ទំហំពាណិជ្ជកម្មវៀតណាមរយៈពេល ៤ខែតំបូងនាឆ្នាំ ២០២៣នេះ មានការធ្លាក់ចុះជាខ្លាំង បើធៀបនឹងឆ្នាំទៅ បណ្ដាលឲ្យគោលដៅបង្កើនកំណើនសេដ្ឋកិច្ចប្រចាំឆ្នាំថយចុះ ដោយសារតម្រូវការសកលធ្លាក់ចុះ។
យោងតាមការចុះផ្សាយពី CNA បានបង្ហាញថា ការនាំចេញរបស់វៀតណាមសម្រាប់រយៈពេល ៤ខែតំបូង ធ្លាក់ចុះ ១៣% មកត្រឹម ១០៧,១ពាន់លានដុល្លារ ខណៈស្មាតហ្វូតដែលជាផលិតនាំចេញច្រើនបំផុត ធ្លាក់ចុះ ១៨,១% មកត្រឹម ១៧,៣ពាន់លានដុល្លារ។
ដោយឡែក ការនាំចូលចន្លោះខែមករា ដល់ខែមេសាក៏ថយចុះ ១៧,៧% មកនៅត្រឹម ៩៩,៦ពាន់លានដុល្លារ ដែលធ្វើឲ្យមានអតិរេកពាណិជ្ជកម្ម ៧,៥ពាន់លានដុល្លារ។ នេះបើតាមរបាយការណ៍ពីខាងគយ។
ការធ្លាក់ចុះយ៉ាងខ្លាំងនៃការនាំចូល អាចបង្ហាញពីការធ្លាក់ចុះបន្ថែមទៀតនាពេលខាងមុខនៅក្នុងផលិតកម្មឧស្សាហកម្ម ដោយសារអាជីវកម្មកាត់បន្ថយការទិញវត្ថុធាតុដើម និងឧបករណ៍របស់ពួកគេ។
ទន្ទឹមនឹងនោះ សមាជិកសភារបស់ប្រទេសវៀតណាមកាលពីថ្ងៃអង្គារ បានជំរុញឱ្យធនាគារកណ្តាលរបស់ខ្លួន ពិចារណាកាត់បន្ថយអត្រាគោលនយោបាយបន្ថែមទៀត ដើម្បីគាំទ្រដល់សេដ្ឋកិច្ច បន្ទាប់ពីពួកគេបានកាត់បន្ថយអត្រាគោលនយោបាយជាច្រើនកាលពីខែមីនា៕
