កាលពីថ្ងៃច័ន្ទកន្លងទៅ កងទាហានរុស្ស៊ីបានធ្វើការបាញ់គ្រាប់ម៊ីស៊ីល ២ គ្រាប់ចំផ្សារទំនើបមួយកន្លែងនៅប្រទេសអ៊ុយក្រែន ដែលបណ្ដាលឲ្យមានមនុស្សស្លាប់យ៉ាងតិច ១៨ នាក់ និងមានមនុស្សជាច្រើនបានបាត់ខ្លួន និងរងរបួស។
អំពើមួយនេះបានធ្វើឲ្យប្រធានាធិបតីអ៊ុយក្រែន Volodymyr Zelenskyy បើកការចោទប្រកាន់ទៅកាន់រុស្ស៊ីចំៗថា បានក្លាយជារដ្ឋភេរវកម្មដែលតែងតែធ្វើអំពើឃោរឃៅជារៀងរាល់ថ្ងៃ និងបានស្នើសុំអន្តរាគមន៍ពីអង្គការសហប្រជាជាតិហៅកាត់ UN បណ្ដេញរុស្ស៊ីចេញពីសមាជិកថែមទៀត។ នេះបើតាមការចុះផ្សាយពី Timesofindia។
នៅក្នុងកិច្ចប្រជុំដែលធ្វើឡើងតាមរយៈ Video Call រវាងថ្នាក់ដឹកនាំអ៊ុយក្រែន និងក្រុមប្រឹក្សាសុវត្ថិភាព UN លោក Zelenskyy បានទទូចឲ្យ UN បង្កើតតុលាការអន្តរជាតិ ដើម្បីស៊ើបអង្កេតពីទង្វើដែលរុស្ស៊ីបានធ្វើមកកាន់អ៊ុយក្រែន និងបានដាក់ទោសប្រទេសដឹកនាំដោយលោក Vladimir Putin។
“ពួកយើងត្រូវតែបញ្ឈប់ទង្វើសម្លាប់រង្គាលរបស់រុស្ស៊ី បើមិនដូច្នោះទេ វានឹងរីករាលដាលដល់ប្រទេសនៅអឺរ៉ុបផ្សេងទៀត រួមទាំងអាស៊ីផងដែរ”។ នេះបើតាមសម្ដីរបស់លោក Zelenskyy បាននិយាយ។
សូមជម្រាបដែរថា ដើម្បីអាចស្នើឲ្យ UN ដករុស្ស៊ីចេញពីបញ្ជីសមាជិកទាំង ១៩៣ ប្រទេសបាន លោក Zelenskyy បានលើកឡើងនូវមាត្រា ៦ នៃច្បាប់របស់ UN ដែលបានចែងថា រាល់សមាជិកណាដែលបានបំពានគោលការណ៍ដែលមានចែងក្នុងច្បាប់បច្ចុប្បន្ន និងត្រូវបណ្ដេញចេញពីអង្គការ ដោយមហាសន្និបាតតាមអនុសាសន៍របស់ក្រុមប្រឹក្សាសន្តិសុខ។
យ៉ាងណា ការបណ្ដេញរុស្ស៊ីចេញពី UN ហាក់មិនមែនជារឿងងាយស្រួលឡើយ ដ្បិតប្រទេសដែលជាសមាជិកអចិន្ត្រៃយ៍ដូចជារុស្ស៊ី នឹងមានសិទ្ធិប្រើប្រាស់ “វេតូ” របស់ខ្លួន ដើម្បីរារាំងរាល់បំណងចង់បណ្ដេញពួកគេចេញពី UN៕
