នៅព្រឹកថ្ងៃព្រហស្បតិ៍ ទី១៥ ខែកញ្ញានេះ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងគណៈប្រតិភូសភាពាណិជ្ជកម្មកម្ពុជា បានចូលរួមអមដំណើរ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញទៅទស្សនាមហាកំពែងចិន (The Great Wall of China) និងតំបន់មួយចំនួន នៅក្នុងប្រទេសចិន។
អ្នកឧកញ៉ា ឧកញ៉ា ដែលចូលរួមអមដំណើរ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញទៅទស្សនាមហាកំពែងចិន នៅព្រឹកនេះ គេឃើញមានវត្តមាន អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា, អ្នកឧកញ៉ា លឹម ហេង, អ្នកឧកញ៉ា លី ឃុនថៃ, អ្នកឧកញ៉ា ទុយ គី, អ្នកឧកញ៉ា ឡាវ កាង, លោកស្រីអ្នកឧកញ៉ា ចាន់ សុទ្ធា និងលោកស្រីឧកញ៉ា ងួន ពេជ្រសុផល ដែលសុទ្ធសឹងជាគណៈប្រតិភូជាន់ខ្ពស់ មកពីសភាពាណិជ្ជកម្មកម្ពុជា។
អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងគណៈប្រតិភូសភាពាណិជ្ជកម្មកម្ពុជា បានអញ្ជើញអមដំណើរសម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ទៅបំពេញទស្សនកិច្ចផ្លូវការនៅប្រទេសចិន ដែលធ្វើឡើងចាប់ពីថ្ងៃទី១៤ ដល់ថ្ងៃទី១៦ ខែកញ្ញា ឆ្នាំ២០២៣នេះ ហើយនឹងអញ្ជើញចូលរួមពិព័រណ៍អាស៊ាន-ចិន លើកទី២០ ពីថ្ងៃទី១៦ ដល់១៧ ខែកញ្ញា នៅទីក្រុងណាននីង តំបន់ស្វយ័តក្វាងស៊ីផងដែរ។
មហាកំពែងចិន (The Great Wall of China) ត្រូវបានប្រជាជនចិនចាត់ទុកថា ជារតនសម្បត្តិរបស់ខ្លួន មានប្រវែងសរុបប្រមាណ ២១,១៩៦ គីឡូម៉ែត្រ។ មហាកំពែងចិន ជាបន្ទាយសឹកការពារសត្រូវ មានលក្ខណៈបណ្តាក់ៗគ្នាជាច្រើន ដែលត្រូវបានកសាងឡើងដោយបណ្តារដ្ឋ និងអធិរាជចិនបុរាណ នាព្រំដែនភាគខាងជើង។ សំណង់នៃកំពែងនេះមាននៅតាមខេត្ត និងតំបន់ចំនួន ១៥ រួមមាន៖ ប៉េកាំង ធានជីង ហឺប៉ី សានស៉ី អ៉ីនណឺរ ម៉ុងហ្គោលី លាំងនីង ជីលីង ហីឡុងជាំង សានទុង ហឺណាន សានស៉ី កាងស៊ូ និងឈីងហាយ៕
