ការបាក់ស្ពានដែក Francis Scott Key នៅទីក្រុង Baltimore កាលពីយប់ថ្ងៃទី២៦ ខែមីនា បង្កឡើងដោយនាវាដឹកទំនិញ DALI បានធ្វើឲ្យមានការភ្ញាក់ផ្អើល និងមានគ្រោះថ្នាក់ជាខ្លាំង ស្របពេលប្រធានាធិបតីអាមេរិក លោក ចូ បៃដិន ក៏បានចេញបញ្ជាភ្លាមៗ ចំពោះចំណាត់ការសាងសង់ស្ពានឡើងវិញផងដែរ។
យោងតាមការចុះផ្សាយពីគេហទំព័រ Politico បានបង្ហាញថា មេដឹកនាំអាមេរិកបានអះអាងថា សហព័ន្ធនឹងរ៉ាប់រងរាល់ការចំណាយទាំងអស់ លើការសង់ស្ពានឡើងវិញជាបន្ទាន់ ដោយមិនអាចរង់ចាំសំណងពីក្រុមហ៊ុន Grace Ocean ដែលជាម្ចាស់របស់នាវាបើកបុកស្ពាននោះបានឡើយ។
ប្រធានាធិបតីអាមេរិករូបនេះ ក៏បាននិយាយទៀតថា ការចំណាយទាំងអស់លើការសង់ស្ពានវិញ គឺអាចមានទំហំច្រើន ដូច្នេះលោកអាចនឹងត្រូវជជែកជាមួយសមាជិកសភាដទៃ ដើម្បីស្នើសុំកញ្ចប់ទឹកប្រាក់បន្ថែម។
ជាមួយគ្នា សមាជិកសភាលោក Chris Van Hollen ក៏បានបង្ហើបដែរថា ផែនការសាងសង់ស្ពានដែក Francis Scott Key ឡើងវិញ គឺត្រូវចំណាយពេលយូរ និងថវិកាច្រើនណាស់ ដូច្នេះលោកមិនទាន់លំអិតថា វានឹងត្រូវការពេលយូរប៉ុណ្ណា ដើម្បីអាចបញ្ចប់គម្រោងសាងសង់នេះបានឡើយ៕
