សភាអាមេរិក នៅចំពោះមុខមន្រ្តីជាន់ខ្ពស់រាជរដ្ឋាភិបាលកម្ពុជា បង្ហាញចំណាប់អារម្មណ៍លើការវិនិយោគវិស័យរ៉ែ និងថាមពលនៅកម្ពុជា។ នេះបើតាមជំនួបពិភាក្សាការងាររវាងលោក ស៊ុយ សែម រដ្ឋមន្ត្រីក្រសួងរ៉ែនិងថាមពល និងគណ:ប្រតិភូសមាជិកសភាសហរដ្ឋអាមេរិក ដឹកនាំដោយលោកស្រី Beth Van Duyne នៅថ្ងៃអង្គា ទី៣០ ខែសីហា ឆ្នាំ២០២២។
ថ្លែងក្នុងជំនួបពិភាក្សានេះ លោកស្រី Beth Van Duynr តំណាងសមាជិកសភា បានស្វែងយល់កាន់តែច្បាស់អំពីបរិយាកាសធុរកិច្ចទាក់ទងនឹងវិស័យរ៉ែ និងថាមពល និងបានផ្លាស់ប្ដូរយោបល់ លេីវឌ្ឍនភាពនៃកិច្ចសហប្រតិបត្តិការក្នុងការអភិវឌ្ឍវិស័យរ៉ែ វិស័យថាមពល និងប្រេងកាតនៅកម្ពុជា។
ទន្ទឹមនឹងនោះ នៅក្នុងជំនួបពិភាក្សាការងារនេះ ក៏ជំរុញការវិនិយោគ និងពាណិជ្ជកម្ម រវាងកម្ពុជា និងសហរដ្ឋអាមេរិក ក៏ដូចជាជម្នះនូវឧបសគ្គភូមិសាស្ត្រនយោបាយដែលរារាំងដល់ការធ្វេីពាណិជ្ជកម្ម និងការវិនិយោគ ព្រមទាំងកិច្ចសហប្រតិបត្តិការក្នុងវិស័យរ៉ែ ថាមពល និងប្រេងកាត។
ក្រសួងរ៉ែនិងថាមពល កាលពីពេលកន្លងទៅ បានឲ្យដឹងថា វិស័យរ៉ែនិងថាមពលកម្ពុជា បានសម្រេចសមិទ្ធផល និងមានគម្រោងអភិវឌ្ឍធំៗសំខាន់ៗជាច្រើនរួចមកហើយ។
យ៉ាងណា វិស័យនេះនៅតែកំពុងមានវិសាលភាពនៃតម្រូវការបន្ថែមទៀត ពិសេស គឺថាមពលអគ្គិសនីសម្រាប់ប្រើប្រាស់ ខណៈដែលម្ចាស់រោងចក្រសហគ្រាសជាច្រើនតែងតែត្អូញត្អែរពីតម្លៃអគ្គិសនីក្នុងស្រុក ថា នៅមានខ្ពស់ជាងប្រទេសជិតខាង ដែលធ្វើឲ្យថ្លៃដើមផលិតមានខ្ពស់៕
