នៅក្នុងឱកាសជួបសំណេះសំណាលជាមួយតំណាងជនភៀសសឹកចំនួន៦ភូមិ នៅខេត្ដបន្ទាយមានជ័យ កាលពីថ្ងៃទី១៣ ខែមីនា ឆ្នាំ២០២៦ សម្តេចក្រឡាហោម ស ខេង បានថ្លែងអំណរគុណដល់ទឹកចិត្តដ៏អង់អាចក្លាហានរបស់កងកម្លាំង និងការគោរពដឹងគុណចំពោះវីរៈភាពដ៏អង់អាចក្លាហាន កិច្ចខិតខំប្រឹងប្រែងរបស់វីរៈកងទ័ពទាំងអស់ ដែលបានលះបង់ ក្នុងកិច្ចការពារបុព្វហេតុជាតិ មាតុភូមិ ការពារទឹកដីពីការឈ្លានពានរបស់សត្រូវប្រទេសជិតខាងនាពេលកន្លងមក។

សម្តេចបានបញ្ជាក់ថា កម្ពុជាមិនដែលមានមហិច្ឆតាឈ្លានពានទឹកដីរបស់ប្រទេសជិតខាងណាមួយនោះទេ កម្ពុជាជាប្រទេសតូច ហើយកម្ពុជាត្រូវការ តែសន្តិភាពប៉ុណ្ណោះ។
ទន្ទឹមនឹងនោះ សម្តេចក្រឡាហោម ស ខេង បានសម្តែងការគាំទ្រលើគោលការណ៍ដឹកនាំរបស់រាជរដ្ឋាភិបាល លើការដឹកនាំ និងការដោះស្រាយបញ្ហាព្រំដែនដោយសន្តិវិធី ដើម្បីឲ្យប្រជាពលរដ្ឋឆាប់បានវិលត្រឡប់ទៅលំនៅឋានវិញ និងបន្តរួមចំណែក ក្នុងការជួយឧបត្ថម្ភអ្វីដែលអាចធ្វើទៅបាន ដើម្បីជួយសម្រាលដោយការលំបាករបស់ជនភៀសសឹក។

សូមជម្រាបថា សម្រាប់ខេត្តបន្ទាយមានជ័យ ប្រជាពលរដ្ឋចំនួនជាង២ពាន់ខ្នងត្រូវបានបំផ្លាញ និងភូមិចំនួន៦ ត្រូវបានកងទ័ពថៃ ដាក់កុងតឺន័រ និងរាយបន្លាលួសហ៊ុព័ទ្ធបន្តគ្រប់គ្រងទាំងកម្រោល ក្នុងដែនអធិបតេយ្យភាពរបស់កម្ពុជា មានប្រជាពលរដ្ឋជាង៣០០០គ្រួសារ ស្មើនឹងមនុស្សរាយចំនួន១១ម៉ឺននាក់ រួមទាំងកុមារព្រះសង្ឃមិនអាចវិលត្រលបទៅលំនៅឋាន និងទីអារាមបាន៕

The post សម្តេចក្រឡាហោម ស ខេង៖ កម្ពុជាមិនដែលមានមហិច្ឆតាឈ្លានពានទឹកដីរបស់ប្រទេសជិតខាងណាមួយនោះទេ appeared first on .

ក្នុងពិធីនេះដែរ សម្តេចតេជោ ហ៊ុន សែន ក៏បានបញ្ជាក់ប្រាប់ពីមូលហេតុ សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ មិនបានទទួលឋានន្តរសក្តិថ្នាក់ នាយឧត្តមសេនីយ៍ផុតលេខ ផ្កាយមាស ៥។ សម្តេចតេជោ បានពន្យល់ថា សម្តេចក្រឡាហោម ស ខេង អតីតរដ្ឋមន្ត្រីក្រសួងមហាផ្ទៃ គឺស្ថិតក្នុងក្របខណ្ឌស៊ីវិលនោះទេ។ ជាមួយគ្នានោះ សម្តេចប្រមុខរដ្ឋស្តីទី ក៏បានរំលឹកផងដែរថា កាលពីអំឡុងឆ្នាំ១៩៩៧-១៩៩៨ សម្តេច ស ខេង ចង់ត្រឹមតែពាក់សក្តិ៥ប៉ុណ្ណោះ។

សម្តេចតេជោ ហ៊ុន សែន បានព្រមានដល់អ្នកមានបំណងចង់បំបែកបំបាក់ផ្ទៃក្នុង ដូច្នេះថា៖ «សូម​កុំមកព្យាយាម​បំបែកផ្ទៃក្នុងគណបក្ស​ប្រជាជនកម្ពុជា។ អ្នកឯងកាន់តែ​បំបែកខ្ញុំ អ្នកឯងកាន់តែបែកខ្លួនឯង»។

គួរបញ្ជាក់ថា គិតមកដល់បច្ចុប្បន្ននេះ ឥស្សរជន៥រូបហើយ ដែលទទួលបានឋានន្តរសក្តិថ្នាក់ នាយឧត្តមសេនីយ៍ផុតលេខ ផ្កាយមាស៥ ក្នុងនោះរួមមាន សម្តេច ជា ស៊ីម, សម្តេច ហេង សំរិន, សម្តេច ហ៊ុន សែន, សម្តេច ទៀ បាញ់ និងសម្តេច ម៉ែន សំអន៕ 

The post សម្តេចតេជោ ហ៊ុន សែន ប្រាប់ពីមូលហេតុ សម្តេចក្រឡាហោម ស ខេង មិនបានទទួលឋានន្តរសក្តិថ្នាក់ នាយឧត្តមសេនីយ៍ផុតលេខ ផ្កាយមាស ៥ appeared first on .

សម្ដេចក្រឡាហោម ស ខេង​ មានប្រសាសន៍ថា «ឥលូវ វ៉ី សំណាង បាន៨ឆ្នាំហើយ ខ្វះ ២៥ថ្ងៃ ហើយមិនដឹងថាជោគ​វាសនា​គាត់ទៅណាទៀត យើងមិនដឹងដែរ ទៅលើឬទៅក្រោម អាហ្នឹងច្បាប់គឺកំណត់ចឹង, ប៉ុន្តែ អាចថាអភិបាលខេត្តខ្លះគាត់ធ្វើទៅមានបញ្ហានេះបញ្ហានោះមិនអាចធ្វើតទៅទៀតបាន យើងក៏ធ្វើការសម្រួលឲ្យគាត់ដូរកន្លែង ឬក៏ផ្លាស់ប្តូរទៅខេត្តមួយទៀត ឬក៏ទៅក្រសួងជាដើម ហ្នឹងជាគោលការណ៍របស់យើង។ ចឹងទេ វ៉ី សំណាងនេះ គឺអាស្រ័យលើប្រមុខរដ្ឋាភិបាល រដ្ឋមន្ត្រីក្រសួងមហាផ្ទៃ ពេលគាត់ដល់អាណតិ្តហើយ យកគាត់ទៅណា ទុកដាក់គាត់យ៉ាងមិច អាស្រ័យលើរដ្ឋាភិបាល។ ប៉ុន្តែ ខ្ញុំសូមធានាថា ខេត្តកំពង់ស្ពឺ ត្រូវតែមានអភិបាលខេត្ត»។

ការថ្លែងរបស់សម្តេចក្រឡាហោម អតីតរដ្ឋមន្រ្តីក្រសួងមហាផ្ទៃពាក់ព័ន្ធនឹងតំណែងអភិខេត្តកំពង់ស្ពឺរបស់លោក វុី សំណាង គឺនៅចំពោះមុខរដ្ឋមន្រ្តីក្រសួងមហាផ្ទៃបច្ចុប្បន្ន គឺឧបនាយករដ្ឋមន្រ្តី ស សុខា ក៏មានវត្តមាននៅទីនោះផងដែរ។

សូមបញ្ជាក់ថា លោក វ៉ី សំណាង ត្រូវបានរាជរដ្ឋាភិបាលកម្ពុជា តែងតាំងជាអភិបាលខេត្តកំពង់ស្ពឺ ជំនួសលោក អ៊ូ សំអួន អភិបាលខេត្តកំពង់ស្ពឺចាស់ ដែលត្រូវផ្លាស់ទៅជារដ្ឋលេខាធិការក្រសួងអភិវឌ្ឍជនបទ ដែលពិធីប្រកាសផ្ទេរភារកិច្ច តែងតាំងមុខតំណែង បានធ្វើឡើងនៅថ្ងៃទី២២ ខែមីនា ឆ្នាំ២០១៦។

លោក វ៉ី សំណាង គឺជាកូនមន្ត្រីរាជការមួយស្ថិតក្នុង ភូមិព្រៃផ្តៅ ឃុំកញ្ជ្រៀច ស្រុកកញ្ជ្រៀច ខេត្តព្រៃវែង។ ដោយ​សារ​តែមើលឃើញ នូវស្នាដៃនៃការខិតខំ និងសមត្ថភាពពេញលេញលោក វ៉ី សំណាង ត្រូវបានរដ្ឋាភិបាលស្នើព្រះមហា​ក្សត្រ តែងតាំងជាអភិបាលខេត្តកំពង់ស្ពឺ នៅឆ្នាំ២០១៦ ខណៈលោកជាអភិបាលរងខេត្តកំពង់ស្ពឺជាង ១ឆ្នាំ។ មុនឡើងមកកាន់ការងារជាអភិបាលខេត្តកំពតកំពង់ស្ពឺ លោក វ៉ី សំណាង មានបទពិសោធន៍ជិត ២០ឆ្នាំ នៅផ្នែករដ្ឋបាលព្រៃឈើ ហើយជាមន្ត្រីដែលចូលចិត្តធ្វើការតំបន់ព្រៃភ្នំផងដែរ។

លោក វ៉ី សំណាង គឺជាអភិបាលខេត្តដំបូងគេដែលបានបញ្ជាឱ្យទម្លាក់ស្លាកផ្សាយពាណិជ្ជកម្មស្រាបៀរទាំងអស់ចេញ​ពីក្នុងទឹកដីខេត្តកំពង់ស្ពឺ។ យុទ្ធនាការដ៏កម្រក្នុងទីផ្សារសេរីនេះ ទទួលបានការគាំទ្រយ៉ាងពេញទំហឹងតែម្តងមិនថាប្រជាជន ក្នុងមូលដ្ឋានខេត្តកំពង់ស្ពឺ និងមហាជនទូទាំងប្រទេស៕ អត្ថបទ៖ អក្ខរា

The post សម្ដេច ស ខេង៖ ជោគវាសនាអភិបាលខេត្តកំពង់ស្ពឺ នឹងទៅជាយ៉ាងណារងចាំការសម្រេចពីរដ្ឋាភិបាល appeared first on .

ពិធីបើកព្រឹត្តិការណ៍ប្រកួតកីឡាវាយកូនហ្គោល ពានរង្វាន់ឯកឧត្តមអភិសន្តិបណ្ឌិត ស សុខា កាលព្រឹកថ្ងៃទី១១ ខែកុម្ភៈ ឆ្នាំ២០២៤ ក្រោមវត្តមានចូលរួមលេងពីសម្តេចក្រឡាហោម ស ខេង, លោក កែ គឹមយ៉ាន ឧត្តមប្រឹក្សាផ្ទាល់ព្រះមហាក្សត្រ, លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ, លោក ទៀ សីហា ស សុខា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងអភិបាលខេត្តបាត់ដំបង និងអភិបាលខេត្តសៀមរាប។

ការប្រកួតកីឡានោះ មានការចូលរួម រដ្ឋលេខាធិការក្រសួងមហាផ្ទៃ និងជាក្រុមការងាររដ្ឋាភិបាលចុះមូលដ្ឋានខេត្តបាត់ដំបង លោកឧកញ៉ា សប្បុរសជន និងក្រុមការងារជាច្រើនរូបផងដែរ ៕

The post ឧត្តមប្រឹក្សាផ្ទាល់ព្រះមហាក្សត្រ និងឧបនាយករដ្ឋមន្រ្តី៤រូប ចូលរួមបើកព្រឹត្តិការណ៍ប្រកួតកីឡាវាយកូនហ្គោល នៅទីលានឧកញ៉ាម្នាក់ appeared first on .

លោក ស សុខា រដ្ឋមន្ត្រីក្រសួងមហាផ្ទៃ មានប្រសាសន៍ថា អគារថ្មីនៃទីស្តីការក្រសួងមហាផ្ទៃ ត្រូវបានសាងសង់ឡើងក្នុងរយៈពេល១ឆ្នាំ ៣៦០ថ្ងៃ នៅលើផ្ទៃដីទំហំសរុប ៥០៩,៥៣៩ម៉ែត្រការ៉េ ដែលជាការផ្តួចផ្តើម និងស្នើឱ្យមានការសិក្សាដោយសម្តេចក្រឡាហោម ស ខេង អតីតរដ្ឋមន្ត្រីក្រសួងមហាផ្ទៃ ព្រមទាំងការអនុញ្ញាតឱ្យមានការសាងសង់អគារថ្មីទីស្តីការក្រសួងមហាផ្ទៃ ដែលលេចចេញជារូបរាងនាពេលនេះឡើងដោយសម្តេចតេជោ ហ៊ុន សែន អតីតនាយករដ្ឋមន្ត្រី។

ថ្លែងចេញពីវេទិកាអធិបតី សម្តេចមហាបវរធិបតី ហ៊ុន ម៉ាណែត មានប្រសាសន៍ថា អគារថ្មីនៃទីស្តីការក្រសួងមហាផ្ទៃនេះ គឺជាមរតកមិនអាចកាត់ថ្លៃបាន របស់រាជរដ្ឋាភិបាល នីតិកាលទី៦។ សម្ដេចធិបតីសង្ឃឹមថា ថ្នាក់ដឹកនាំក្រសួងមហាផ្ទៃ នឹងបន្ដបម្រើប្រជាពលរដ្ឋឱ្យអស់លទ្ធភាព ប្រកបដោយប្រសិទ្ធភាពវីជ្ជាជីវៈខ្ពស់។

ជាមួយគ្នានេះ សម្ដេចធិបតី ក៏បានថ្លែងអំណរគុណដល់គ្រប់ភាគីពាក់ព័ន្ធទាំងអស់ ដែលបានជួយជ្រោមជ្រែងដល់ក្រសួងមហាផ្ទៃ ក្នុងការអនុវត្តបេសកម្មរបស់ខ្លួន។ សម្តេចបន្ថែមថា ជាមួយសមិទ្ធផលទាំងនេះ តាងនាមឱ្យក្រសួងមហាផ្ទៃ និងរាជរដ្ឋាភិបាល សម្ដេចធិបតី បានបញ្ជាក់ជូនប្រជាពលរដ្ឋនូវការប្ដេជ្ញាចិត្តក្នុងការបម្រើដល់ប្រជាពលរដ្ឋឱ្យអស់ពីសមត្ថភាព ឱ្យស័ក្តិសមទៅនឹងសេចក្ដីទុកចិត្ត និងការស្រលាញ់របស់ប្រជាពលរដ្ឋ ចំពោះរាជរដ្ឋាភិបាល។

បន្ទាប់ពីបានសំណេះសំណាល និងផ្តល់អនុសាសន៍មួយចំនួនជូនដល់អង្គពិធីរួមមក សម្តេចមហាបវរធិបតី ហ៊ុន ម៉ាណែត បានបំពាក់គ្រឿងឥស្សរិយយសជូនថ្នាក់ដឹកនាំនៃក្រុមហ៊ុនទទួលសិទ្ធិសាងសង់អគារទីស្តីការថ្មីនៃក្រសួងមហាផ្ទៃចំនួន៧រូប។ បន្ទាប់មកទៀត សម្តេចបន្តចុះហត្ថលេខាទុកជាប្រវត្តិសាស្ត្រដ៏ធំធេងទុកនៅលើសៀវភៅក្រាំងមាសរបស់ក្រសួងមហាផ្ទៃ ផងដែរ។

សូមជម្រាបថា អគារថ្មីនេះត្រូវបានសាងសង់នៅលើទីតាំងអគារទីស្តីការចាស់(អគារA) ក្នុងបរិវេណនៃក្រសួងមហាផ្ទៃ ស្ថិតតាមបណ្ដោយមហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន ហើ់យបានប្រារព្ធពិធីបញ្ចុះបឋមសីលាបើកការដ្ឋានសាងសង់នៅថ្ងៃទី១១ ខែវិច្ឆិកា ឆ្នាំ២០២១ ។

សំណង់ស្ថាបត្យកម្ម សំណង់អគារថ្មីនៃទីស្តីការក្រសួងមហាផ្ទៃ ត្រូវបានសាងសង់ឡើងមានរាងបួនជ្រុងទ្រវែង មានបណ្តោយ ១៥៣ម៉ែត្រ ទទឹង ៨៣ម៉ែត្រ កម្ពស់ ៩ជាន់ និងមានផ្ទៃក្រឡាសរុប ១០៥,៥៤៥ម៉ែត្រការ៉េ ហើយអាចផ្ទុកមនុស្សបានសរុបចំនួន ៦,០៥១នាក់ សម្រាប់ចំណតរថយន្តអាចចតរថយន្តក្នុងអគារបានសរុបចំនួន ៣៣០គ្រឿង។ ប្លង់ស្ថាបត្យកម្មជាប្រភេទស្ថាបត្យកម្មក្លាស៊ិក រចនាប័ទ្មខ្មែរ សាងសង់អំពីគ្រឿងបង្គុំបេតុង ជញ្ជាំងឥដ្ឋ ដំបូលប្រក់ក្បឿងស្រកាលិញ មានបុស្បុកចំនួន ៥ យកលំនាំតាមប្រាសាទអង្គរវត្តកំពូលប្រាំ កម្ពស់ ១១៨ម៉ែត្រ និងមានលំហសួនច្បារនៅចំកណ្តាលអគារចំនួន ៣៕

The post អគារថ្មីក្រសួងមហាផ្ទៃដែលផ្តួចផ្តើមដោយឥស្សរជនកំពូល២រូប សម្ពោធឲ្យប្រើប្រាស់ផ្លូវការ appeared first on .

ការប្រកាសឲ្យកូនប្រុសពៅសម្តេចក្រឡាហោម ស ខេង អតីតរដ្ឋមន្រ្តីក្រសួងមហាផ្ទៃ គឺក្រោយតំណែងនេះទំនេរមួយរយៈបន្ទាប់ពីឧត្តមសេនីយ៍ទោ ជួន ណារិន ត្រូវបានតែងតាំងឲ្យកាន់តំណែងជាអគ្គស្នងការរងនគរបាលជាតិ និងផ្ទេរកាន់តួនាទីជាស្នងការដ្ឋាននគរបាលរាជធានីភ្នំពេញ បន្តពីនាយឧត្តមសេនីយ៍ ស ថេត ឡើងមកកាន់តំណែងអគ្គស្នងការនគរបាលជាតិ ជំនួសនាយឧត្តមសេនីយ៍ នេត សាវឿន ដែលត្រូវបានរដ្ឋសភាផ្តល់សេចក្តីទុកចិត្តជាឧបនាយករដ្ឋមន្រ្តី សម្រាប់អាណត្តិទី៧ ក្រោមការដឹកនាំដោយឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្រ្តី។

មុនកាន់តំណែងអគ្គស្នងការរង និងជាស្នងការខេត្តព្រះសីហនុ នៅពេលនេះលោក ស រដ្ឋា ជាអគ្គនាយករង នៃអគ្គនាយកដ្ឋានអន្ដោប្រវេសន៍ ក្រសួងមហាផ្ទៃ និងជាប្រធានសហភាពសហព័ន្ធយុវជនកម្ពុជាប្រចាំខេត្តបាត់ដំបងផងដែរ។

សូមជម្រាបជូនថា មុនការតែងតាំងលោក ស រដ្ឋា ជាស្នងការខេត្តព្រះសីហនុ ក៏មានលេចលឺព័ត៌មានថា រាជដ្ឋាភិបាលនឹងមានការផ្លាស់ប្តូរស្នងការខេត្តចំនួន២ ដោយស្នងការខេត្តកណ្តាលនឹងផ្ទេរមកកាន់ខេត្តព្រះសីហនុ ខណៈស្នងការខេត្តព្រៃវែងនឹងផ្ទេរមកកាន់ខេត្តកណ្តាលវិញ ប៉ុន្តែទោះជាយ៉ាងណាអ្វីៗត្រូវបានបញ្ជាក់ការពិតហើយបន្ទាប់លោក ជួន ណារិន្ទ មកកាន់ស្នងការរាជធានីភ្នំពេញ៕

The post ផ្លូវការ! ចាត់តាំងកូនប្រុសពៅសម្តេចក្រឡាហោម ស ខេង កាន់តំណែងជាស្នងការខេត្តព្រះសីហនុ appeared first on .

តាមរយៈសារលិខិតផ្ញើជូនជនរួមជាតិនៅសុក្រទី៤ ខែសីហានេះ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានមានប្រសាសន៍ថា ក្នុងន័យនេះ ក្នុងនាមសម្តេចជាអនុប្រធានគណបក្សប្រជាជនកម្ពុជា បានលើកឡើងថា ជ័យជម្នះ នៃការបោះឆ្នោតជ្រើសតាំងតំណាងរាស្រ្តអាណត្តិទី៧ នៅថ្ងៃទី២៣ ខែកក្កដា ឆ្នាំ២០២៣ របស់គណបក្សប្រជាជនកម្ពុជា ដែលទទួលបានសំឡេងឆ្នោត ៨២,៣០% នៃអត្រាអ្នកបានទៅបោះឆ្នោត ៨៤,៥៩% បានស្តែងឲ្យឃើញនូវកម្លាំងសាមគ្គីជាប្រពៃណីដ៏រឹងមាំរបស់គណបក្សប្រជាជនកម្ពុជា និងការបន្តគាំទ្រយ៉ាងទូលំទូលាយពីសំណាក់ប្រជាពលរដ្ឋ មកលើការដឹកនាំដ៏ត្រឹមត្រូវរបស់គណបក្សប្រជាជនកម្ពុជា។ ប្រសិនបើមានការបែកបាក់ដូចការគិតស្មានរបស់ពួកគេមែននោះ ម្លេះសមគណបក្សប្រជាជនកម្ពុជា មិនមានភាពរឹងមាំ និងមិនទទួលបានការគាំទ្រពីសំណាក់ប្រជាជន កាន់តែច្រើនជាលំដាប់ ពីអាណត្តិមួយ ទៅអាណត្តិមួយនោះទេ។

សម្តេចក្រឡាហោម បានគូសបញ្ជាក់ថា ឧបាយកលបំបែកបំបាក់សាមគ្គីផ្ទៃក្នុងរបស់គណបក្សប្រជាជនកម្ពុជា បានកើតឡើងតាំងពីអតីតកាល ពោលគឺកើតឡើងតាំងពីគណបក្សនយោបាយខ្លះ ពុំទាន់បានចាប់កំណើតផង រហូតដល់មានគណបក្សខ្លះបានត្រូវរលំរលាយបែកបាក់ខ្ចាត់ខ្ចាយ ក៏ពួកគេនៅតែធ្វើនយោបាយដ៏ឆោតល្ងង់ មានឧបាយកលទុច្ចរិត តែផ្ទុយទៅវិញ គណបក្សប្រជាជនកម្ពុជា នៅតែរក្សាបានការឯកភាពផ្ទៃក្នុងដ៏រឹងមាំ និងមានការគាំទ្រពីសំណាក់ប្រជាពលរដ្ឋដ៏ច្រើនលើសលប់ ដើម្បីបន្តដឹកនាំប្រទេសប្រកបដោយសុខសន្តិភាព និងការអភិវឌ្ឍ។

សម្តេចក្រឡាហោម ថ្លែងថា៖ គណបក្សប្រជាជនកម្ពុជា ដែលជាគណបក្សកំពុងដឹកនាំរាជរដ្ឋាភិបាល នាពេលបច្ចុប្បន្ននេះ គឺបានបង្ហាញច្បាស់ក្នុងប្រវត្តិសាស្រ្ត នៃបេសកម្មរបស់ខ្លួន គ្រប់កាលៈទេសៈ គឺសុទ្ធតែមានការចូលរួមពីថ្នាក់ដឹកនាំ និងសមាជិក សមាជិកា គ្រប់ជាន់ថ្នាក់ ដើម្បីផលប្រយោជន៍ប្រជាពលរដ្ឋខ្មែរទូទៅ ដូចសម្តេតេជោ ហ៊ុន សែន ប្រធានគណបក្សប្រជាជនកម្ពុជា លោកបានមានប្រសាសន៍បញ្ជាក់រួចហើយ កាលពីព្រឹកថ្ងៃទី០៣ ខែសីហា ឆ្នាំ២០២៣ ក្នុងពិធីសម្ពោធដាក់ឲ្យប្រើប្រាស់ជាផ្លូវការផ្លូវក្រវ៉ាត់ក្រុងទី៣។

សម្តេចក្រឡាហោម ស ខេង បានគូសបញ្ជាក់ជំហរដ៏មុតមាំរបស់សម្តេចជូនបងប្អូនជនរួមជាតិ ដោយសម្តេចតែងតែគោរព និងគាំទ្រសេចក្តីសម្រេចរបស់មហាសន្និបាត និងសន្និបាតរបស់គណបក្សប្រជាជនកម្ពុជា ក្នុងការជ្រើសតាំង សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ជានាយករដ្ឋមន្រ្តី សម្រាប់អាណត្តិនេះ និងអាណត្តិបន្តបន្ទាប់ទៀត។ ចំពោះការជ្រើសរើសបេក្ខភាពនាយករដ្ឋមន្រ្តី នាពេលអនាគត សម្តេចក៏នឹងគោរពតាមការសម្រេចរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធាន។

ក្នុងន័យនេះ សម្តេចក្រឡាហោម នឹងបន្តគាំទ្រ និងជួយទំនុកបម្រុងឲ្យរដ្ឋាភិបាល អាណត្តិទី៧ ដែលមានឯកឧត្តម បណ្ឌិត ហ៊ុន ម៉ាណែត ជានាយករដ្ឋមន្រ្តី បានបំពេញភារកិច្ចរបស់ខ្លួន ឲ្យទទួលបានជោគជ័យតាមគោលការណ៍ទាំងឡាយដែលសម្រេចដោយសន្និបាតគណបក្សប្រជាជនកម្ពុជា៕

The post សម្តេចក្រឡាហោម ស ខេង ចេញមកទាត់ចោលនូវការលើកឡើងរបស់ក្រុមអ្នកនយោបាយ និងអ្នកវិភាគដែលមាននិន្នាការប្រឆាំង appeared first on .

ប្រសាសន៍សម្តេចតេជោ ហ៊ុន សែន នាយករដ្ឋមន្ត្រី កាលពីពេលថ្មីៗនេះបានបង្ហាញសមាសភាពរាជរដ្ឋាភិបាល និងនាយករដ្ឋមន្ត្រីអាណត្តិទី៧ ដោយឯកឧត្តម ហ៊ុន ម៉ាណែត ជានាយករដ្ឋមន្ត្រីអាណត្តិថ្មីនេះ។ បើទោះបីជាសម្តេចតេជោ ហ៊ុន សែន មិនទាន់បង្ហើបឲ្យដឹងពីសមាសភាពរាជរដ្ឋាភិបាលអាណត្តិថ្មីនេះក៏ដោយចុះ ប៉ុន្តែលិខិតមិនផ្លូវការមួយបានបង្ហាញពីការរៀបចំសមាសភាពដឹកនាំរាជរដ្ឋាភិបាលនីតិកាលទី៧នេះ សុទ្ធសឹងតែជាអ្នកបន្តវេនរបស់គណបក្សប្រជាជនកម្ពុជា វ័យក្រោម៦០ឆ្នាំ។

លិខិតចំនួន២ទំព័របង្ហាញពីការរៀបចំសមាសភាពរាជរដ្ឋាភិបាលបម្រុងទុក កាលពីខែមីនាឆ្នាំ២០២៣នេះ តែមិនទាន់ច្បាស់ការនៅឡើយបានឲ្យដឹងថា ឯកឧត្តម ហ៊ុន ម៉ាណែត កាន់តំណែងនាយករដ្ឋមន្ត្រី, លោក ស សុខា កាន់តំណែងនាយរដ្ឋមន្ត្រីក្រសួងមហាផ្ទៃ ជាកូនប្រុសច្បងសម្តេចក្រឡាហោម ស ខេង, លោក ទៀ សីហា ជារដ្ឋមន្ត្រីក្រសួងការពារជាតិ កូនប្រុសសម្តេចពិជ័យសេនា ទៀ បាញ់, លោក សាយ សំអាល់ ជារដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ជាកូនប្រុសសម្តេចវិបុលភក្តី សាយ ឈុំ ប្រធានព្រឹទ្ធសភា និងមានកូនឥស្សរជនជាច្រើនរូបទៀត។

យោងតាមប្រសាសន៍សម្តេចតេជោ ហ៊ុន សែន បង្ហើបពីការរៀបចំអ្នកបន្តវេនអាណត្តិទី៧ ដែលមានឯកឧត្តម ហ៊ុន ម៉ាណែត ជានាយករដ្ឋមន្ត្រីនោះគឺមានការប្រកាសគាំទ្រយ៉ាងពេញទំហឹង។​ ទន្ទឹមនឹងនេះ មជ្ឈដ្ឋាននានាក៏បាននាំគ្នាជជែកពីរឿងសមាសភាពរដ្ឋមន្ត្រីក្រសួងមហាផ្ទៃ និងរដ្ឋមន្រ្តីក្រសួងការពារជាតិ ថាតើអាចនឹងមានការដាក់កូនរបស់ឥស្សរជនជាដឹកនាំក្រសួងនេះឫយ៉ាងណា គឺលោក ស សុខា និងលោក ទៀ សីហា។ ការដែលអ្នកបន្តវេនទាំង២នេះ ទទួលការចាប់អារម្មណ៍ក៏ព្រោះថា នៅក្នុងជួរគណបក្សប្រជាជនកម្ពុជា សម្តេចក្រឡាហោម ស ខេង និងសម្តេចពិជ័យសេនា ទៀ បាញ់ ជាអនុប្រធានគណបក្ស និងជាឥស្សរជនដែលមានអំណាចដឹកនាំកងកម្លាំងនៅប្រទេសកម្ពុជា។

កូនប្រុសច្បងរបស់សម្តេចក្រឡាហោម ស ខេង គឺលោក ស សុខា បញ្ចប់ បញ្ចប់ការសិក្សាថ្នាក់ឧត្តមសិក្សាពីប្រទេសបារាំង បច្ចុប្បន្នជាអ្នកតំណាងរាស្ត្រមណ្ឌលខេត្តព្រៃវែង លំដាប់លេខរៀងទី២ ហើយមានតួនាទីជារដ្ឋលេខាធិការក្រសួងអប់រំ យុវជន និងកីឡា ដែលមានក្របខ័ណ្ឌដើមជានាយនគរបាលជាតិថ្នាក់ឧត្តមសេនីយ៍ក្រសួងមហាផ្ទៃ។ លោក ស សុខា ទទួលបានការដំឡើងឋានន្តរស័ក្តិថ្នាក់ឧត្តមសេនីយ៍ឯក (ផ្កាយ៣) ដោយព្រះរាជក្រឹត្យលេខ នស/រកត/០៩១៨/៩៩៣ ចុះថ្ងៃទី២២ ខែកញ្ញា ឆ្នាំ២០១៨។

រាជរដ្ឋាភិបាលកាលពីថ្ងៃទី៣ ខែមេសា ឆ្នាំ២០២៣ សម្រេចតែងតាំងលោក ស សុខ ជាអនុប្រធានក្រុម ការងាររាជរដ្ឋាភិបាល ចុះមូលដ្ឋានខេត្តព្រៃវែង។ តួនាទីថ្មីនេះលោកមានភារកិច្ចត្រួតពិនិត្យ និងគាំទ្រ ការអនុវត្តកម្មវិធីនយោបាយ និងយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាល និងជាតំណាងសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ប្រធានក្រុមការងាររាជរដ្ឋាភិបាល ចុះមូលដ្ឋានខេត្តព្រៃវែង។

ក្រៅពីកិច្ចការនយោបាយ បច្ចុប្បន្នលោក ស សុខា ជាអនុប្រធានសហភាពសហព័ន្ធ យុវជនកម្ពុជាទទួលបន្ទុកខេត្តព្រៃវែង និងខេត្តបាត់ដំបង។

ចំណែកលោក ទៀ សីហា ជាកូនប្រុសទី២ សម្តេចពិជ័យសេនា ទៀ បាញ់ ឧបនាយកនាយករដ្ឋមន្ត្រី រដ្ឋមន្ត្រីក្រសួងការពារជាតិ បច្ចុប្បន្នលោកកាន់តំណែងជាអភិបាលខេត្តសៀមរាប។ លោកបានបញ្ចប់ការសិក្សាផ្នែកពាណិជ្ជកម្មពីមហាវិទ្យាល័យ Passy Saint-Honoré នាទីក្រុងប៉ារីស ក្នុងឆ្នាំ២០០១ នៅទីក្រុង បារីសនិងសាលាបណ្ឌិត្យសភាយោធាបារាំង។

លោក ទៀ សីហា អតីតមន្ត្រីកងរាជអាវុធរាជធានីភ្នំពេញ ជាអតីតប្រធានក្រុមនិស្សិតស្ម័គ្រចិត្តវាស់វែងដីធ្លីទូទាំងប្រទេស ប្រចាំខេត្តសៀមរាប។ ហើយកាលណោះលោកត្រូវបានលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា តែងតាំងធ្វើប្រធាន ស.ស.យ.ក ខេតសៀមរាបផងដែរ។

លោក ទៀ សីហា ជានាយទាហានជាន់ខ្ពស់នៃកងយោធពលខេមភូមិន្ទក្រសួងការពារជាតិ ទទួលការតែងតាំងជាឧត្តមសេនីយ៍ត្រី កាលឆ្នាំ២០១១ ជាឧត្តមសេនីយ៍ទោ ក្នុងឆ្នាំ២០១៤ និងតែងតាំងជាឧត្តមសេនីយ៍ឯកផ្កាយ ៣ កាលពីថ្ងៃទី ៧ ខែមករាឆ្នាំ ២០២២។ បច្ចុប្បន្ន លោក ទៀ សីហា ជាសមាជិកគណៈកម្មាធិការកណ្តាល គណបក្សប្រជាជនកម្ពុជា និងជាប្រធានគណបក្សប្រជាជនកម្ពុជាខេត្តសៀមរាប ប្រធានយុវជនគណបក្សប្រជាជនកម្ពុជាខេត្តសៀមរាប៕

The post កូនឧបនាយករដ្ឋមន្ត្រី ២រូប ស្ថិតក្នុងក្រសែភ្នែកមជ្ឈដ្ឋានជាតិ ក្រោយរៀបចំអ្នកបន្តវេន appeared first on .

ជាកិច្ចចាប់ផ្តើម សម្តេចក្រឡាហោម ស ខេង បានមានមតិស្វាគមន៍ចំពោះថ្នាក់ដឹកនាំ និងប្រតិភូសមាគមមូលនិធិសម្ដេចតេជោ SME ដែលបានចូលជួបសម្តែងការគួរសម នាឱកាសនេះ។ ក្នុងនាមសម្តេចតេជោ ហ៊ុន សែន នាយករដ្ឋមន្ត្រី សម្តេចក្រឡាហោម បានថ្លែងអំណរគុណចំពោះសមាគម ដែលបានដើរតួនាទីយ៉ាងសំខាន់ក្នុងការជួយជ្រុំជ្រែងជួយដល់សហគ្រាសធុនតូច និងមធ្យមនៅកម្ពុជា ជាពិសេស បានរៀបចំពិធីជួបជុំ និងពិសាអាហារសាមគ្គីនាពេលកន្លងមករវាងសហគ្រាសធុនតូច និងមធ្យមនៅកម្ពុជា ដែលជាឱកាសជួបជុំបង្កើតភាពស្និលស្នាល និងផ្លាស់ប្តូរយោបល់ជួយគ្នាទៅវិញ ទៅមកផងដែរ។

សម្តេចក្រឡាហោម មានប្រសាសន៍ថា៖ «សកម្មភាពរបស់សមាគមមូលនិធិសម្ដេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា គឺពិតជាមានសារសំខាន់ណាស់ ដែលបានចូលរួមចំណែកជាមួយរាជរដ្ឋាភិបាល ក្នុងការជួយអភិវឌ្ឍសេដ្ឋកិច្ចជាតិ និងកាត់បន្ថយភាពក្រីក្រនៅកម្ពុជា»។

ជាមួយគ្នានេះ សម្ដេចក្រឡាហោម ក៏បានសម្ដែងការកោតសរសើរចំពោះសមាគមមូលនិធិសម្ដេចតេជោ SME ដែលបានខិតខំរៀបចំរចនាសម្ព័ន្ធទាំងនៅរាជធានៅភ្នំពេញ និងតាមបណ្ដាខេត្ត រួមទាំងការរៀបចំជំនួន និងពិធីផ្សព្វផ្សាយនានាក្នុងន័យដើម្បីរួមចំណែកលើកកម្ពស់វិស័យសហគ្រាសធនតូច និងមធ្យមនៅកម្ពុជាស្របតាមទិសដៅរបស់សមាគម។

នាឱកាសនោះដែរ ឧញ៉ា តែ តាំងប៉ ប្រធានសមាគមមូលនិធិសម្ដេចតេជោ SME បានមានប្រសាសន៍ថ្លែងអំណរគុណសម្ដេចក្រឡាហោម ស ខេង ដែលបានឆ្លៀតឱកាសពេលវេលាដ៏មានតម្លៃអនុញ្ញាតជូនប្រតិភូសមាគមបានចូលជួបសម្ដែងការគួរសម។ ទន្ទឹមនេះដែរ លោកឧកញ៉ា ក៏បានរាយការណ៍ជូនសម្តេចក្រឡាហោម ជ្រាបថា បច្ចុប្បន្ន សមាគម​ បានបើកសាខាសហគ្រាសតូច និងមធ្យម បានចំនួន ២៥រាជធានី ខេត្ត ដោយក្នុងនោះសមាគមបានចង់ក្រងជាក្រុម ដើម្បីគាំទ្រក្នុងការជួយគ្នាទៅវិញទៅមក។

បន្ថែមពីនេះ សម្តេចក្រឡាហោម ស ខេង បានណែនាំថា ដោយសារសមាគមមូលនិធិសម្ដេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនេះ ទទួលរៀបចំកាត់ឯកសណ្ឋាន និងសម្លៀកបំពាក់សម្រាប់ឧកញ៉ា និងអ្នកឧកញ៉ានៅកម្ពុជា សម្តេចក្រឡាហោម ក៏បានណែនាំដល់សមាគម ឱ្យធ្វើការរៀបកាត់ និងបំពាក់ឱ្យបានត្រឹមត្រូវ ដោយផ្អែកលើអនុក្រឹត្យរបស់រាជរដ្ឋាភិបាលដែលបានកំណត់ ដើម្បីឱ្យមានការស្លៀកពាក់ឯកសណ្ឋានមានការឯកភាពគ្នាស្របតាមច្បាប់នៃព្រះរាជាណាចក្រកម្ពុជា។

លើសពីនេះទៀត សម្តេចក្រឡាហោម បានជំរុញឱ្យសមាគមបន្តពង្រីកបណ្តាញ ក៏ដូចជាការងារបណ្តុះបណ្តាលសមត្ថភាពបន្ថែមទៀតដល់បណ្តាសហគ្រាសជាសមាជិក ដើម្បីធ្វើយ៉ាងណាឱ្យសេដ្ឋកិច្ចកម្ពុជាមានការរីកចម្រើនបន្ថែមទៀត៕

The post ឧកញ៉ា តែ តាំងប៉ ដឹកនាំគណប្រតិភូសមាគមមូលនិធិសម្តេចតេជោ SME សម្តែងការគួរសមសម្តេចក្រឡាហោម ស ខេង appeared first on .

ការណែនាំរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានកិត្តិយសនៃសមាគមមូលនិធិសម្ដេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា ធ្វើឡើងក្នុងពេលដែលអនុញ្ញាតឱ្យប្រតិភូសមាគម​ ដឹកនាំដោយឧកញ៉ា តែ តាំងប៉ ប្រធានក្រុមប្រឹក្សាភិបាល នៃសមាគម ចូលជួបសម្តែងការគួរសម ដោយមានការអញ្ជើញចូលរួមពីមន្រ្តីជាន់ខ្ពស់ក្រសួងមហាផ្ទៃ ប្រតិភូមក្រុមប្រឹក្សាភិបាលសមាគម នារសៀលថ្ងៃពុធ ទី២៨ ខែមិថុនា។

នៅក្នុងជំនួបនោះ សម្តេចក្រឡាហោម បានណែនាំថា ដោយសារសមាគមមូលនិធិសម្ដេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនេះ ទទួលរៀបចំកាត់ឯកសណ្ឋាន និងសម្លៀកបំពាក់សម្រាប់ឧកញ៉ា និងអ្នកឧកញ៉ានៅកម្ពុជា សម្តេចក្រឡាហោម ក៏បានណែនាំដល់សមាគម ឱ្យធ្វើការរៀបកាត់ និងបំពាក់ឱ្យបានត្រឹមត្រូវ ដោយផ្អែកលើអនុក្រឹត្យរបស់រាជរដ្ឋាភិបាលដែលបានកំណត់ ដើម្បីឱ្យមានការស្លៀកពាក់ឯកសណ្ឋានមានការឯកភាពគ្នាស្របតាមច្បាប់នៃព្រះរាជាណាចក្រកម្ពុជា។

ជាមួយគ្នានេះ សម្តេចក្រឡាហោម បានជំរុញឱ្យសមាគមបន្តពង្រីកបណ្តាញ ក៏ដូចជាការងារបណ្តុះបណ្តាលសមត្ថភាពបន្ថែមទៀតដល់បណ្តាសហគ្រាសជាសមាជិក ដើម្បីធ្វើយ៉ាងណាឱ្យសេដ្ឋកិច្ចកម្ពុជាមានការរីកចម្រើនបន្ថែមទៀត។

សូមជម្រាបជូនថា រាជរដ្ឋាភិបាលកម្ពុជា នៅថ្ងៃទី១៥ ខែវិច្ចិកា ឆ្នាំ២០២១ បានសម្រេចចេញអនុក្រឹត្យឲ្យប្រើប្រាស់ឯកសណ្ឋានគោរមងារផ្លូវការរបស់អ្នកឧកញ៉ា ឧកញ៉ានៅកម្ពុជា ដើម្បីប្រើប្រាស់ក្នុងពេលចូលរួមពិធីបុណ្យជាតិ ប្រពៃណីជាតិ និងពិធីផ្លូវការផ្សេងៗ។

អនុក្រឹត្យចំនួន ៨ទំព័រដែលចុះហត្ថលេខាដោយសម្តេចតេជោ ហ៊ុន សែន នាយករដ្ឋមន្រ្តីបានសង្កត់ធ្ងន់ទៅលើជនណាដែលបានប្រើប្រាស់ ឬក្លែងបន្លំឯកសណ្ឋានគោរមងារផ្លូវការ សញ្ញាស័ក្តិ​ មេដាយ និងបន្តោងខ្សែក សម្រាប់ពាក់លើឯកសណ្ឋានគោរមងារអ្នកឧកញ៉ា និងឧកញ៉ា នឹងត្រូវផ្តន្ទាទោសទៅតាមច្បាប់ជាធរមាន តាមមាត្រា ១២ ​ក្នុងអនុក្រឹត្យរបស់រាជរដ្ឋាភិបាលកម្ពុជា។

ក្នុងអនុក្រឹត្យដដែល រដ្ឋាភិបាលបានផ្តល់សិទ្ធិឲ្យសមាគមមូលនិធិសម្តេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា ពិនិត្យ រៀបចំ និងផ្តល់តាមគោលការណ៍ធ្វើការកំណត់ឯកសណ្ឋានគោរមងារផ្លូវការ សញ្ញាស័ក្តិ មេដាយ និងបន្តោងខ្សែក សម្រាប់ពាក់លើឯកសណ្ឋានគោរមងារអ្នកឧកញ៉ា ឧកញ៉ា នៅប្រទេសកម្ពុជា៕

The post សម្តេចក្រឡាហោម ស ខេង ជំរុញឱ្យឧកញ៉ា តែ តាំងប៉ រៀបចំកាត់ឯកសណ្ឋាន និងសម្លៀកបំពាក់សម្រាប់ឧកញ៉ា និងអ្នកឧកញ៉ាឱ្យបានត្រឹមត្រូវ appeared first on .