ពិធីចុះហត្ថលេខានេះ បានធ្វើឡើងក្រោមវត្តមាន លោក ប្រាក់ សោភ័ណ អភិបាល នៃគណៈអភិបាលខេត្តសៀមរាប និងលោក គីម រិទ្ធី អភិបាល នៃគណៈអភិបាលខេត្តព្រះវិហារ។

លោកអភិបាលខេត្តទាំងពីរ បានឱ្យដឹងថា ការចុះហត្ថលេខាលើសំណើសុំកែសម្រួលព្រំប្រទល់រដ្ឋបាលរវាងខេត្តសៀមរាប និងខេត្តព្រះវិហារ គឺដើម្បីងាយស្រួលក្នុងការគ្រប់ប្រជាជន និងភាពងាយស្រួលក្នុងការផ្តល់សេវាសាធារណៈជូនប្រជាពលរដ្ឋ។

សូមបញ្ជាក់ថា ដោយផ្អែកលើគោលការណ៍ច្បាប់ និងបន្ទាប់ពីចុះសិក្សា និងពិនិត្យ ផ្ទៀងផ្ទាត់នៅទីតាំង ជាក់ស្តែង រដ្ឋបាលខេត្តទាំងពីរបានប្រជុំពិភាក្សា និង សម្រេចឯកភាពគ្នា ដោយរៀបចំសំណើសុំកែសម្រួលព្រំប្រទល់រដ្ឋបាលរវាងខេត្តសៀមរាប និងខេត្តព្រះវិហារ។ ការរៀបចំនេះ ត្រូវបានរៀបចំឡើងតាមសេចក្តីជូនដំណឹងរបស់ក្រសួងមហាផ្ទៃ ស្តីពីការកំណត់ព្រំប្រទល់រដ្ឋបាលរាជធានី-ខេត្ត ក្រុង-ស្រុក និងឃុំ-សង្កាត់ ដែលពុំទាន់មានភាពច្បាស់លាស់ ដើម្បីធានាឱ្យការគ្រប់គ្រងរដ្ឋបាលនៅតំបន់ព្រំប្រទល់នោះមានភាពច្បាស់លាស់ ប្រសិទ្ធភាព និងស្របតាមស្ថានភាពជាក់ស្តែង៕អត្ថបទ៖ហ្សាលីន

The post រដ្ឋបាលខេត្តសៀមរាប និងរដ្ឋបាលខេត្តព្រះវិហារ សម្រេចចុះហត្ថលេខាកែសម្រួលព្រំប្រទល់រដ្ឋបាល appeared first on .

លោក រស់ វណ្ណា បានឱ្យដឹងថា ដំណើរទស្សនកិច្ចនេះធ្វើឡើងដើម្បីចុះពិនិត្យវឌ្ឍនភាពការងាររបស់គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្រោមឥណទានសម្បទានរបស់ធនាគារពិភពលោក(WB) នៅក្នុងក្រុងសៀមរាប ខេត្តសៀមរាប។

សូមបញ្ជាក់ផងដែរថា បណ្តាញលូខ្នែង ខ្នែងរង ប្រវែងប្រមាណ ៥៥,២៥ គីឡូម៉ែត្រ ត្រូវបានសាងសង់រួច ដែលស្មើនឹង ៩២,០៨% នៃគោលដៅប្រវែង ៦០ គីឡូម៉ែត្រ តាមរយៈអនុគម្រោង MPWT-CW-1A ៖ ការងារសាងសង់បណ្តាញលូខ្នែង ខ្នែងរង និងតំណភ្ជាប់តាមផ្ទះមានប្រវែង ២៨,២៣៦គ.ម អនុគម្រោង MPWT-CW-3 ៖ ការងារស្ដារធ្វើឱ្យប្រសើរឡើងវិញស្ថានីយបូមទាំងបីទីតាំង (វត្តចក សាលាកន្សែង និងជន្លង់) អនុគម្រោង MPWT-CW-4 ៖ ការងារស្ដារធ្វើឱ្យប្រសើរឡើងវិញស្ថានីយប្រព្រឹត្តកម្មទឹកកខ្វក់នៅក្នុងសង្កាត់ស្វាយដង្គំ សង្កាត់សាលាកំរើក និងសង្កាត់សំបួរ អនុគម្រោងMPWT-CW-6A ៖ ការងារសាងសង់បណ្តាញលូខ្នែង និងខ្នែងរងមានប្រវែង ១៧,៥៧៧គ.ម តំណភ្ជាប់តាមផ្ទះ និងសាងសង់ស្ថានីយបូមថ្មីចំនួនពីរទីតាំង និងអនុគម្រោង MPWT-CW-9 ៖ ការងារសាងសង់បណ្តាញលូខ្នែង និងខ្នែងរងមានប្រវែង៦,៥០គ.ម និងតំណភ្ជាប់តាមផ្ទះ ចំនួន ៤៦៧តំណ នៅក្រុងសៀមរាប ខេត្តសៀមរាប។

គិតត្រឹមថ្ងៃទី៣០ ខែមិថុនា ឆ្នាំ២០២៦ មានប្រជាពលរដ្ឋប្រមាណ ២២,៧០៧ នាក់ ដែលស្មើនឹង ៩៨.៧៣% នៃគោលដៅរបស់គម្រោងចំនួន ២៣,០០០នាក់ ដែលស្ត្រីមានប្រមាណ ១១,១៣០នាក់ ក្នុងនោះមានប្រជាពលរដ្ឋប្រមាណ ១៩៥នាក់ ជាប្រជាពលរដ្ឋស្ថិតក្នុងស្ថានភាពក្រីក្រ (ID-poor 1 និង ID-poor 2) និងប្រជាពលរដ្ឋចំនួន ២៦៨ នាក់ ជាប្រជាពលរដ្ឋស្ថិតក្នុងស្ថានភាពមានពិការភាព និងស្ត្រីមេម៉ាយ បានទទួលសេវាអនាម័យ តាមរយៈការតភ្ជាប់ទៅប្រព័ន្ធលូទឹកកខ្វក់ក្នុងគម្រោងដោយឥតគិតថ្លៃ៕ អត្ថបទ៖ហ្សាលីន

The post គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ នៅក្នុងក្រុងសៀមរាប សម្រេចបានជាង៩០% appeared first on .

កិច្ចប្រជុំនេះ ដឹកនាំដោយ លោក ប្រាក់ សោភ័ណ អភិបាលខេត្តសៀមរាប និងទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន(JICA)ដឹកនាំដោយ លោក កាណាហ្កាវ៉ាក់ ម៉ាកូតុ នាយកជាន់ខ្ពស់ ក្រុមទី៣ នៃក្រុមអភិវឌ្ឍន៍ទីក្រុង និងតំបន់ នៃនាយកដ្ឋានគ្រប់គ្រងហេដ្ឋារចនាសម្ព័ន្ធ នៃទីស្នាក់ការកណ្តាលចៃកា។

លោក កាណាហ្កាវ៉ាក់ ម៉ាកូតុ លើកឡើងថាគម្រោងអនុវត្តវិធីសាស្ត្រទីក្រុងឆ្លាតដើម្បីដោះស្រាយបញ្ហាទីក្រុង ក្នុងខេត្តសៀមរាប ដំណាក់កាលទី១ បានអនុវត្តគម្រោងសាកល្បងចំនួន៨ ដែលគម្រោងមួយចំនួនកំពុងបន្តអនុវត្ត ចំណែកជំហានទី២ គឺការអនុវត្តវិធីសាស្រ្តផ្អែកលើតំបន់ (Area-Based Approach) ដែលហៅថា “យុទ្ធសាស្ត្រកំណើនទីក្រុងឆ្លាតវៃរំដួល” (Romduol Smart Growth Strategy)។ ដោយផ្តោតលើតំបន់ចំនួនពីរ គឺតំបន់ផ្លូវ Pub Street និងតំបន់មាត់ស្ទឹង ដើម្បីអនុវត្តគម្រោងសាកល្បង ដោយក្នុងតំបន់នីមួយៗ នឹងមានអនុវត្តសកម្មភាពចាំបាច់នានា ដើម្បីធ្វើឱ្យតំបន់ទាំងពីរនេះមានភាពទាក់ទាញ និងជាទីរីករាយសម្រាប់ការដើរកម្សាន្តនៃភ្ញៀវទេសចរ និងប្រជាពលរដ្ឋ។ សកម្មភាពភាពដែលត្រូវអនុវត្តក្នុងតំបន់ទាំងពីរមានដូចជា៖ ការត្រួតពិនិត្យការចរាចរណ៍ ការផ្សព្វផ្សាយតាមបណ្ដាញសង្គម វិធីសាស្ត្រធ្វើឱ្យតំបន់ដងស្ទឹងមានភាពបៃតង កម្មវិធីជំរុញការដើរកម្សាន្តក្នុងក្រុង ផ្ទាំងបង្ហាញឌីជីថល កម្មវិធីគ្រប់គ្រងអ្នកលក់ដូរតាមទីសាធារណៈ ការឆ្លើយតបអគ្គិភ័យបឋម និងការគ្រប់គ្រងចរាចរណ៍ឆ្លាតវៃ។

នាឱកាសនោះ លោក ប្រាក់ សោភ័ណ អភិបាលខេត្ត លើកឡើងថា តាមរយៈការអនុវត្តគម្រោងកិច្ចសហប្រតិបត្តិការបច្ចេកទេស នៃការជួយរៀបចំក្រុងសៀមរាប ជាទីក្រុងឆ្លាតវៃទាំងក្នុងដំណាក់កាលទី១ និងដំណាក់កាលទី២ ពីសំណាក់ប្រទេសជប៉ុនតាមរយៈ JICAនេះ មិនត្រឹមតែរឹតចំណងមិត្តភាពកម្ពុជា-ជប៉ុន ឱ្យកាន់តែរឹងមាំប៉ុណ្ណោះទេ ប៉ុន្តែវានឹងជួយលើកកម្ពស់សេដ្ឋកិច្ច និងវិស័យទេសចរណ៍ឱ្យសក្តិសមជា “ទីក្រុងឆ្លាតវៃអាស៊ាន” ក៏ដូចជា ចូលរួមលើកកម្ពស់នូវសេដ្ឋកិច្ចរបស់ខេត្តសៀមរាប តាមរយៈការជំរុញលើកកម្ពស់វិស័យទេសចរណ៍របស់ខេត្តសៀមរាបផងដែរ។

លោកក៏បង្ហាញការគាំទ្រយ៉ាងខ្លាំង និងសង្ឃឹមថា គម្រោងជំហានទី២នេះ នឹងកាត់បន្ថយអត្រាអ្នកស្លាប់ របួស និងការខូចខាតទ្រព្យសម្បត្តិដែលបណ្តាលមកពីគ្រោះថ្នាក់ចរាចរណ៍ក្នុងក្រុងសៀមរាប ជាក់ជាមិនខាន។ ជាមួយគ្នានេះ អាចប្រែក្លាយរដ្ឋបាលខេត្តសៀមរាប ជារដ្ឋបាលដែលជាទីតាំងចែករំលែកនូវបទពិសោធន៍ល្អៗ និងជោគជ័យក្នុងការអនុវត្តគម្រោងទីក្រុងឆ្លាតវៃទៅកាន់បណ្តាខេត្ត រាជធានី របស់កម្ពុជា ក៏ដូចជាទៅកាន់បណ្តាប្រទេសមួយចំនួននៅក្នុងតំបន់អាស៊ាន៕

The post គម្រោងអនុវត្តវិធីសាស្រ្តទីក្រុងឆ្លាតវៃ ដើម្បីដោះស្រាយបញ្ហាទីក្រុងក្នុងខេត្តសៀមរាប ឈានដល់ដំណាក់កាលជំហានទី២ appeared first on .

ថ្លែងប្រាប់អ្នកសារព័ត៌មានក្នុងដំណើរទស្សនកិច្ចទៅកាន់ផ្សារចុងសប្តាហ៍ លោក តាន់ ជាយុទ្ធថា អនុប្រធានការិយាល័យក្សេត្រសាស្ត្រ និងផលិតភាពកសិកម្ម នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប​ បានឱ្យដឹងថា ​ផ្សារ​ចុង​សប្ដាហ៍ស្ថិតក្នុង​បរិវេណ​សួនច្បារ ជិត​ព្រះរាជដំណាក់ មាត់​ស្ទឹង​សៀមរាប ​បច្ចុប្បន្នមាន ៦៩សហគមន៍កសិករ ប៉ុន្តែអ្នកដាំបន្លែជាអាជីពគឺមានតែ ២៣សហគមន៍ប៉ុណ្ណោះ ដែលជាអ្នកដាំបន្លែសម្រាប់យកមកផ្គត់ផ្គង់នៅផ្សារចុងសប្តាហ៍នេះ។

លោកបញ្ជាក់ថា៖« បងប្អូនដែលជាសមាជិកក្នុងសហគមន៍ អាចផលិតបន្លែបានពី១០០ ទៅ១៥០គីឡូក្រាមក្នុង១ថ្ងៃសម្រាប់ផ្គត់ផ្គង់ទីផ្សារទូទៅផង និងផ្គត់ផ្គង់ទីផ្សារចុងសប្តាហ៍សៀមរាបនេះ»។

ជាមួយគ្នានេះ លោកថា ចាប់តាំងពីដំណើរការផ្សារនេះមក ឃើញថា ប្រជាពលរដ្ឋនៅក្នុងខេត្តគាំទ្រខ្លាំង ដោយសារប្រជាពលរដ្ឋចាប់ផ្តើមគិតពីសុខភាពច្រើន។ជាក់ស្តែង ក្នុងប្រជាពលរដ្ឋដែលលក់បន្លែតិច គាត់អាចលក់បានចន្លោះ៣០ ទៅ៤០គីឡូ ក្នុងមួយព្រឹកថ្ងៃសៅរ៍ និងថ្ងៃអាទិត្យ ខណៈបងប្អូនដែលគាត់ដាក់លក់បន្លែច្រើនវិញ គឺអាចលក់បានចន្លោះពី១០០ ទៅ១៥០គីឡូក្នុងមួយព្រឹក។

លោក តាន់ ជាយុទ្ធថា បានបញ្ជាក់បន្ថែមថា រាល់ការលក់ដូរ​​បន្លែ ផ្លែឈើ ត្រី​សាច់នៅក្នុងផ្សារចុងសប្តាហ៍នេះ គឺមានការទទួលស្គាល់ពីក្រសួងកសិកម្ម រក្ខាប្រមាញ់ និងនេសាទ ព្រមទាំងក្រសួងពាណិជ្ជកម្ម ព្រមទាំងស្ថាប័នពាក់ព័ន្ធថា ពិតជាមានស្តង់ដារសុវត្ថិភាព តាមបែបបច្ចេកទេសត្រឹមត្រូវ មិនប្រើប្រាស់ថ្នាំជីគីមី ដែលអាចបង្កផលប៉ពាល់ដល់សុខភាពរបស់អ្នកប្រើប្រាស់នោះឡើយ។

មន្រ្តីខាងលើ បានសង្កត់ធ្ងន់ថា បរិបទ​នៃ​ការហូប​បន្លែ​សុវត្ថិភាព​កាន់តែ​ផុសផុល​ឡើង​ក្នុងសង្គម​បច្ចុប្បន្ន ហើយនៅ​ខេត្តសៀមរាប ទីផ្សារ​បន្លែ​សុវត្ថិភាព​ដែល​ដាំ​ដោយ​កសិករ​ខ្មែរហើយដាក់លក់នៅក្នុងផ្សារចុងសប្តាហ៍នេះ គឺហាក់​មាន​សន្ទុះ​កើនឡើង​ខ្លាំង ពោលគឺអតិថិជន​អ្នក​ហូប​បន្លែ​សុវត្ថិភាព​ប្រាប់ថា ពួកគេ​ជ្រើសរើស​ហូប​បន្លែ​នេះ​ដោយសារ​មាន​ទំនុកចិត្ត ដោយ​មិន​បារម្ភ​ពី​បញ្ហា​សុខភាព​ឡើយ បើទោះបី​បន្លែ​សុវត្ថិភាព​មានតម្លៃ​ថ្លៃ​ជាង​បន្លែ​ធម្មតា​ក៏ដោយ​។​

ហេតុនេះ ការដាក់ឱ្យដំណើរការផ្សារចុងសប្តាហ៍នេះ មន្រ្តីមន្ទីកសិកម្មថា មិនត្រឹមតែជួយជំរុញចរន្តសេដ្ឋកិច្ចប្រជាពលរដ្ឋប៉ុណ្ណោះទេ ផ្សារនេះក៏បានរួមចំណែកដ៏សំខាន់ ដល់ការលើកម្ពស់សុខភាពសាធារណៈដល់ពលរដ្ឋ ទាក់ទាញទេសចរណ៍ ពិសេសជួយលើកកម្ពស់មុខមាត់ខេត្តសៀមរាបផ្ទាល់ឱ្យកាន់តែល្អផងដែរ។

ជាថ្មីម្តងទៀត មន្រ្តីជំនាញខាងលើ ជំរុញឱ្យសាធារណជន បន្តគាំទ្រផលិតផលកសិកម្មចម្រុះក្នុងស្រុក ពិសេសបន្លែផ្លែឈើដែលមានដាក់លក់នៅក្នុងផ្សារនេះ ឱ្យកាន់តែខ្លាំងថែមទៀត ដើម្បីលើកស្ទួយជីវភាពកសិករដែលជាអ្នកផលិត និងផលិតករខ្មែរដែលជាអ្នកកែច្នៃ។

សូមជម្រាបដែរថា ផ្សារចុងសប្តាហ៍ បានធ្វើឡើងក្រោមការដឹកនាំនិងការគាំទ្ររបស់ក្រសួងពាណិជ្ជកម្ម និងការសម្របសម្រួលផ្តល់ទីតាំងរបស់រដ្ឋបាលខេត្ត មន្ទីរពាណិជ្ជកម្មខេត្តសៀមរាប និងក្រោមគម្រោងជំរុញទីផ្សារសម្រាប់កសិកម្មខ្នាតតូច (AIMS) នៃក្រសួងពាណិជ្ជកម្ម បានរៀបចំនិងដាក់ឱ្យដំណើរការផ្សារលក់ផលិតផលខ្មែរ ចាប់តាំងពី ឆ្នាំ២០១៩រហូតមកដល់បច្ចុប្បន្ន៕អត្ថបទ៖ពិសី

The post មន្រ្តីជំនាញ៖ ផ្សារចុងសប្តាហ៍សៀមរាប បានជួយជំរុញចរន្តសេដ្ឋកិច្ច និងលើកកម្ពស់សុខភាពសាធារណៈ appeared first on .

យោងតាមរបាយការណ៍របស់មន្ទីរទេសចរណ៍ខេត្តសៀមរាប បានឱ្យដឹងថា ភ្ញៀវទេសចរជាតិ-អន្តរជាតិ និងបងប្អូនប្រជាពលរដ្ឋដើរលេងកម្សាន្តក្នុងខេត្តសៀមរាប ក្នុងថ្ងៃបុណ្យចូលឆ្នាំថ្មីប្រពៃណីជាតិខ្មែរ ចាប់ពីថ្ងៃទី១៤-១៦ ខែមេសា ឆ្នាំ២០២៦ មានចំនួន ១ ៨៤២ ៤៣៨ នាក់។

ដោយក្នុងនោះ ទេសចរជាតិ និងបងប្អូនប្រជាពលរដ្ឋសរុប មានចំនួនប្រមាណ ១ ៨៣៧ ០០០ នាក់ ភ្ញៀវទេសចរបរទេសមានចំនួន ៥ ៤៣៨ នាក់។

គួរបញ្ជាក់ថា ដើម្បីជាការទាក់ទាញភ្ញៀវទេសចរមកទស្សនា កម្សាន្តនៅខេត្តសៀមរាប រដ្ឋបាលខេត្តសៀមរាប ក៏ដូចជាអាជ្ញាធរពាក់ព័ន្ធបានរៀបចំ បង្កើតឱ្យមាននូវព្រឹត្តិការណ៍ជាច្រើន រួមទាំងការថែរក្សាសណ្តាប់ធ្នាប់ នានាផងដែរ។

រូបភាព៖ មន្ទីរព័ត៌មានខេត្តសៀមរាប

The post ភ្ញៀវទេសចរជិតពីរលាននាក់បានកម្សាន្តនៅខេត្តសៀមរាប ក្នុងឱកាសបុណ្យចូលឆ្នាំ រយៈពេល៣ថ្ងៃ appeared first on .

ក្នុងសេចក្តីជូនដំណឹងថ្ងៃទី១៩ ខែមីនា ២០២៦ រដ្ឋបាលខេត្តបានបញ្ជាក់ថា រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ បានរៀបចំរថយន្តចំនួន១១៥គ្រឿង សម្រាប់បម្រើដល់ការដឹកជញ្ជូនពីរាជធានីភ្នំពេញ មកកាន់​ខេត្តសៀមរាប និងការដឹកជញ្ជូន ពីខេត្តសៀមរាបត្រឡប់ទៅរាជធានីភ្នំពេញវិញ តាមពេលវេលា និងទីតាំងចំណតដូច​ខាងក្រោម៖

១. ចេញដំណើរពីរាជធានីភ្នំពេញមកខេត្តសៀមរាប ទីតាំងចំណតដីឡូត៍តំបន់ OCICជ្រោយចង្វារ (រង្វង់មូលទេពមច្ឆា) រៀងរាល់ម៉ោង០៦៖៣០នាទី ដល់ម៉ោង១១៖៣០នាទី ចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ២០២៦ មកទីតាំងចំណតមណ្ឌលរដ្ឋបាលមន្ទីរខេត្តសៀមរាប វិថីសម្តេចវិបុលបញ្ញា សុខ អាន (ផ្លូវ៦០ម៉ែត្រ)។

២. ចេញដំណើរពីខេត្តសៀមរាបទៅរាជធានីភ្នំពេញ តាមពេលវេលា និងទីកន្លែងដូចខាងក្រោម ៖

– ចាប់ពីថ្ងៃទី១៣ ដល់ថ្ងៃទី១៧ ខែមេសា ឆ្នាំ២០២៦ ចេញដំណើររៀងរាល់ម៉ោង០៦៖៣០នាទី ដល់ម៉ោង១១៖៣០នាទី

– ចេញដំណើរពីទីតាំងមណ្ឌលរដ្ឋបាលមន្ទីរខេត្តសៀមរាប វិថីសម្តេចវិបុលបញ្ញា សុខ អាន (ផ្លូវ៦០ម៉ែត្រ) ទៅទីតាំងចំណតដីឡូត៍តំបន់ OCIC ជ្រោយចង្វារ (រង្វង់មូលទេពមច្ឆា)៕

The post រដ្ឋបាលខេត្តសៀមរាប ត្រៀមរថយន្តចំនួន១១៥គ្រឿង ដឹកជញ្ជូនបងប្អូនដោយឥតគិតថ្លៃ ក្នុងឱកាសពិធីបុណ្យចូល​ឆ្នាំខ្មែរខាងមុខ​ appeared first on .

រីករាយជាមួយការប្រគំតន្រ្តី DAZZ CHARITY CONCERT នៅភូមិគោករលួស ឃុំដំដែក ស្រុកសូទ្រនិគម ខេត្ត សៀមរាប ដោយជួបជាមួយកំពូលតារាចម្រៀងល្បីៗប្រចាំនៅក្នុងផលិតកម្ម ហ្គាឡាក់ស៊ី ណាវ៉ាត្រា ជាក់ស្តែងនៅថ្ងៃទី ០៧ ខែ មីនា ឆ្នាំ ២០២៦ ជួបជាមួយកំពូលតារាចម្រៀង ឧកញ៉ា ខេមរៈ សិរីមន្ត , លោក ខេម , កញ្ញា ហុិន លីដា និងតារាចម្រៀងវ័យក្មេងសំឡេងពីរោះជាច្រើនរូបទៀត ។

អ្វីដែលកាន់តែពិសេសនិងមិនអាចរំលងបាននោះគឺនៅថ្ងៃទី ០៨ ខែ មីនា ឆ្នាំ២០២៦ ជួបជាមួយកំពូលតារាចម្រៀង លោក ព្រាប សុវត្ថិ , កញ្ញា តន់ ចន្ទសីម៉ា ,លោក Tempo និងព្រមទាំងតារាចម្រៀងវ័យក្មេងជាច្រើនរូបទៀត ដែលត្រៀមនឹងធ្វើឱ្យឆាកតន្រ្តី DAZZ CHARITY CONCERT កាន់តែកក្រើក ជាមួយនិងការច្រៀងនិងសម្តែងរបស់ពួកគេ ។

រីករាយទិវាសិទ្ធនារីអន្តរជាតិ ០៨ មីនា ឆ្នាំនេះ ណាត់ជួបគ្នារាំងលេងកម្សាន្តសប្បាយជាមួយនិងមនុស្សដែលខ្លួនស្រឡាញ់ ព្រមទាំងបានជួបជាមួយ Idol ក្នុងដួងចិត្តដោយផ្ទាល់ទៀតក្នុងព្រឹត្តិការណ៍ប្រគំតន្រ្តី DAZZ CHARITY CONCERT ក្នុងទឹកដីខេត្ត សៀមរាប ។ DAZZ Charity Concert គឺជាព្រឹត្តិការណ៍ប្រគំតន្រ្តីដ៏ធំមួយ ដែលរៀបចំឡើងដើម្បីចូលរួមផ្សព្វផ្សាយពីសិល្បៈតន្ត្រី និងបន្តបើកឱកាសការងារដល់សិល្បករ-សិល្បការិនី និងរក្សាចរន្តសេដ្ឋកិច្ចឱ្យកាន់តែរឹងមាំ ។ តន្រ្តី១ពាន់លានរៀលដើម្បីសប្បុរសធម៌ ។ DAZZ Charity Concert ថាមពលនៃសំឡេងខ្មែរតែមួយ ៕

The post មួយឆ្នាំមានម្តងកុំឱ្យរំលង ! ទិវាសិទ្ធនារីអន្តរជាតិឆ្នាំនេះរាំឱ្យសប្បាយក្នុងការប្រគំតន្រ្តី DAZZ CHARITY CONCERT លើទឹកដីខេត្តសៀមរាប appeared first on .

យោងតាមការចុះផ្សាយរបស់ Tripadvisor ដែលជាវេទិកាទេសចរណ៍ដ៏ល្បីល្បាញលើពិភពលោក ដកស្រង់ដោយ ក្រសួងទេសចរណ៍ បានឱ្យដឹងថា តំបន់ដែលជាប់ជាគោលដៅទេសចរណ៍វប្បធម៌ ល្អបំផុតនៅលើពិភពលោក ឆ្នាំ២០២៦ មាន២៥កន្លែង ក្នុងនោះក៏មានខេត្តសៀមរាប ប្រទេសកម្ពុជាផងដែរ។

របាយការណ៍របស់ Tripadvisor បានឱ្យដឹងដែរថា ទីតាំងទាំង២៥នោះរួមមាន៖

១. Singapore ២. London ៣. Krakow ៤. Paris ៥. Rome ៦. Edinburgh ៧. Hano ៨. Budapest ៩. Kyoto ១០. Bali ១១. Prague ១២. Dublin ១៣. Siem Reap ១៤. C Istanbul ១៥. New York City ១៦. Seoul ១៧. Beijing ១៨. Florence ១៩. Lisbon ២០. Barcelona ២១. Marrakech ២២. Athens ២៣. Lima ២៤. Luxor និង២៥. Rio de Janeiro។

សូមបញ្ជាក់ថា ខេត្តសៀមរាប ដែលជាខេត្តមានប្រាសាទអង្គរដ៏ល្បីរបស់ប្រទេសកម្ពុជា ត្រូវបានគេដាក់ឈ្មោះថា Travellers’ Choice Awards Best of the Best Destinations កាលពីឆ្នាំ២០២៥ ដោយ Tripadvisor ដែលជាវេទិកាទេសចរណ៍ដ៏ល្បីល្បាញលើពិភពលោក។

ឆ្នាំ២០២៥ ខេត្តសៀមរាបក៏ទទួលបានចំណាត់ថ្នាក់ទី១៤ ក្នុងចំណោមគោលដៅទេសចរណ៍កំពូលទាំង២៥ នៅលើពិភពលោក ដែលត្រូវបានទទួលស្គាល់ចំពោះភាពសម្បូរបែបនៃវប្បធម៌ និងអច្ឆរិយប្រវត្តិសាស្ត្រផងដែរ។

យោងតាមរបាយការណ៍ពីគ្រឹះស្ថានអង្គរ ពេញមួយឆ្នាំ ២០២៥ កន្លងទៅ តំបន់រមណីយដ្ឋានអង្គរទទួលបានភ្ញៀវទេសចរអន្តរជាតិជិត ១ លាននាក់ ដែលបង្កើតចំណូលបានជាង ៤៤ លានដុល្លារអាមេរិក៕

The post ខេត្តសៀមរាប ក្លាយជាគោលដៅទេសចរណ៍វប្បធម៌ ល្អបំផុតនៅលើពិភពលោក ឆ្នាំ២០២៦ appeared first on .

ឧកញ៉ា ឆាយ ស៊ីវលីន មានប្រសាសន៍ថា “ពិធីបុណ្យអុំទូកនៅឆ្នាំ២០២៥នេះ យើងបានសង្កេតឃើញថាខេត្តដែលទាក់ទាញប្រជាពលរដ្ឋខ្មែរយើងទៅច្រើនជាងគេ គឺខេត្តសៀមរាប ដោយសារខេត្តសៀមរាប៖ ទី១) មានប្រាង្គប្រសាទច្រើនជាងគេបើប្រៀបធៀបនិងបណ្តាខេត្តនានា, ទី២) ខេត្តសៀមរាបមានផលិតផលនិងសេវាកម្មសំបូរបែប ,ទី៣) ខេត្តសៀមរាបមានហេដ្ឋារចនាសម្ព័ន្ធល្អ ការរៀបចំជាលក្ខណៈទេសចរមានការទាក់ទាញច្រើនជាងគេ,ទី៤)ខេត្តសៀមរាបមានបង្ហាញវប្បធម៌ច្រើន ក៏ដូចជាមានការៀបចំប្រណាំទូក។ ពិសេសម្ហូបអាហារនិងសេវាកម្មបដិសណ្ឋារកិច្ចសំបូរបែប ដែលធ្វើឱ្យប្រជាពលរដ្ឋក្នុងស្រុកទោះបីបានធ្លាប់ទៅលេងញឹកញាប់ក៏ដោយ ពលរដ្ឋខ្មែរភាគច្រើននូវតែចង់ទៅលេងម្តងទៀត”។

ទន្ទឹមនិងការខេត្តសៀមរាបបានទាក់ទាញពលរដ្ឋទៅលើលេងកម្សាន្តច្រើន, ឧកញ៉ា ឆាយ ស៊ីវលីន ក៏បានចាត់ទុកខេត្តជាប់សមុទ្រ ក៏ដូចជាតំបន់កម្សាន្តមួយចំនួននៅជុំវិញបឹងទន្លេសាបក៏ទទួលបានភ្ញៀវទេសចរក្នុងស្រុកទៅដើរកម្សាន្តច្រើនផងដែរ បើទោះបីមិនច្រើនដូចខេត្តសៀមរាប ហើយការងាកគាំទ្រសេវាកម្មទេសចរណ៍ពីពលរដ្ឋក្នុងស្រុកនេះច្រើននៅពេលថ្មីៗ បានចូលរួមចំណែកផ្តល់ឱកាសការងារដល់ពលរដ្ឋក្នុងស្រុក។ ខុសប្លែកកាលពីពេលមុនៗចូលចិត្តធ្វើដំណើរកម្សាន្តនៅក្រៅប្រទេស។

ទាក់ទងខេត្តសៀមរាបនេះដែរ, លោក ទួន រស្មី មគ្គទេសក៍ ទេសចរណ៍ប្រចាំខេត្តសៀមរាប បានកត់សម្គាល់ថា ប្រជាពលរដ្ឋខ្មែរមួយបានមកកម្សាន្តនៅខេត្តសៀមរាបតាំងពីថ្ងៃពុំទាន់ឈប់សម្រាប់នៃព្រះរាជពិធីបុណ្យអុំទូកម្លេះ ហើយចូលមកដល់ថ្ងៃបុណ្យអុំទូកទីមួយនេះ ឃើញថា ប្រជាពលរដ្ឋខ្មែរបានសម្រុកមកកម្សាន្តនៅខេត្តសៀមរាបច្រើនកុះករ។

លោកបន្តថា បរិមាណភ្ញៀវទេសចរក្នុងស្រុក ចូលមកទស្សនាក្នុងខេត្តសៀមរាបនេះ ពួកគាត់បានចូលរួមចំណែកលើកកម្ពស់សេដ្ឋកិច្ច ដល់ម្ចាស់ផ្ទះសំណាក់ សណ្ឋាគារ ភោជនីយដ្ឋាន និងកន្លែងលក់វត្ថុអនុស្សាវរីយ៍បានច្រើននៅក្នុងរយៈពេល៣ថ្ងៃនៃការឈប់សម្រាកបុណ្យអុំទូកឆ្នាំនេះ។

យោងតាមបណ្តាញទំនាក់ទំនិងសង្គមផ្លូវការរបស់មន្ទីរទេសចរណ៍ខេត្តសៀមរាបបានឱ្យដឹងថា រដ្ឋបាលខេត្តសៀមរាបបានរៀបចំនូវកម្មវិធីមួយចំនួនដូចជា៖ (១)-កម្មវិធីប្រណាំងទូកមិត្តភាពសៀមរាបផ្ទះខ្ញុំ (២)-កម្មវិធីប្រគុំតន្ត្រីស្គរដៃ (៣)-កម្មវិធីស្តង់ពិព័រណ៍ (៤)-កម្មវិធិប្រដាល់គុណខ្មែរ (៥)-ល្ខោនបាសាក់ (៦)-កម្មវិធីជិះទូកម្សាន្តតាមដងស្ទឹង និងកម្មវិធីផ្សេងៗទៀត ចាប់ពីថ្ងៃទី០៤-០៦ ខែ វិច្ឆិកា ឆ្នាំ២០២៥ នៅតាមបណ្តោយដងស្ទឹងសៀមរាប៕

The post ឧកញ៉ា ឆាយ ស៊ីវលីន៖ ខេត្តសៀមរាបទាក់ទាញពលរដ្ឋទៅកម្សាន្តច្រើនជាងគេ ក្នុងឱកាសថ្ងៃឈប់សម្រាកពេលបុណ្យអុំទូក appeared first on .

ក្រសួងសារធារណការ បានបង្ហោះនៅលើហ្វេសប៊ុក នៅថ្ងៃទី៥ ខែតុលា ឆ្នាំ២០២៥ បានឱ្យដឹងថា ហេដ្ឋារចនាសម្ព័ន្ធផ្លូវ ៣៨ខ្សែ កំពុងប្រែក្លាយក្រុងសៀមរាបឱ្យស័ក្តិសមជាទីក្រុងទេសចរណ៍ វប្បធម៌ និងប្រវត្តិសាស្ត្រ អាចទាក់ទាញភ្ញៀវទេសចរបានកាន់តែច្រើនសំដៅលើកស្ទួយសេដ្ឋកិច្ចជាតិឱ្យកាន់តែមានការរីកចម្រើន ព្រមទាំងធ្វើឱ្យប្រសើរឡើងដល់តភ្ជាប់ពីទីប្រជុំជនក្រុងសៀមរាបទៅកាន់តំបន់ដាច់ស្រយាលផងដែរ។

សូមរម្លឹកថា ហេដ្ឋារចនាសម្ព័ន្ធផ្លូវចំនួន៣៨ខ្សែ មានប្រវែងសរុប១០៨,៧៤ គីឡូម៉ែត្រ បានបើកការដ្ឋានសាងសង់កាលពីថ្ងៃទី៣០ ខែវិច្ឆិកា ឆ្នាំ២០២០ និងបានសម្ពោធបើកប្រើប្រាស់ជាផ្លូវការ កាលពីថ្ងៃទី០៤ ខែមេសា ឆ្នាំ២០២២។

ការសាងសង់គម្រោងកែលម្អហេដ្ឋារចនាសម្ព័ន្ធផ្លូវទាំង ៣៨ខ្សែ ក្នុងក្រុងសៀមរាបនេះដែរ បានប្រើប្រាស់ថវិកាជាតិសរុបប្រមាណ ១៥០ លានដុល្លារអាមេរិក ដោយក្នុងនោះ ចំនួន ៩លានដុល្លារអាមេរិក បន្ថែមទៀតនឹងត្រូវចំណាយលើការរៀបចំស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ផងដែរ៕ អត្ថបទ៖ហ្សាលីន

The post ហេដ្ឋារចនាសម្ព័ន្ធផ្លូវ ៣៨ខ្សែ​ តម្លៃ១៥០លានដុល្លារ កំពុងប្រែក្លាយក្រុងសៀមរាបជាទីក្រុងដ៏ទំនើប appeared first on .