ក្រុមហ៊ុន Adani Group បានប្រកាសថា ពួកគេនឹងព្យាយាមបង្កើនបំណុលថ្មីឲ្យបាន ១០ ពាន់លានដុល្លារនៅឆ្នាំក្រោយ ដើម្បីពង្រីកខ្លួនលើគម្រោងវិនិយោគធំៗដូចជា គម្រោងការបង្កើតបំពង់បង្ហូរប្រេងជាដើម។ នេះបើតាមការចុះផ្សាយពី Bloomberg។
ទន្ទឹមនឹងនោះ ក្រុមហ៊ុនបុត្រសម្ព័ន្ធ Adani Enterprises Ltd., ក៏បានទម្លាយដែរថា ពួកគេកំពុងពិចារណាលក់ចេញភាគហ៊ុនថ្មីប្រមាណ ២ ពាន់លានដុល្លារនៅឆ្នាំក្រោយ បន្ទាប់ពីតម្លៃភាគហ៊ុនរបស់ក្រុមហ៊ុនមួយនេះកើនឡើងគួរឲ្យកត់សម្គាល់។
តម្លៃហ៊ុនរបស់ Adani Enterprises Ltd., បានកើនឡើងរហូតដល់ ១៣៦% បើធៀបនឹងឆ្នាំទៅ ហើយតម្លៃមូលធនទីផ្សាររបស់ពួកគេនាពេលនេះ គឺមានរហូតដល់ ៥៦,៣ ពាន់លានដុល្លារ។
សូមជម្រាបដែរថា មួយរយៈកាលចុងក្រោយ អ្នកមានបំផុតនៅអាស៊ីម្នាក់នេះបានព្យាយាមពង្រីកខ្លួនជាខ្លាំងលើពហុវិស័យដូចជា បានចាយលុយជាង ១០ ពាន់លានដុល្លារទិញក្រុមហ៊ុនផលិតស៊ីម៉ងត៍ Holcim Ltd. ដែលជាកិច្ចចរចាធំបំផុតទី ២ ប្រចាំឆ្នាំនៅឥណ្ឌា ហើយក៏លឺល្ហៀងៗទៀតថា កំពុងចរចាទិញភាគហ៊ុនធំនៃក្រុមហ៊ុនទូរទស្សន៍ខ្នាតយក្ស New Delhi Television ទៀតផង៕
