៅស៊ូនៃក្រសួងកសិកម្មបានបង្ហាញឲ្យឃើញថា គិតត្រឹមឆ្នាំ២០២១ កម្ពុជាមានផ្ទៃដីដាំដុះកៅស៊ូសរុបជាង ៤០៤ ០៤៤ ហិកតា (កៅស៊ូឧស្សាហកម្ម ២៤០ ៣៤៦ ហិកតា កៅស៊ូគ្រួសារ ១៦៣ ៦៩៣ ហិកតា និងផៃ្ទដីកៅស៊ូចៀរជ័រ ៣១០ ១៩៣ ហិកតា។
ខណៈកម្ពុជាមានរោងចក្រ-សិប្បកម្មកែច្នៃកៅស៊ូចំនួន ១៦៨ ស្ថិតក្នុងខេត្តចំនួន១១ ការនាំចេញផលិតផលកៅស៊ូប្រមាណជាង ៣៧ម៉ឺនតោន ទទួលចំណូលជាថវិកាបានប្រមាណជាង ៦១០លានដុល្លារ និងចំណូលពីការនាំចេញឈើកៅស៊ូបានជាង ១,៥លានដុល្លារ។
លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានបញ្ជាក់ថា វិស័យឧស្សាហកម្មកៅស៊ូកម្ពុជានៅមានបញ្ហាប្រឈមមួយចំនួនដែលចាំបាច់ត្រូវចាប់ផ្តើមធ្វើការកែលម្អ និងដោះស្រាយបន្ទាន់។
លោករដ្ឋមន្រ្តីបានជំរុញឲ្យអគ្គនាយកដ្ឋានកៅស៊ូ ត្រូវខិតខំរិះរកមធ្យោបាយ វិធានការច្បាស់លាស់ និងបត់បែន ដើម្បីចូលរួមដោះស្រាយបញ្ហាសំខាន់ៗ ដោយត្រូវពង្រឹងកិច្ចសហការថែមទៀតជាមួយអន្តរស្ថាប័នពាក់ព័ន្ធតាមអភិក្រម “រដ្ឋ-ឯកជន-ដៃគូអភិវឌ្ឍន៍ និងសហគមន៍” ប្រកបដោយភាពម្ចាស់ការ និងឈរលើផលប្រយោជន៍រួម។
លោករដ្ឋមន្ត្រីបានដាក់ចេញវិធានការសំខាន់ៗមួយចំនួនទៀត ដែលជាធាតុចូលសម្រាប់ជាមូលដ្ឋានគ្រឹះលើការជំរុញការអភិវឌ្ឍកៅស៊ូ ដើម្បីសម្រេចបានជោគជ័យថែមទៀត គឺត្រូវពង្រឹងកិច្ចសហការជាមួយក្រុមហ៊ុនវិនិយោគ និងក្រុមហ៊ុនសម្បទានដីសេដ្ឋកិច្ចដាំកៅស៊ូ រួមទាំងគ្រួសារ និងយកចិត្តទុកដាក់ទីផ្សារនាំចេញផលិតផលកៅស៊ូ។
ជាមួយគ្នានេះ ត្រូវពង្រឹងការងារគ្រប់គ្រងស្ថានីយ មជ្ឈមណ្ឌលស្រាវជ្រាវពូជ ជំងឺ សត្វ ល្អិតចង្រៃ និងការ កែច្នៃ ដោយត្រូវសហការជាមួយវិស័យឯកជន និងដៃគូអភិវឌ្ឍន៍ និងជំរុញចងក្រង និងពង្រឹងសហគមន៍កសិករកៅស៊ូគ្រួសារ ជំរុញការអភិវឌ្ឍឧស្សាហកម្មកែឆ្នៃកៅស៊ូធម្មជាតិនៅកម្ពុជា និងត្រូវបន្តកៀរគរ និងស្វែងរកប្រភពហិរញ្ញប្បទាន ឬបច្ចេកវិទ្យាថ្មីៗពីដៃគូអភិវឌ្ឍន៍ផ្សេងៗទៀត ដើម្បីទទួលបានការរីកចម្រើនថ្មីៗទៀតក្នុងអនុវិស័យនេះ៕
