ពិធីខាងលើនេះ ធ្វើឡើងក្រោមអធិបតីភាពរបស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​នៃព្រះរាជាណាចក្រកម្ពុជា។ ពិធីនេះក៏មានការចូលរួមផងដែរពីសំណាក់តំណាងក្រសួង ស្ថាប័នរាជរដ្ឋាភិបាល ដៃគូអភិវឌ្ឍន៍ សមាគមវិស័យក្រៅប្រព័ន្ធ និងតំណាងសហគ្រាសខ្នាតតូច អាជ្ញាធរមូលដ្ឋាន និងមន្ទីរការងារខេត្ត តំណាងយុវជន សហជីព សង្គមស៊ីវិល ដៃគូទំនាក់ទំនង ប្រព័ន្ធផ្សព្វផ្សាយ និងអ្នកពាក់ព័ន្ធជាច្រើន។​

គោលបំណងនៃពិធីនេះគឺដើម្បី៖ ១. ដាក់ឱ្យអនុវត្តជាផ្លូវការកម្មវិធីថ្នាក់ជាតិស្ដីពី «ប័ណ្ណជំនាញ សម្រាប់សេដ្ឋកិច្ច​ក្រៅប្រព័ន្ធ» ដើម្បីលើកកម្ពស់ និងគាំទ្រដល់ការអភិវឌ្ឍសេដ្ឋកិច្ចក្រៅប្រព័ន្ធ; ២. ជំរុញកិច្ចសហប្រតិបត្តិការ និង​ភាពជាដៃគូជាមួយភាគីពាក់ព័ន្ធ ដើម្បីធានាការអនុវត្តប្រកបដោយប្រសិទ្ធភាព និងការផ្សព្វផ្សាយ កម្មវិធីប័ណ្ណ​ជំនាញ (Skills Voucher) ទូទាំងប្រទេស និង៣. ដើម្បីផ្សព្វផ្សាយកម្មវិធីថ្មីៗ របស់ SDF សម្រាប់ការអភិវឌ្ឍ​ជំនាញ និងពង្រឹងសមត្ថភាពកម្លាំងពលកម្មឱ្យត្រូវ នឹងតម្រូវការទីផ្សារ។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានសម្តែង​នូវការអបអរសាទរ និង ការកោតសរសើរ ចំពោះមូលនិធិអភិវឌ្ឍន៍ជំនាញ, ក្រសួងឧស្សាហកម្ម វិទ្យាសាស្ត បច្ចេកវិទ្យា និង នវានុវត្តន៍, គណៈកម្មាធិការសេដ្ឋកិច្ច និងធុរកិច្ចឌីជីថល, ព្រមទាំង ដៃគូពាក់ព័ន្ធផ្សេង​ទៀត ដែលបានសហការគ្នាយ៉ាងជិតស្និទ្ធ រហូតធ្វើឲ្យគំនិតផ្តួចផ្តើមនៃកម្មវិធី «បណ្ណជំនាញសម្រាប់សេដ្ឋកិច្ចក្រៅប្រព័ន្ធ» នេះ លេចចេញជារូបរាងឡើង ក្នុងគោលបំណងផ្តល់ឱកាសដល់បងប្អូនប្រជាពលរដ្ឋ ក្នុងវិស័យសេដ្ឋកិច្ចក្រៅប្រព័ន្ធ ក៏ដូចជាបងប្អូនប្រជាពលរដ្ឋទូទៅ ដែលមានតម្រូវការចាំបាច់ ក្នុងការពង្រឹងសមត្ថភាព និងជំនាញរបស់ខ្លួន ស្របតាមតម្រូវការទីផ្សារការងារ ទាំងបច្ចុប្បន្ន និងអនាគត។

ឯកឧត្តមបានបន្ថែមថា ព្រឹត្តិការណ៍នាថ្ងៃនេះ បានឆ្លុះបញ្ចាំងយ៉ាងច្បាស់ អំពីទិសដៅគោលនយោបាយ​ដ៏ច្បាស់​លាស់ និង ឆន្ទៈដ៏មោះមុត របស់រាជរដ្ឋាភិបាល ក្រោមការដឹកនាំដ៏ស្វាហាប់ ឈ្លាសវៃ និង ប៉ិនប្រសប់ ប្រកប​ដោយចក្ខុវិស័យវែងឆ្ងាយ របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការអភិវឌ្ឍមូលធនមនុស្ស និង ការលើកកម្ពស់ជីវភាពប្រជាពលរដ្ឋក្នុងសេដ្ឋកិច្ចក្រៅប្រព័ន្ធ ដែលជាកម្លាំងចលករដ៏សំខាន់ រួមចំណែក​ជំរុញ​កំណើនសេដ្ឋកិច្ចជាតិ ដូចត្រូវបានដាក់ចេញក្នុងយុទ្ធសាស្តបញ្ចកោណ ដំណាក់កាលទី ១ ដោយក្នុងនោះ “មនុស្ស” ត្រូវបានកំណត់ជាអាទិភាពគន្លឹះទីមួយ៕

ក្នុងន័យនេះ កម្មវិធី “បណ្ណជំនាញសម្រាប់សេដ្ឋកិច្ចក្រៅប្រព័ន្ធ” ដែលត្រូវបានប្រកាសដាក់ឲ្យអនុវត្តជាផ្លូវការ នាថ្ងៃ​នេះ នឹងរួមចំណែកដ៏សំខាន់ដល់ការថែបំប៉ន និងការអភិវឌ្ឍតួអង្គសេដ្ឋកិច្ចក្រៅប្រព័ន្ធឲ្យកាន់តែមានសមត្ថភាព, ចំណេះជំនាញ, ផលិតភាព និងសមត្ថភាពខ្ពស់ជាងមុន និងអាចរីកធំធាត់ មានភាពធន់ និងភាពរឹងមាំជាងមុន ដើម្បីប្រែក្លាយទៅជាតួអង្គសេដ្ឋកិច្ចក្នុងប្រព័ន្ធ ស្របតាមទិសដៅនៃ “យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ច​ក្រៅប្រព័ន្ធឆ្នាំ២០២៣-២០២៨”។

ជាទិសដៅទៅមុខ ដើម្បីធានាថា ការដាក់ឲ្យអនុវត្តនូវ “បណ្ណជំនាញសម្រាប់សេដ្ឋកិច្ចក្រៅប្រព័ន្ធ” នេះ គឺជាការ​ចាប់ផ្តើមនៃចលនាជាតិមួយដ៏រស់រវើកមួយ ឯកឧត្តមឧបនាយករដ្ឋមន្ត្រី បានផ្ដល់នូវអនុសាសន៍ និងការតម្រង់ទិស​មួយចំនួន ដល់ក្រសួង ស្ថាប័ន ដៃគូអភិវឌ្ឍ និងវិស័យឯកជន ដូចជា៖ ១. ការអនុវត្តដោយភាពបត់បែន ប្រកប​ដោយ​គណនេយ្យភាព (Flexibility with accountability), ២. ការផ្សារភ្ជាប់ និងការផ្ទេរចំណេះជំនាញ និងបច្ចេក​វិទ្យាពីក្រុមហ៊ុនធំៗជួរមុខ ទៅតួអង្គសេដ្ឋកិច្ចក្រៅប្រព័ន្ធ និងសហគ្រាសធុនតូច និងមធ្យម ក្នុងខ្សែច្រវ៉ាក់តម្លៃ, ៣. ការផ្សារភ្ជាប់ការអភិវឌ្ឍន៍ជំនាញ ទៅនឹងប្រភពទន់វិនិយោគ និងទីផ្សារ, ៤. ការប្រើប្រាស់ប្រព័ន្ធ CAMIE ជាច្រក​ទ្វារ​យុទ្ធសាស្ត្រទៅកាន់កិច្ចគាំពារសង្គម និងអត្ថប្រយោជន៍ដែលគាំទ្រដោយរាជរដ្ឋាភិបាល និង៥. ការដោះស្រាយ​ឬសគល់នៃបញ្ហា (Addressing Root Causes)៕

The post អ្នកឧកញ៉ា ឡាវ កាង តំណាងអ្នកឧកញ៉ា គិត ម៉េង ដឹកនាំសមាជិកសភាពាណិជ្ជកម្មកម្ពុជា ចូលរួមពិធីដាក់ឱ្យ​អនុវត្តជាផ្លូវការថ្នាក់ជាតិស្តីពីប័ណ្ណជំនាញសម្រាប់សេដ្ឋកិច្ចក្រៅប្រព័ន្ធ appeared first on .

សន្និបាតបូកសរុប​លទ្ធផល​នៃការអនុវត្តការងារឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងរៀបចំ​ដែន​ដី បានប្រព្រឹត្តឡើងក្រោមអធិបតីភាពរបស់ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំ​ដែន​ដី នគរូបនីយកម្ម និងសំណង់។ កម្មវិធីនេះក៏មានការចូលរួមផងដែរពីសំណាក់មន្ត្រីពាក់ព័ន្ធ នៃក្រសួងរៀបចំ​ដែន​ដី នគរូបនីយកម្ម និងសំណង់, តំណាងក្រសួង ស្ថាប័នពាក់ព័ន្ធនៃរាជរដ្ឋាភិបាល, អភិបាល អភិបាលរង​រាជធានី​ខេត្ត, តំណាងគ្រឹះស្ថាន សមាគម និងអ្នកពាក់ព័ន្ធជាច្រើនទៀត។

រាជរដ្ឋាភិបាលនៃព្រះរាជាណាចក្រកម្ពុជានីតិកាលទី៧ នៃរដ្ឋសភា បានដាក់ចេញនូវយុទ្ធសាស្ត្របញ្ចកោណ- ដំណាក់កាលទី១ ឆ្នាំ២០២៣-២០២៨ ដើម្បីបន្តស្មារតីនៃសមិទ្ធផលរបស់រាជរដ្ឋាភិបាលនាពេលកន្លងមក ដែលជាមរតកនៃរដ្ឋបុរសរបស់កម្ពុជា ពិសេស ព្រះករុណាព្រះបាទ សម្តេចព្រះបរមរតនកោដ្ឋ “ បិតាឯករាជ្យជាតិ” រហូតមកដល់ សម្តេចអគ្គមហាសេនាបតីតេជោ ហ៊ុន សែន “បិតាសន្តិភាព” ដែលបានតស៊ូលះបង់គ្រប់បែបយ៉ាង ដើម្បីរំដោះជាតិ បង្រួបបង្រួមជាតិ និងអភិវឌ្ឍប្រទេសជាតិ រហូតទទួលបានសុខសន្តិភាពពេញលេញ ហើយបាន​បន្ត​ដំណើរមកដល់សហសម័យកម្ពុជា ដែលជាយុគសម័យទំនើបនៃការរីកចម្រើនទៅមុខក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឈរលើគោលការណ៍ស្នូលនៃការដឹកនាំ តាមរយៈការបន្តនិរន្តរភាពការងារនិងដំណើរការស្ថាប័ន ការរក្សា ស្មារតី និងសតិអារម្មណ៍ឱ្យបាននឹងនរ ការរក្សាសាមគ្គីភាព និងឯកភាពផ្ទៃក្នុង និងការកសាងបាននូវជំនឿ និងទំនុកចិត្ត​លើ​ការដឹកនាំជារួម ក្រសួងរៀបចំដែនដី នគរូបនីយកម្ម និងសំណង់ បាននិងកំពុងចូលរួមចំណែកយ៉ាងស្វាហាប់​ក្នុងការអនុវត្តគោលនយោបាយ ផែនការយុទ្ធសាស្ត្រ និងកម្មវិធីនយោបាយរបស់រាជរដ្ឋាភិបាល ជាពិសេស យុទ្ធសាស្ត្របញ្ចកោណដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព ជាមួយនឹង​អាទិភាពគន្លឹះទាំង ៥ គឺមនុស្ស ផ្លូវ ទឹក ភ្លើង និងបច្ចេកវិទ្យា។

សូមជម្រាបថា នៅក្នុងឆ្នាំ២០២៥ នេះ ក្រសួងរៀបចំដែនដី បានបន្តដាក់ចេញនិងអនុវត្តយ៉ាងខ្ជាប់ខ្ជួន​នូវសមរភូមិ​ការងារសំខាន់ៗ​ចំនួន ៨ ដោយផ្តោតសំខាន់ទៅលើការ លើកកម្ពស់ជីវភាពរស់នៅរបស់ប្រជាពលរដ្ឋ និងការជំរុញ​កំណើនសេដ្ឋកិច្ច​ជាតិ​​ប្រកបដោយចីរភាព ដើម្បីរក្សា សន្តិសុខនយោបាយ សន្តិសុខនិងសុវត្ថិភាពសេដ្ឋកិច្ច ខឿន​ការពារជាតិ និងការផ្តល់​ទំនុកចិត្តនិងការជឿជាក់លើកម្ពុជា៕

The post អ្នកឧកញ៉ា ឡាវ កាង និងឧកញ៉ា តាន់ មុនីវណ្ណ ដឹកនាំប្រតិភូសភាពាណិជ្ជកម្មពាក់ព័ន្ធ ចូលរួមសន្និបាតបូក​សរុប​លទ្ធផលនៃការអនុវត្តការងារឆ្នាំ២០២៥ របស់ក្រសួងរៀបចំដែន​ដី appeared first on .

ការអំពាវរបស់អ្នកឧកញ៉ាខាងលើនេះ បានធ្វើឡើងក្នុងឱកាសអ្នកឧកញ៉ា ដឹកនាំប្រតិភូសភាពាណិជ្ជកម្មកម្ពុជា ចូលរួម “វេទិការធុរកិច្ចវៀតណាម-កម្ពុជា ឆ្នាំ២០២៥” នៅទីក្រុងហូជីមិញ ប្រទេសវៀតណាម កាលពីថ្ងៃទី១១ ខែតុលា ឆ្នាំ២០២៥។

វេទិការធុរកិច្ចវៀតណាម-កម្ពុជា ឆ្នាំ២០២៥ រៀបចំឡើងក្នុងគោលបំណង ដើម្បីពង្រឹងទំនាក់ទំនងកិច្ចសហប្រតិបត្តិការ ការទូតសេដ្ឋកិច្ច និងជម្រុញការផ្សារភ្ជាប់សកម្មភាពពាណិជ្ជកម្ម និងការវិនិយោគទ្វេភាគី រវាងវៀតណាម និងកម្ពុជាឱ្យកាន់តែប្រសើរ ឡើងបន្ថែមទៀត។

ក្នុងវេទិការធុរកិច្ចនេះ អ្នកឧកញ៉ា ឡាវ កាង បានថ្លែងថា វេទិកាធុរកិច្ចវៀតណាម-កម្ពុជា ឆ្នាំ២០២៥ រៀបចំឡើងនាពេលនេះគឺជា កាលានុវត្តភាពដ៏ល្អសម្រាប់ឱ្យធុរជន និង វិនិយោគិន នៃប្រទេសទាំងពីរ ធ្វើការផ្សព្វផ្សាយពី ផលិតផល និងសេវាកម្ម របស់ខ្លួន ហើយក៏ជាឱកាសដ៏ល្អ ដើម្បីឱ្យធុរជន និងវិនិយោគិន បានជួបប្រាស្រ័យ ទាក់ទងគ្នាដោយផ្ទាល់ ដើម្បីសម្រួលដល់ការពិភាក្សារកដៃគូសក្តានុពល ការបណ្តាក់ទុនរួមគ្នា និងកាលានុវត្តភាពទីផ្សារតាមវិស័យនានា។

ជាមួយគ្នានេះផងដែរ អ្នកឧកញ៉ា ក៏បានលើកទឹកចិត្តដល់ធុរជន និងវិនិយោគិនវៀតណាម មកវិនិយោគបន្ថែមនៅកម្ពុជា ព្រោះក្រោមការដឹកនាំដ៏ឈ្លាសវៃ របស់ សម្តេចមហាបរវធិបតី ហ៊ុន ម៉ាណែត នាយករដ្ឋមន្រ្តី នៃប្រទេសព្រះរាជាណាចក្រកម្ពុជា បានជម្រុញកំណែទម្រង់ស៊ីជម្រៅ ដើម្បីកែលម្អបរិយាកាសធុរកិច្ច និងពង្រឹង ភាពប្រកួតប្រជែង ក្នុងទីផ្សារពិភពលោក។ ជាពិសេសរាជរដ្ឋាភិបាលបានដាក់ចេញនូវ កម្មវិធីពិសេសជំរុញការ វិនិយោគក្នុងខេត្តទាំងបួននៅភូមិភាគឦសាន នៃព្រះរាជាណាចក្រកម្ពុជា ដែលមានដូចជា ខេត្តក្រចេះ ខេត្តស្ទឹងត្រែង ខេត្តរតនគិរី និងខេត្តមណ្ឌលគិរី ដែលជាខេត្ត មានសក្តានុពលលើដំណាំកសិកម្ម កសិ-ឧស្សាហកម្ម និងទេសចរណ៍។

លើសពីនេះ ក៏មានកម្មវិធីពិសេសដោយមានការគាំទ្រលើ៖ ១. វិធានការផ្នែកពន្ធដារ និងពន្ធគយ, ២.ការផ្តល់ហិរញ្ញប្បទានក្រោមអត្រាការប្រាក់សមរម្យ និង ៣.ការជួយកាត់បន្ថយថ្លៃដើមផលិតកម្ម, ការសម្រួល នីតិវិធី និងការគាំទ្រសកម្មភាពវិនិយោគឯកជន។ ហើយកម្ពុជាក៏មានទីផ្សារទូលំទូលាយក្នុងពិភពលោក ក្រោមក្របខណ្ឌនៃកិច្ចព្រមព្រៀងពាណិជ្ជកម្មសេរី ពហុភាគី និងទ្វេភាគី រួមមាន កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP), កិច្ចព្រមព្រៀងពាណិជ្ជកម្មសេរីកម្ពុជា-ចិន, កិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង, និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងអេមីរ៉ាតអារ៉ាប់រួមជាដើម។

សូមជម្រាបថា ក្នុងឆ្នាំ២០២៤ ទំហំពាណិជ្ជកម្មទ្វេភាគីរវាងប្រទេសកម្ពុជា-វៀតណាម បានកើនឡើងគួរឱ្យកត់សម្គាល់ ដោយមានទំហំទឹកប្រាក់សរុប ១០.៩ប៊ីលានដុល្លារ កើនឡើង ៥៣.៣៤% បើធៀប ទៅនឹងឆ្នាំមុន ហើយគោលដៅសម្រាប់ឆ្នាំ២០២៥នេះ ទំហំពាណិជ្ជកម្មរវាងប្រទេសទាំងពីរ រំពឹងថានឹងឈានទៅដល់ ២០ប៊ីលានដុល្លារ៕

The post អ្នកឧកញ៉ា ឡាវ កាង លើកទឹកចិត្តដល់ធុរជន និងវិនិយោគិន​វៀតណាម មកវិនិយោគបន្ថែមនៅកម្ពុជា appeared first on .

សភាពាណិជ្ជកម្មកម្ពុជា បានឱ្យដឹងថា វេទិកាធុរកិច្ចនេះរៀបចំឡើងស្របតាម អនុស្សារណៈនៃការយោគយល់គ្នា រវាង សភាពាណិជ្ជកម្មកម្ពុជា និង សមាគមសហព័ន្ធធុកិច្ចវៀតណាមកម្ពុជា កាលពីថ្ងៃទី១៥ ខែកក្កដា ឆ្នាំ២០២៥ ស្តីពីការចូលរួមជំរុញកិច្ចសហប្រតិបត្តិការពាណិជ្ជកម្ម វិនិយោគ និងសេដ្ឋកិច្ច រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម។

ជាមួយគ្នានេះ វេទិការនេះ គឺជាកាលានុវត្តភាពសម្រាប់ឱ្យធុរជន និងវិនិយោគិន វៀតណាម និងកម្ពុជា ធ្វើការផ្សព្វផ្សាយពីផលិតផល និងសេវាកម្មរបស់ខ្លួន ហើយក៏ជាឱកាស ដើម្បីឱ្យប្រទេសទាំងពីរ បានជួបប្រាស្រ័យ ទាក់ទងគ្នាដោយផ្ទាល់ ដើម្បីស្វែងយល់ពីផលិតផល និងពង្រីកកិច្ចសហប្រតិបត្តិការអាជីវកម្ម និងវិនិយោគ៕

The post អ្នកឧកញ៉ា គិត ម៉េង ចាត់តាំងអ្នកឧកញ៉ា ឡាវ កាង ដឹកនាំគណៈប្រតិភូសភាពាណិជ្ជកម្មកម្ពុជា ចូលរួម “វេទិការធុរកិច្ចវៀតណាម-កម្ពុជា ឆ្នាំ២០២៥” នៅប្រទេសវៀតណាម appeared first on .

សភាពាណិជ្ជកម្មកម្ពុជា ត្រូវបានបង្កើតឡើងក្នុងឆ្នាំ១៩៩៥ ដោយមានទំនាក់ទំនងនៅទូទាំងប្រទេស ព្រមទាំងដៃគូកម្រិតតំបន់ និងពិភពលោក។ បច្ចុប្បន្ន មានសភាពាណិជ្ជកម្មកម្ពុជា មានសភាពាណិជ្ជកម្មរាជធានី-ខេត្ត ចំនួនសរុប១៨ ដែលស្ថិតនៅក្រោមសភាពាណិជ្ជកម្មកម្ពុជា។

សូមជម្រាបថា សភាពាណិជ្ជកម្ម គឺជាស្ថាប័នមួយមិនសំដៅរកប្រាក់ចំណេញ ដែលសមាជិកភាពមានលក្ខណៈស្ម័គ្រចិត្ត និងជាស្ថាប័នតំណាងការពារផលប្រយោជន៍ជូនវិស័យឯកជនលើផ្នែកពាណិជ្ជកម្ម ឧស្សាហកម្ម សិប្បកម្ម សេវាកម្ម និងកសិកម្ម ដោយធ្វើសកម្មភាពបម្រើឲ្យសេដ្ឋកិច្ចជាតិ ក្នុងដែនសមត្ថកិច្ចរបស់ខ្លួន និងនៅទូទាំងប្រទេស៕

The post អ្នកឧកញ៉ា គិត ម៉េង ចេញសេចក្តីប្រកាសចាត់តាំង អ្នកឧកញ៉ា ឡាវ កាង ជាប្រធានស្តីទីសភាពាណិជ្ជកម្មកម្ពុជា appeared first on .

ក្នុងឱកាសនេះដែរ អ្នកឧកញ៉ា ឡាវ កាង រួមទាំងគណៈប្រតិភូសមាគមឧកញ៉ាកម្ពុជា បានសម្តែងនូវអំណរគុណចំពោះថ្នាក់ដឹកនាំមន្ទីរពេទ្យទាំងអស់ ក៏ដូចជាក្រុមគ្រូពេទ្យ និងបុគ្គលិកសុខាភិបាលគ្រប់ផ្នែក ដែលបានកំពុងបំពេញនាទីជាកងទ័ពអាវសជួរក្រោយដោយឈរលើសាមគ្គីភាពជាធ្លុងមួយយកចិត្តទុកដាក់មិនរាថយបម្រើការថែទាំព្យាបាលអ្នកជំងឺជាពិសេសវីរកងទ័ពដែលបានរងរបួសក្នុងសមរភូមិប្រយុទ្ធតទល់និងបរទេសឈ្លានពានប្រកបដោយវិជ្ជាជីវៈខ្ពស់។

សូមបញ្ជាក់ថា នាសប្តាហ៍កន្លងមក ថ្នាក់ដឹកនាំ ក៏ដូចជាសមាជិក នៃសមាគមឧកញ៉ាកម្ពុជា ក៏បានចុះសួរសុខទុក្ខព្រមទាំងនាំយកនូវអំណោយជាថវិកា ជូនដល់វីរយុទ្ធជនដែលបានរងរបួស និងកំពុងសម្រាកព្យាបាលនៅមន្ទីរពេទ្យកងពលថ្មើជើងលេខ៤២ ក្នុងខេត្តឧត្តរមានជ័យនេះផងដែរ ហើយដោយបានមើលឃើញនូវការលំបាក និងកង្វះខាតសម្ភារៈ ទើបសមាគមបានសម្រេចផ្តល់ជូនបន្ថែមទៀតនូវម៉ូតូ និងកង្ហារនាពេលនេះតែម្តង៕

The post អ្នកឧកញ៉ា ឡាវ កាង ដឹកនាំគណៈប្រតិភូសមាគមឧកញ៉ាកម្ពុជា នាំយកអំណោយម៉ូតូ និងកង្ហារ ជូនមន្ទីរពេទ្យកងពលថ្មើជើងលេខ៤២ ក្នុងខេត្តឧត្តរមានជ័យ appeared first on .

ពិធីសម្ពោធដាក់ឱ្យដំណើរការខ្សែសង្វាក់ផលិតកម្មថ្មី រថយន្ត FORD ខាងលើនេះ មានការអញ្ជើញចូលរួមពីថ្នាក់ដឹកនាំ ប្រតិភូអមរាជរដ្ឋាភិបាល មន្ត្រីរាជការនៃរដ្ឋបាលខេត្ត ថ្នាក់ដឹកនាំ បុគ្គលិកក្រុមហ៊ុន ភ្ញៀវជាតិអន្តរជាតិជាច្រើនរូប។ ក្នុងនោះដែរ គេឃើញមានវត្តមាន អ្នកឧកញ៉ា ទុយ គី ប្រធានសភាពាណិជ្ជកម្មខេត្តពោធិ៍សាត់ និងជាអនុប្រធានសភាពាណិជ្ជកម្មកម្ពុជា អ្នកឧកញ៉ា ឡូវ កាង សមាជិកក្រុមប្រឹក្សាភិបាលសមាគមឧកញ៉ាកម្ពុជា, អ្នកឧកញ៉ា សំ សុខនឿន, ជំទាវឧកញ៉ា នឹម វណ្ណៈ, ឧកញ៉ា លន់ ពៅ, ជំទាវឧកញ៉ា នួន ពេជ្រសុផល, ឧកញ៉ា ណាង សុធី ព្រមទាំងឧកញ៉ាៗមួយចំនួនទៀតផងដែរ។

សូមជម្រាបថា រថយន្ត Ford ជាម៉ាករថយន្តដ៏ល្បីរបស់សហរដ្ឋអាមេរិក ដែលមានលើទីផ្សាររបស់កម្ពុជាយូរឆ្នាំមកហើយ។ កាលពីឆ្នាំ២០២២ ក្រុមហ៊ុន បានរៀបចំពិធីសម្ពោធដាក់ឱ្យដំណើរការរោង ចក្រដំឡើងរថយន្ត ក្រោមអធិបតីភាពដ៏ខ្ពង់ខ្ពស់បំផុតសម្ដេចមហាបវរធិបតី ហ៊ុន ម៉ាណែត ដោយបានបណ្តាក់ទុនវិនិយោគដំបូងចំនួន ២១លានដុល្លារ ដើម្បីសាងសង់រោងចក្រដំឡើងរថយន្តលើផ្ទៃដីចំនួន ៥ហិកតា។

យ៉ាងណាមិញ សម្រាប់ការសម្ពោធនាថ្ងៃនេះគឺ ក្រុមហ៊ុនបានបង្កើតរោងចក្រដំឡើងគ្រឿងបង្គុំថ្មីបន្ថែមមួយទៀត (Sub-Assembly Plant) ដែលអាចផ្ដល់ឱកាសការងារបានជាច្រើនកន្លែងទៀត។ លើសពីនោះ ក្រុមហ៊ុនបានពង្រីកការវិនិយោគពី ២១លានដុល្លារអាមេរិក ទៅ ២៦,៨លានដុល្លារអាមេរិក និងបានពង្រីកផ្ទៃដីសាងសង់រោងចក្រពី ៥ហិកតា រហូតដល់ ១២ហិកតា។ លោក Kevin Whitcraft ប្រធានក្រុមហ៊ុន RMA Group បានឱ្យដឹងទៀតថា ក្រុមហ៊ុនក៏បានផ្លាស់ប្តូរច្រវាក់ផលិតកម្មពីកម្រិតដំឡើង CKD មកកម្រិត IKD-1 ដែលអាចបង្កើនសមត្ថភាព ផលិតរថយន្តលើសពី ១០,០០០គ្រឿងក្នុងមួយឆ្នាំ៕

The post អ្នកឧកញ៉ា ឧកញ៉ាៗច្រើនរូប ចូលរួមពិធីសម្ពោធដាក់ឱ្យដំណើរការខ្សែសង្វាក់ផលិតកម្មថ្មី រថយន្ត FORD នៅស្រុកក្រគរ ខេត្តពោធិ៍សាត់ appeared first on .

ដំណើរបំពេញបេសកកម្មជំរុញពាណិជ្ជកម្ម និងវិនិយោគរបស់លោក ស៊ុន ចាន់ថុល នៅពេលនេះមានការអញ្ជើញអមដំណើរដោយអ្នកឧកញ៉ា ឧកញ៉ាគ្រាក់ៗជាម្ចាស់សម្ព័ន្ធក្រុមហ៊ុនល្បីៗ រួមមាន៖ អ្នកឧកញា លាង ឃុន សហស្ថាបនិក និងប្រធានអគ្គនាយកក្រុមហ៊ុន ជីប ម៉ុង គ្រុប, អ្នកឧកញ៉ា វិញ ហួរ ម្ចាស់តំបន់សេដ្ឋកិច្ច​ពិសេស​កំពត, អ្នកឧកញ៉ា ឡាវ កាង ​ប្រធាន​ក្រុមហ៊ុន Lav Kang Import & Export Co., LTD, អ្នកឧកញ៉ា ទី ពិសិដ្ឋ អគ្គនាយក និង​ជា​ប្រធាន​ប្រតិបត្តិ​ក្រុមហ៊ុន ឈុន ហុង គ្រុប និងឧកញ៉ា ទ្រី ដាលុច អគ្គនាយករងក្រុមហ៊ុន ទ្រី ភាព គ្រុប។

ក្នុងដំណើរទស្សនកិច្ចគោះទ្វារវិនិយោគថ្ងៃដំបូង លោក ស៊ុន ចាន់ថុល និងគណៈប្រតិភូ បានទស្សនកិច្ចនៅសម្ព័ន្ធ Sailun Group Co., Ltd. និងបានទស្សនាមន្ទីរពិសោធន៍ Stonelab សាលពិព័រណ៍មជ្ឈមណ្ឌលកៅស៊ូជាតិ ព្រមទាំងបានជួបពិភាក្សាជាមួយសម្ព័ន្ធ Sailun Group នៅក្រុងឈីងតាវ ខេត្តសានដុង សាធារណរដ្ឋប្រជាមានិតចិន។

ក្នុងជំនួបជាមួយគណៈប្រតិភូកម្ពុជា ក្រុមហ៊ុន Sailun Group បានបង្ហាញចក្ខុវិស័យច្បាស់លាស់ក្នុងការបន្តសហការជាមួយរាជរដ្ឋាភិបាលកម្ពុជាលើការវិនិយោគកៅស៊ូជាតិកម្ពុជា ការសាងសង់រោងចក្រផលិតកែច្នៃកៅស៊ូ និងការសាងសង់សួនឧស្សាហកម្មក្នុងប្រទេសកម្ពុជា។

ក្នុងជំនួបនេះ លោកឧបនាយករដ្ឋមន្ត្រី ស៊ុន ចាន់ថុល បានលើកឡើងអំពីជំហររបស់កម្ពុជាក្នុងការបើកទទួលរាល់វិនិយោគិនទាំងអស់ និងពិសេសលើកទឹកចិត្តចំពោះក្រុមហ៊ុនក្នុងការពង្រីកខ្សែច្រវាក់ផលិតកម្មរបស់ខ្លួននៅកម្ពុជាបន្ថែមទៀត។ ជាមួយគ្នានេះដែរលោកក៏បានបង្ហាញអំពីទិសដៅរបស់កម្ពុជាដែលចង់ឃើញមានការវិនិយោគលើវិស័យនានាច្រើននៅកម្ពុជា ដែលនេះស្របទៅគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ការខិតខំជំរុញឱ្យកម្ពុជាជាប្រទេសមានចំណូលខ្ពស់នៅឆ្នាំ២០៥០ ដោយត្រូវប្ដូរមកប្រើធនធានបច្ចេកទេសខ្ពស់ ការប្រើប្រាស់បច្ចេកវិទ្យាជាដើម។

លោកបន្ថែមថា រាជរដ្ឋាភិបាលចាត់ទុកផ្នែកឯកជនជាដៃគូរដ៏សំខាន់ ដោយក្នុងនោះមានរៀបចំបង្កើតក្រុមការងារចំនួន១៤ ពីវិស័យរដ្ឋនិងឯកជន ដើម្បីធ្វើការរួមគ្នាដោះស្រាយបញ្ហានានារបស់វិស័យឯកជន។ កម្ពុជាមានច្បាប់វិនិយោគដែលផ្ដល់ការលើកទឹកចិត្តដល់គ្រប់វិនិយោគិនដែលដាក់ទុនវិនិយោគនៅកម្ពុជា ហើយក្នុងនោះមានក្រុមប្រឹក្សាអភិវឌ្ឍន៍កម្ពុជាដែលជាអ្នកទាក់ទាញ សម្របសម្រួល និងថែទាំគម្រោងវិនិយោគទាំងអស់នៅកម្ពុជា។

សូមជម្រាបថា បច្ចុប្បន្នក្រុមហ៊ុនបុត្រសម្ព័ន្ធរបស់Sailun Group គឺក្រុមហ៊ុន Cart Tire Co., Ltd. បានកំពុងវិនិយោគគម្រោងកម្មន្ដសាលសំបកកង់យានយន្ត ក្នុងខេត្តស្វាយរៀងជាមួយនិងទុនវិនិយោគនឹងឡើងដល់ប្រមាណ ៧០០លានដុល្លារអាមេរិក លើផ្ទៃដីប្រមាណ ១២០ហិចតា និងមានទីផ្សារនាំចេញទៅកាន់ សហរដ្ឋអាមេរិក កាណាដា ម៉ាឡេស៊ី និងកូរ៉េខាងត្បូង បានបង្កើតការងារប្រមាណ ២ពាន់កន្លែង។ ចំពោះមជ្ឈមណ្ឌលកៅស៊ូជាតិ គឺជាមជ្ឈមណ្ឌលពិសោធន៍ និងស្រាវជ្រាវ ដែលប្រើប្រាស់បច្ចេកវិទ្យាទំនើបចុងក្រោយ និងធំបំផុតនៅក្នុងប្រទេសចិន៕

The post អ្នកឧកញ៉ាម្ចាស់ក្រុមហ៊ុនយក្សធំៗច្រើនរូបទៅទស្សនកិច្ចគោះទ្វារវិនិយោគនៅស្រុកចិន appeared first on .

១. អ្នកឧកញ៉ា ទៀ វិចិត្រ និងអ្នកឧកញ៉ា ឡាវ កាង អមដំណើរលោក ជា សុផារ៉ា ចុះពិនិត្យវឌ្ឍនភាពការស្ថាបនាស្ថានីយប្រព្រឹត្តកម្មទឹកកខ្វក់ទី៣

២. កូនប្រសារអ្នកឧកញ៉ា លី យ៉ុងផាត់ ជាអ្នកនយោបាយវ័យក្មេង ជាប់ជាតំណាងរាស្ត្រ នៅមណ្ឌលខេត្តកំពង់ស្ពឺ

៣. មកមើលទិដ្ឋភាពខ្លះៗ នៃភូមិគ្រឹះដ៏ធំស្កឹមស្កៃ របស់មហាសេដ្ឋីស្រុកខ្មែរ អ្នកឧកញ៉ា គិត ម៉េង

៤. ជំទាវឧកញ៉ាមួយរូបគត់ ស្ថិតក្នុងសមាសភាពក្រុមប្រឹក្សាភិបាល នៃសហព័ន្ធសេវាអប់រំនៅកម្ពុជា

៥. អ្នកឧកញ៉ា លី ហួរ ដឹកនាំកិច្ចប្រជុំពិភាក្សាពីការអភិវឌ្ឍវិស័យលំនៅឋាននៅកម្ពុជា

៦. ព្រះមហាក្សត្រ ត្រាស់បង្គាប់ផ្តល់គោរមងារ «អ្នកឧកញ៉ា» ជូនជំទាវឧកញ៉ា ម្ចាស់ផ្សារទំនើបសេនជូរីផ្លាហ្សា

៧. ព្រះមហាក្សត្រ ត្រាស់បង្គាប់ផ្តល់គោរមងារ «អ្នកឧកញ៉ា» ជូនឧកញ៉ា សុខ វណ្ណា

៨. ណែនាំឱ្យស្គាល់ ក្រុមហ៊ុន ភ្នំពេញ ព្រីខាស ផ្លេន របស់ឧកញ៉ា ជឹង ធានសេង

៩. តើឧកញ៉ា តេង ហឿង ជានរណា?

១០. ឧកញ៉ា ប៉ិច បូឡែន អំពាវនាវអ្នកមានធនធាន អ្នកឧកញ៉ា ឧកញ៉ា ជួយវិនិយោគបន្ថែមលើវិស័យអប់រំ ។

The post សរុបព្រឹត្តិការណ៍ជុំវិញឧកញ៉ា សំខាន់ៗចំនួន១០ ប្រចាំសប្តាហ៍នេះ appeared first on .

ការ​ចុះពិនិត្យវឌ្ឍនភាពនៃការស្ថាបនាស្ថានីយប្រព្រឹត្តកម្មទឹកកខ្វក់ទី៣ ​នេះ​ ក៏​មាន​វត្តមាន​លោក សាយ សំអាល់ បេក្ខភាព​រដ្ឋមន្ត្រី​​ថ្មី នៃ​ក្រសួងរៀបចំដែនដី នគរូបនីយកម្ម និង​សំណង់ លោក គួច ចំរើន អភិបាលខេត្ត​ព្រះសីហនុ លោក លី រស្មី ស្ថាបត្យករ​ខ្មែរ​ដ៏​ឆ្នើម និង​ជា​រដ្ឋលេខាធិការ​ក្រសួង​រៀបចំ​ដែនដី ព្រម​ទាំង​ រដ្ឋលេខាធិការ អនុរដ្ឋលេខាធិការ អគ្គនាយក និង​មន្ត្រី​ជំនាញ​ទាំង​ថ្នាក់ជាតិ និង​ថ្នាក់​ក្រោម​ជាតិ ជា​ច្រើន​រូប​ទៀត។ ជាមួយ​គ្នា​នេះ គេ​ក៏​​ឃើញ​មាន​វត្តមាន លោក ហេង ឡាលីន ស្វាមី​របស់​លោកស្រី​ឧកញ៉ា សេង សុវីរដ្ឋា ដែល​ទើប​ទទួល​បាន​ការ​តែងតាំង​ជា «រដ្ឋលេខាធិការ» ក្រសួងរៀបចំដែនដី នគរូបនីយកម្ម និង​សំណង់ កាលពី​ថ្ងៃទី ០៤ ខែសីហា ឆ្នាំ២០២៣ ថ្មីៗ​កន្លង​ទៅ​នេះ អញ្ជើញ​ចូលរួម​ផង​ដែរ។

គួរ​បញ្ជាក់​ថា ស្ថានីយ៍ប្រព្រឹត្តកម្មទឹកកខ្វក់ទី៣ (PS3) នេះ ស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ បាន​បើកការដ្ឋានសាងសង់កាលពីថ្ងៃទី១៨ ខែកញ្ញា ឆ្នាំ២០២១ ដោយប្រើប្រាស់បច្ចេកវិទ្យា Membrane Aerated Biofilm Reactor (MABR) ដែលជាបច្ចេកវិទ្យាចុងក្រោយរបស់ប្រទេសអ៊ីស្រាអែល ដែលអនុវត្តដោយក្រុមហ៊ុន Xwater Technology រយៈពេល ២២ខែ និង​បាន​បញ្ចប់ការសាងសង់នៅខែមិថុនា ឆ្នាំ២០២៣ ក្នុងទឹកប្រាក់ប្រមាណ ២០លានដុល្លារ។ មន្ត្រី​ជំនាញ​បាន​​ឱ្យ​ដឹង​ថា​ វត្តមាន​ស្ថានីយ​ប្រព្រឹត្តិកម្ម​ទឹក​កខ្វក់​ទី​៣នេះ​ នឹង​រួម​ចំណែក​កាត់​បន្ថយ​ការ​ហូរ​ចូល​ទឹក​កខ្វក់​ក្នុង​សមុទ្រ​បាន​ជាង ​៧០​ភាគរយ៕​​

The post អ្នកឧកញ៉ា ទៀ វិចិត្រ និងអ្នកឧកញ៉ា ឡាវ កាង អមដំណើរលោក ជា សុផារ៉ា ចុះពិនិត្យវឌ្ឍនភាពការស្ថាបនាស្ថានីយប្រព្រឹត្តកម្មទឹកកខ្វក់ទី៣ appeared first on .