ប្រទេសអ៊ុយក្រែន នឹងទទួលបានរថក្រោះចន្លោះពី ១២០ ដល់ ១៤០ គ្រឿង សម្រាប់ជំនួយជើងទីមួយ ពីប្រទេសចំនួន ១២។ នេះបើតាមការបង្ហើបឲ្យដឹងពីរដ្ឋមន្ត្រីការបរទេស Dmytro Kuleba។
យោងតាមការចុះផ្សាយពី CNA បានបង្ហើបថា រដ្ឋាភិបាលអ៊ុយក្រែនទទួលបានពាក្យសន្យាពីលោកខាងលិចក្នុងខែនេះ ចំពោះជំនួយរថក្រោះធន់ធ្ងន់ ដើម្បីត្រៀមទប់ទល់ពីការវាយប្រហាររបស់រុស្ស៊ី។
“សម្ព័ន្ធផ្ដល់ជំនួយរថក្រោះ បច្ចុប្បន្នមានសមាជិក ១២ ប្រទេស ហើយខ្ញុំបានកត់សម្គាល់ថាជំនួយជើងទីមួយនេះ កងកម្លាំងអ៊ុយក្រែនអាចទទួលបានរថក្រោះផលិតឡើងនៅលោកខាងលិច ចន្លោះពី ១២០ ដល់ ១៤០ គ្រឿង”។ នេះបើតាមសម្ដីរដ្ឋមន្ត្រីការបរទេស Kuleba បាននិយាយ។
បន្ថែមពីនោះ រដ្ឋមន្ត្រីការបរទេសអ៊ុយក្រែនក៏បានបញ្ជាក់ពីម៉ូដែលរថក្រោះទាំងនោះដែលមានដូចជា រថក្រោះ Leopard 2 របស់អាល្លឺម៉ង់ រថក្រោះ Challenger 2 របស់អង់គ្លេស រថក្រោះ M1 Abrams របស់អាមេរិកជាដើម ខណៈកាលបរិច្ឆេទនៃការមកដល់របស់រថក្រោះទាំងនេះ នៅមិនទាន់អាចកំណត់បាននៅឡើយ៕
