ប្រមុខរដ្ឋាភិបាលកម្ពុជា សម្តេច តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសថា នឹងដំឡើងប្រាក់បៀវត្សរ៍ដល់មន្ត្រីរាជការ កងកម្លាំងប្រដាប់អាវុធឡើងវិញ សម្រាប់នៅឆ្នាំ២០២២ នេះតាមការសន្យា។
ការប្រកាសបែបនេះ ត្រូវបានធ្វើឡើងនៅពេល សម្ដេចអញ្ជើញប្រគល់សញ្ញាបត្រជូនសិស្សសាលាភូមិន្ទរដ្ឋបាលជាង ២ពាន់នាក់ នាព្រឹកថ្ងៃទី១៣ ខែមិថុនា ឆ្នាំ២០២២។
ថ្លែងក្នុងកម្មវិធីនេះ សម្តេចតេជោបញ្ជាក់បានថា «កាលពីឆ្នាំ២០២០ និងឆ្នាំ២០២១ យើងមិនបានដំឡើងប្រាក់ខែដល់មន្ត្រីរាជការនោះឡើយ ដូច្នេះសម្រាប់ឆ្នាំ២០២២នេះ យើងនឹងមានការដំឡើងប្រាក់ខែដល់មន្ត្រីរាជការ តែយើងដំឡើងនេះ មិនគិតជាភាគរយនោះទេ គឺយើងមានរបៀបឡើងរបស់វា មានន័យថា អ្នកប្រាក់បៀវត្សទាប នឹងត្រូវបានដំឡើងបានច្រើន រីឯអ្នកមានបៀវត្សខ្ពស់ ដំឡើងបានតិច។ លើសពីនេះ ពិដានពន្ធលើប្រាក់បៀវត្សក៏ត្រូវបានដំឡើងផងដែរដើម្បីជួយសម្រួលដល់មន្រ្តីរាជការ»។
សម្តេច ក៏បានបញ្ជាក់បន្ថែមថា ការឡើងនោះ គឺផ្តល់អាទិភាពជាងគេ គឺដល់គ្រូបង្រៀន និងគ្រូពេទ្យ។
សូមបញ្ជាក់ថា ការប្រកាសដំឡើងប្រាក់ខែ ដល់មន្ត្រីរាជការឡើងវិញនេះ គឺធ្វើឡើងស្របពេលដែលកម្ពុជាមានភាពធូរស្រាលពីបញ្ហារីករាលដាលនៃជំងឺកូវីដ ១៩ ខណៈមានការខកខានមិនបានដំឡើងរយៈពេល២ឆ្នាំហើយផងដែរ៕
